Toksave bilong ol man i kam long kibung
ATENDAN Ol atendan i stap bilong helpim yu. Plis bihainim gut tok bilong ol taim ol i tok long putim kar we, wokabaut we, makim sia na ol arapela samting.
BAPTAIS Ol manmeri i laik kisim baptais ol i mas sindaun long ol sia ol i makim bilong ol long fran bilong pletfom. Ol lain bilong kisim baptais i mas sindaun long hap mipela i makim bilong ol long Sarere moning paslain long tok bilong baptais i kirap. Ol i mas kisim i kam taul bilong ol na klos bilong waswas i stret long pasim.
DONESEN Yumi lusim bikpela mani tru bilong redim ol hap bilong sindaun, na saun sistem, na planti narapela samting bilong mekim kibung i kamap gutpela na bilong helpim yumi long i go klostu moa long Jehova. Ol donesen bilong yupela i helpim yumi long baim ol dispela samting, na i helpim tu wok bilong autim tok long olgeta hap. Mipela i makim gut ol bokis kontribiusen na sanapim long ples klia long ol hap bilong kibung. Gavening Bodi i amamas tru long olgeta donesen yupela i givim na ol i laik tok tenkyu long yupela long helpim wok bilong Kingdom.
FES EID Plis tingim, dispela dipatmen i bilong IMEJENSI TASOL.
SAMTING I LUS Sapos yu painim wanpela samting i lus na i no bilong yu, orait kisim i go long Dipatmen Bilong Ol Samting i Lus. Sapos wanpela samting bilong yu i lus, go long dispela dipatmen bilong painim dispela samting. Sapos sampela liklik pikinini i lusim papamama na ol i no inap painim papamama, bringim ol i go long dispela dipatmen. Tasol wok bilong en i no bilong lukautim ol pikinini. Plis lukautim gut ol pikinini bilong yu, na ol i mas i stap wantaim yu.
PLES SINDAUN Plis, tingim gut ol narapela man. Tingim: Yu ken kisim sia bilong ol wanhaus bilong yu, ol man i kam wantaim yu long kar, na ol lain em yu save stadi wantaim ol long Baibel. Yu no ken lusim ol samting bilong yu i stap nabaut long ol sia klostu long yu.
WOK VOLANTIA Sapos yu laik helpim wok bilong stretim ples kibung, orait yu ken go long dispela dipatmen na toksave long ol.
SPESEL MITING
SKUL BILONG OL KINGDOM EVANSELIS Ol painia em krismas bilong ol i namel long 23 na 65 em ol i laik mekim bikpela wok moa bilong autim tok, ol i ken kam long dispela miting bilong Skul Bilong Ol Kingdom Evanselis long Sande apinun. Toksave bai kamap long taim na ples bilong mekim dispela miting.
Gavening Bodi Bilong Ol Witnes Bilong Jehova i Redim Dispela Kibung
