LUKIM pisin i kam daun long het bilong dispela man. Dispela man em Jisas. Em i gat 30 krismas. Na narapela man hia em Jon. Yumi bin stori pinis long sampela samting bilong Jon. Yu tingim dispela taim Maria i go lukim wanblut bilong em Elisabet, na bebi i stap long bel bilong Elisabet i amamas na kalap? Dispela bebi em Jon. Tasol nau Jon na Jisas i mekim wanem?

Nau tasol Jon i bin putim Jisas i go daun insait tru long wara Jordan. Em pasin bilong baptaisim man. Jon i save baptaisim ol man, olsem na ol i kolim em Jon Bilong Baptais. Tasol bilong wanem Jon i baptaisim Jisas?

Jon i mekim olsem, long wanem, Jisas i kam na tokim Jon long baptaisim em. Jon i save baptaisim ol man em ol i laik soim olsem ol i sori long ol pasin nogut ol i bin mekim. Tasol yu ting Jisas i mekim wanpela pasin nogut na em i sori long dispela? Nogat. Jisas i no mekim wanpela pasin nogut, long wanem, em i Pikinini Bilong God na em i kam long heven. Olsem na i gat narapela samting i as na em i tokim Jon long baptaisim em. Orait yumi ken stori long dispela.

Paslain long Jisas i kam long Jon, em i mekim wok kapenta. Ol kapenta i save wokim ol samting long plang, olsem tebol na sia na fom samting. Man bilong Maria, em Josep, em i wanpela kapenta, na em i bin skulim Jisas long mekim dispela wok. Tasol Jehova i no salim Pikinini bilong em i kam long graun bilong mekim wok kapenta, nogat. Em i givim wanpela narakain gutpela wok long Jisas, na taim i kamap nau bilong Jisas i kirap mekim dispela wok. Olsem na bilong soim olsem em i kam bilong mekim laik bilong Papa bilong em, Jisas i tokim Jon long baptaisim em. Yu ting God i amamas long dispela?

Yes, em i amamas, long wanem, taim Jisas i lusim wara na i kam antap, wanpela maus long heven i tok: ‘Dispela em i Pikinini bilong mi. Mi amamas long em.’ Na i olsem heven i op na dispela pisin i kam daun long Jisas. Tasol em i no wanpela pisin tru tru, nogat. Holi spirit bilong God i kam daun olsem wanpela pisin.

Nau i gat planti samting Jisas i mas tingim, olsem na inap 40 de em i go i stap long wanpela hap i no gat man. Satan i kam long em long dispela hap. Inap 3-pela taim Satan i laik pulim Jisas long brukim lo bilong God. Tasol Jisas i no mekim.

Bihain, Jisas i go bek na em i bungim sampela man em ol i kamap ol namba wan disaipel o lain i bihainim em. Sampela bilong ol em Andru, Pita (narapela nem bilong em Saimon), Filip na Nataniel (narapela nem bilong em Bartolomyu). Jisas na ol dispela nupela disaipel ol i go long Galili. Long Galili, ol i stap liklik taim long as ples bilong Nataniel, em Kana. Long Kana Jisas i go long wanpela kaikai bilong marit na em i wokim namba wan mirakel bilong em. Yu save em i mekim wanem? Em i tanim wara i kamap wain.