“Mi ting olsem nau mi painim wanpela gutpela poroman tru. Na mi tokim mi yet olsem, ‘Bai mi stap wantaim dispela man long laip olgeta bilong mi.’ Tasol bihain long 2-pela mun, pasin pren bilong mipela i bruk. Mi no inap bilip olsem pastaim mipela i stap olsem ol gutpela pren, tasol wantu pasin pren bilong mipela i pinis!”—Anna. *

“Ol tingting na laik bilong mitupela i wankain. Olsem na mi ting olsem mitupela bai marit. Tasol bihain, mi luksave olsem mipela i gat narapela narapela laik na tingting. Olsem na mi tokim em olsem mitupela i no ken pren moa.”—Elaine.

Olsem wanem? Wankain hevi olsem i bin painim yu? Sapos olsem, dispela atikol inap long helpim yu long karim dispela hevi.

Taim man na meri i no pren moa, ol inap bel hevi tru, moa yet em poroman husat i mekim dispela disisen. Sarah i prenim wanpela yangpela man inap 6-pela mun, tasol bihain tupela i no pren moa. Em i tok: “Mi bel hevi tru! Mitupela i mekim olgeta samting wantaim, tasol hariap tru olgeta samting i senis. Taim mi harim ol musik em mitupela i laikim, mi save tingim bek ol samting mipela i mekim wantaim. Na mi bel hevi tru taim mi go long ol ples em mipela i raun wantaim long en. Maski em tingting bilong mi olsem mipela i no ken pren moa, mi bel hevi stret!”

Gutpela samting inap kamap maski man na meri i no pren moa. Elaine i tok: “Yu no laik bai pren bilong yu i bel hevi. Tasol yu luksave olsem bihain hevi inap kamap na dispela bai bagarapim bel bilong yutupela, olsem na i gutpela long yutupela i no pren moa.” Sarah i wanbel long dispela tingting na i tok: “Sapos yu gat tupela tingting long taim yu prenim wanpela, orait dispela i makim olsem hevi inap kamap long taim yupela i marit. Sapos olsem, orait i gutpela long yutupela i no pren moa.”

Sapos yupela i no pren moa, dispela i no makim olsem yu no gutpela pren. Taim man na meri i pren, ol i save mekim ol disisen, tasol dispela i no makim olsem olgeta bilong ol bai mekim disisen long marit, nogat. Sapos yu o poroman bilong yu i mekim ol bikpela popaia, orait ating i gutpela long yutupela i no ken pren moa. Taim kain samting olsem i kamap, ating bai yu bel hevi na ting olsem yu no gutpela pren. Tasol olsem wanem yu inap daunim dispela tingting?

I nogat rong long bel hevi. Elaine em yumi stori pinis long en i tok: “Mi lusim bes pren bilong mi.” Sapos yu pas gut wantaim wanpela, tasol bihain yupela i no pren moa, orait i nogat rong long bel hevi. Adam, em wanpela yangpela man i tok: “Taim man na meri i no pren moa, tupela inap bel hevi long dispela maski ol i save olsem ol i mekim gutpela disisen.” Ating yu pilim wankain olsem King Devit long Baibel. Em i tok: “Olgeta nait aiwara bilong mi i save wasim bet bilong mi.” (Song 6:6) I nogat rong long tingting planti na bel hevi. Dispela em wanpela gutpela rot yu ken bihainim bilong karim dispela hevi.—Stiatok bilong Baibel: Song 4:4.

Bung wantaim ol man i save tingim yu. I hatwok long mekim olsem long taim hevi i painim yu. Anna, em yumi stori pinis long en i tok: “Pastaim mi pilim olsem mi no laik bung wantaim ol arapela. Mi laik stap wanpis na bai mi ken lusim sampela haptaim long sindaun na tingim gut ol samting i kamap.” Tasol bihain, Anna i luksave olsem em i savetingting long bung wantaim ol gutpela pren, long wanem, ol inap long mekim ol tok bilong givim bel isi long em. Em i tok moa: “Pastaim mi bel hevi tru, tasol nau mi stap bel isi.”—Stiatok bilong Baibel: Sindaun 17:17.

Kisim skul long ol samting i kamap. Askim yu yet olsem: ‘Ol samting i kamap i helpim mi long senisim sampela pasin bilong mi? Sapos bihain mi kisim nupela poroman, mi inap mekim wanem na bai pasin pren bilong mipela i stap strong?’ Marcia em wanpela yangpela meri i tok: “Bihain liklik, mi inap long skelim gut ol samting na mekim disisen, na mi no larim bel na tingting i giamanim mi.” Adam em yumi stori pinis long en i gat wankain tingting. Em i tok: “Bihain long wanpela yia mi no bel hevi olsem mipela i no pren moa. Tasol longpela taim liklik i lus na nau mi kisim sampela skul long ol samting i kamap. Olsem, mi inap save gut long pasin bilong mi yet na bilong ol meri, na ol samting i save kamap long pasin bilong i stap boipren na gelpren. Maski mipela i no pren moa, nau mi stap bel isi.”

Beten long God i ken givim yu bel isi. Baibel i tok, God “i save mekim orait ol manmeri, hevi i bagarapim tingting bilong ol na ol i pilim nogut. Na em i pasim ol sua bilong ol.” (Song 147:3) Jehova i no save makim man o meri em yu bai maritim, na tu, i no asua bilong em na yu no pren moa wantaim wanpela. Maski i olsem, God i tingim yu na em i laik bai yu stap amamas. Olsem na long rot bilong beten yu inap kamapim hevi bilong yu long Em.—Stiatok bilong Baibel: 1 Pita 5:7.