LESEN 17
Jisas Em i Wanem Kain Man?
Taim yumi kisim save long ol samting Jisas i stori long en na ol wok em i mekim taim em i stap long graun, yumi luksave long ol pasin bilong em na dispela i kirapim yumi long go klostu long em na Papa bilong em, Jehova. Wanem sampela bilong ol dispela gutpela pasin bilong em? Na olsem wanem yumi ken bihainim pasin bilong Jisas long laip bilong yumi yet?
1. Long wanem ol rot Jisas i wankain long Papa bilong em?
Long heven, Jisas i lukim ol samting gutpela Papa bilong em i mekim na em i kisim skul long Papa bilong em inap planti bilion yia. Olsem na, em i gat wankain tingting, filings, na em i mekim ol samting wankain olsem Papa bilong em. (Ritim Jon 5:19.) Jisas i bihainim gut ol pasin bilong Papa bilong em, olsem na em inap tok: “Man i lukim mi, em i lukim Papa tu.” (Jon 14:9) Taim yu kisim gut save long ol pasin bilong Jisas, yu bai kisim gut save moa long Jehova. Olsem, pasin bilong Jisas long tingim gut ol manmeri, dispela i soim pasin bilong Jehova long tingim tru yu.
2. Olsem wanem Jisas i soim olsem em i laikim Jehova?
Jisas i tok: “Ol manmeri bilong graun i ken save olsem mi laikim Papa, [na] mi bihainim tok Papa i bin givim mi.” (Jon 14:31) Taim Jisas i stap long graun, em i soim olsem em i laikim tru Papa bilong em long rot bilong bihainim tok bilong em long olgeta taim, maski sampela taim i no isi long em i mekim olsem. Na tu, Jisas i amamas long tokim ol narapela long Papa bilong em, na helpim ol long kamap pren bilong God tu.—Jon 14:23.
3. Long wanem rot Jisas i soim olsem em i laikim ol manmeri?
Baibel i tok “samting i givim bikpela amamas long [Jisas], em ol manmeri.” (Provep 8:31) Em i kamapim dispela pasin laikim long rot bilong strongim na daunim laik bilong em yet bilong helpim ol manmeri. Em i wokim ol mirakel i soim olsem em i gat strong, na tu, em i gat pasin sori. (Mak 1:40-42) Em i mekim gutpela pasin long ol man na em i no mekim wansait pasin. Tok bilong Jisas i mekim isi bel bilong ol man i harim tok bilong em, na helpim ol man i gat gutpela bel long wetim gutpela samting. Jisas i redi long karim pen na hevi na i dai bikos em i laikim ol manmeri. Tasol em i laikim moa yet ol man i bihainim ol tok bilong em.—Ritim Jon 15:13, 14.
KISIM SAMPELA SAVE MOA
Kisim sampela save moa long pasin bilong Jisas. Na skelim olsem wanem yu ken soim pasin laikim na givim ol samting long ol narapela olsem em i bin mekim.
4. Jisas i laikim Papa bilong em
Pasin bilong Jisas i soim yumi long olsem wanem yumi ken soim olsem yumi laikim God. Ritim Luk 6:12 na Jon 15:10; 17:26. Taim yu ritim pinis wan wan skripsa, stori long dispela askim:
-
Olsem wanem yumi bihainim pasin bilong Jisas na soim olsem yumi laikim Jehova?
Jisas i laikim Papa bilong em long heven na planti taim em i toktok wantaim em long rot bilong beten
5. Jisas i tingim tru ol manmeri i sot long ol samting
Jisas i tingim moa yet ol narapela na em i no tingim em yet. Maski em i taiet, em i yusim taim na strong bilong em long helpim ol manmeri. Ritim Mak 6:30-44, na stori long ol dispela askim:
-
Long dispela stori, wanem sampela rot Jisas i soim olsem em i tingim ol narapela?—Lukim ves 31, 34, 41, na 42.
-
Wanem samting i kirapim Jisas long helpim ol manmeri?—Lukim ves 34.
-
Jisas i bihainim pasin bilong Jehova, na dispela i skulim yu olsem wanem long Jehova?
-
Wanem sampela rot yumi ken bihainim pasin bilong Jisas long tingim ol narapela?
6. Jisas i gat pasin bilong givim ol samting
Maski Jisas i no gat planti samting bilong skin, em i save givim ol samting long ol narapela, na em i kirapim yumi tu long bihainim pasin bilong em long givim ol samting. Ritim Aposel 20:35, na stori long dispela askim:
-
Olsem Jisas i tok, hau bai yumi stap amamas?
Plilaim VIDIO, na stori long dispela askim.
-
Maski yumi no gat planti samting bilong skin, wanem sampela rot yumi inap givim ol samting long ol narapela?
Yu save long dispela?
Baibel i skulim yumi long beten long Jehova long nem bilong Jisas. (Ritim Jon 16:23, 24.) Taim yumi beten olsem, yumi soim olsem yumi luksave long samting Jisas i mekim long helpim yumi long kamap pren bilong Jehova.
SAMPELA MAN I TOK: “God i no save wari long pen na hevi yumi karim.”
-
Jisas i kamapim klia pasin bilong Papa bilong em, olsem na hau pasin bilong em i soim olsem Jehova i tingim tru yumi?
OL BIKPELA POIN
Jisas i laikim Jehova, na em i laikim ol manmeri. Jisas i wankain olsem Papa bilong em, olsem na taim yu kisim save moa long Jisas, yu bai save gut moa long Jehova.
Riviu
-
Olsem wanem yumi ken soim olsem yumi laikim Jehova olsem Jisas i bin mekim?
-
Olsem wanem yumi ken soim olsem yumi laikim ol manmeri olsem Jisas i bin mekim?
-
Yu laikim tru wanem pasin bilong Jisas?
MEKIM WOK PAINIMAUT
Skelim sampela pasin bilong Jisas em yumi ken bihainim.
“Bihainim Pasin Bilong Jisas” (Buk Jisas—Em i Rot, Tok i Tru, na Laip, pes 317)
Kisim save long wai na yumi mas beten long nem bilong Jisas.
“Bilong Wanem Yumi Mas Beten Long Nem Bilong Jisas?” (Wastaua, Februeri 1, 2008)
Yu ting Baibel i stori long lukluk bilong Jisas i wanem kain?
“Jisas i Luk Olsem Wanem?” (Atikol long websait)
Yumi inap kisim wanem skul long pasin Jisas i mekim long ol meri?
“Rispek na Gutnem Aninit Long Lukaut Bilong God” (Wastaua, Septemba 1, 2012)
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
