APENDIKS
Nambawan Ensel Maikel Em i Husat
BAIBEL i no mekim planti tok long dispela ensel ol i kolim Maikel. Tasol taim Baibel i mekim sampela tok long em, em i mekim wok i stap. Long Buk Daniel, Maikel i pait long ol spirit nogut; long Buk Jut em i tok pait wantaim Satan; na long buk Kamapim Tok Hait em i pait wantaim Satan na ol spirit nogut bilong em. Em i sambai long wok king bilong Jehova na i pait long ol birua bilong God, olsem na Maikel i mekim ol samting i stret wantaim mining bilong nem bilong em—“Husat i Wankain Olsem God?” Tasol Maikel em i husat?
Sampela man i gat tupela o tripela nem. Olsem: Narapela nem bilong Jekop em Israel, na narapela nem bilong aposel Pita em Saimon. (Stat 49:1, 2; Matyu 10:2) Na olsem tasol, Baibel i soim olsem Maikel em i narapela nem bilong Jisas Krais, paslain na bihain long em i stap long graun. Nau yumi ken skelim sampela tok bilong Baibel i helpim yumi long save long dispela.
Nambawan ensel. Baibel i tok Maikel em i “namba wan ensel.” (Jut 9) Taim Baibel i tok long “namba wan ensel” em i tok long wanpela ensel tasol, i no gat wanpela taim Baibel i tok long ol nambawan ensel. Dispela i kamapim klia olsem i gat wanpela nambawan ensel tasol. Na tu, Baibel i tok Jisas i holim namba bilong nambawan ensel. Long 1 Tesalonaika 4:16 (NW) Baibel i tok long Bikpela Jisas Krais i kirap bek pinis: “Bikpela yet bai i lusim heven na kam daun wantaim strongpela singaut, long nek bilong nambawan ensel.” Em nau, Baibel i tok nek bilong Jisas em nek bilong nambawan ensel. Olsem na dispela ves i soim olsem Jisas yet em i nambawan ensel Maikel.
Lida Bilong Lain Ami. Baibel i tok, “Maikel wantaim ol ensel bilong en ol i pait long dispela traipela snek . . . wantaim ol ensel bilong en.” (KTH 12:7) Olsem na Maikel em i Lida bilong lain ami bilong ol gutpela ensel. Buk Kamapim Tok Hait tu i tok olsem Jisas em i Lida bilong ami bilong lain gutpela ensel. (KTH 19:14-16) Na aposel Pol i tok long “Bikpela Jisas” na “olgeta strongpela ensel bilong en.” (2 Tesalonaika 1:7) Olsem na Baibel i toktok long Maikel na “ol ensel bilong en” na Jisas na “ol ensel bilong en.” (Matyu 13:41; 16:27; 24:31; 1 Pita 3:22) I no gat wanpela skripsa i tok olsem i gat tupela lain ami bilong ol gutpela ensel long heven—lida bilong wanpela lain em Maikel na bilong narapela lain em Jisas—olsem na i stret yumi ken ting Maikel em i Jisas Krais taim em i mekim wok bilong em long heven. *
^ par. 1 Sampela tok moa i soim olsem nem Maikel i makim Pikinini Bilong God, i stap long buk Insight on the Scriptures, Volium 2, pes 393-4, na long buk Toktok Gut Wantaim Ol Man Long Baibel, pes 218-9, em ol buk ol Witnes Bilong Jehova i wokim.
