Génesis 21:1-34
21 Ja Jyoba wajskʼujol ja Sara jastalni yalunej, sok ja Jyoba ya k’otuk ja jas skʼapunejyiʼi.
2 Ja yuj ja Sara kan embarazada sok yayi jun skerem ja Abrahán yajni awelxa, jani ja bʼa mero styempoʼil kʼapjiyi yuja Dyosi.
3 Ja Abrahán ya sbʼiʼiluk Isaac ja yal alatsi, ja yal kerem ajiyi yuja Sara.
4 Sok ja Abrahán yaʼeluk ja stsʼujmil sniʼ swinkil ja skerem Isaac yajni ayto yiʼoj ocho kʼakʼu pojkeli, jastalni ajiyi mandar yuja Dyosi.
5 Ja Abrahán ayni yiʼoj 100 jabʼil yajni pojki ja skerem Isaac.
6 Sok ja Sara yala: «Ja Dyosi yaʼunej tsenukon yuj gustoʼil, sok spetsanil ja maʼ oj yabʼye ja it ojni stseʼukone».
7 Sok cha yala: «Mini maʼ wa spensaraʼan ta ojto kayi jun skerem ja Abrahán, sok ja wego katayi jun skerem ama awelxa».
8 Ja yal keremi kʼiʼi sok yaʼakan chunel. Jaxa kʼakʼu yaʼakan chunel ja Isaac, ja Abrahán skʼulan jun niwan waʼelal.
9 Pe ja Sara yila ke ja skerem ja Agar, ja egipcia, ja skerem yayi ja Abrahán, wa skʼulan burlar ja Isaac.
10 Ja yuj tixa yalayabʼ ja Abrahán: «¡Aʼeluk ja moso ixuk it sok ja skeremi! Ja jkerem Isaac mini oj yayi ja jas wa sbʼajin ja skerem ja aʼtijum ixuk it».
11 Pe ja Abrahán jelni yaj yabʼ ja jas yala ja Sara sbʼaja skerem Ismael.
12 Anto ja Dyosi yalayabʼ ja Abrahán: «Mok tukawabʼ yuja jas wan yaljelawabʼ ja Sara sbʼaja wa keremi sok jawa moso ixuki. Maklay,* yujni ti oj eljan bʼa Isaac ja maʼ oj aljuka wintili.
13 Pe ja skerem jawa moso ixuki cha oj kakan oj el jun chonabʼ, yujni cha awintil weʼna».
14 Ja yujil, ja Abrahán sajto lek kʼe ja bʼa saʼansakbʼeli, yiʼaj pan sok jun yeʼtal jaʼ sok yayi ja Agar. Tixa ya kʼeyi bʼa stejlubʼ sok skʼumankan ja Agar sok ja skeremi. Anto ja Agar tixa waja sok ti ajyiʼekʼ bʼa desierto bʼa Beer-Seba.
15 Tsaʼan, chʼak ja yaʼali sok ja Agar tixa sjutbʼin och bʼa jun yal yibʼteʼ ja skeremi.
16 Tixa waj jun makʼeʼa, och kulan stuchʼil sok yalasb’aj: «Mi xkʼana oj kil oj chamuk ja jkeremi». Tixa kʼe okʼ tsats lek ja bʼa kulan ekʼi.
17 Anto ja Dyosi smaklay ja keremi, sok ja yanjel ja Dyos skʼuman ja Agar masan bʼa satkʼinal sok yalayabʼi: «Agar, ¿jasa kʼulan? Mok xiwan, yujni ja Dyosi wajtaskʼujol ja bʼay jawa keremi.
18 Tulubʼaj, koltay bʼa oj kʼeʼuk sok yama soka wa kʼabʼi, yujni bʼa yeʼna oj kakan ke oj el jun niwan chonabʼ».
19 Anto ja Dyosi sjamayi ja sat ja Agar sok yila jun poso bʼa jaʼ. Ja yujil, ja yeʼn tixa waj ja bʼa poso, sbʼutʼu jaʼ ja bʼa yeʼtal yiʼoji sok tixa ya yuʼ ja skeremi.
20 Sok ja Dyosi tini ajyisok ja keremi yajni wan kʼiʼeli. Ja yeʼn tini ajyiʼekʼ bʼa desierto sok yajni ekʼ ja tyempo, kʼot jun yama arko.
21 Ja yeʼn tixa waj bʼa desierto bʼa Parán, jaxa snani sleʼayi jun xcheʼum ja bʼa slujmal Egipto.
22 Ja bʼa tyempo jaw, ja Abimélec waj soka Ficol, ja olomal ja bʼa soldado, bʼa oj waj skʼumuk ja Abrahán. Yalayabʼi: «Ja Dyosi teyamok bʼa spetsanil ja jas waxa kʼulani.
23 Ja yujil, ja wego kʼapaki bʼa stiʼsat ja Dyosi ke mi oja ch’ayk’ujolukotikon, mini ja kuntikili sok mini ja yuntikil ja kuntikili. Cha kʼapaki oja jeʼ bʼa keʼna sok ja bʼa luʼum ajyelajani ja junxta yajalkʼujol mey stikʼanil je’unejawi ja keʼni».
24 Jaxa Abrahán yalayabʼi: «Wa xkʼapawi».
25 Pe ja Abrahán yayi parte ja Abimélec ke japjikanyi jun poso bʼa jaʼ yuja yaʼtijumiki.
26 Sok ja Abimélec sjakʼayi: «Mi xnaʼa maʼ skʼulan ja jaw. Pes mi bʼa jas waxa walkab’a. Sok jato wanon snajel ja wego».
27 Yajni ja Abrahán yabʼ ja jaw, tixa yiʼajan chejik, wakaxik sok yayi ja Abimélec. Sok xchawanile yaʼawe jun trato.
28 Yajni ja Abrahán spila siete snan chej,
29 ja Abimélec sjobʼoyi: «¿Jas yuj apilata siete snan chej?».
30 Jaxa Abrahán sjakʼayi: «Tʼilani oja wiʼ ja siete snan chej wanon yajelawi. Ja it ojni sjeʼ bʼa keʼn jokʼunej ja poso».
31 Ja yuj ja lugar jaw, ja Abrahán ya sbʼiʼiluk Beer-Seba,* yujni ti yaʼawe jun kʼapjelal xchawanile.
32 Jachuk yaʼawe jun trato ja bʼa Beer-Seba. Tsaʼan, ja Abimélec kumxi ja bʼa slujmal ja filisteoʼik sok ja Ficol, ja olomal ja bʼa soldadoʼi.
33 Sok ja Abrahán stsʼunu jun steʼil tamarisco ja bʼa Beer-Seba sok ti stoyo tiw ja sbʼiʼil ja Jyoba, ja Dyos maʼ sakʼan bʼa tolabida.
34 Jaxa Abrahán ti kan* jitsan tyempo* ja bʼa slujmal ja filisteoʼik.
