2 Timoteo 2:1-26
2 Ja yujil kala kerem, moka wakan stsatsankʼujolajelabʼaj soka lekil kʼujolal mi xbʼajintik tey bʼa Kristo Jesús.
2 Sok jaxa jastik awabʼ bʼa keʼn sok b’a cha yalawe jitsan testigoʼik, akanyi bʼa skʼabʼ winike bʼa toj aye, sok jachuk ja yeʼnleʼi chapan oj ajyuke bʼa oj sjeʼeyi ja tuki.
3 Jastal jun lekil soldado bʼa Kristo Jesús, kʼulan aseptar ja wokolik tʼilan oj ekabʼaji.
4 Mini jun soldado wa xchʼika sbʼaj ja bʼa negosyoʼik* ja bʼa sakʼanil it ta wa skʼana oj ya gustoʼaxuk ja maʼ aji ochyuj soldadoʼili.
5 Asta ja bʼa tajneliki, ja tajnumi mini x-ajiyi ja premio* ta mi xtajni ja jastalni ay ja reglaʼiki.
6 Ja tsʼunbʼanum bʼa jel tsats x-aʼtiji tʼilani yeʼn bʼajtan oj yabʼ ja sati.
7 Pensaraʼan tikʼan ja bʼa jas wanon yaljeli; ja Kajwaltiki oj ya wabʼ stojolil* yibʼanal ja jastik junuki.
8 Ajuluka kʼujol ke ja Jesukristo aji kʼeʼuk ja bʼa chamwiniki sok wajni yintil ja David, soka it jani ja lekil rasonik wa xcholo,
9 sok ja yuj wanon yijel wokol sok lutanon preso jastal june maʼ ay smul. Pe ja yabʼal ja Dyosi mini maʼ xbʼobʼ stime.
10 Ja yuj wan kuchelkuj yibʼanal yuja matik tsaʼubʼaleʼi, bʼa jachuk ja yeʼnleʼi oj cha staʼ ja skoltajele yuja Kristo Jesús sok cha jachuk ja slekilale bʼa tolabida.
11 Ja yaljelik it wani xbʼobʼ kʼuʼaxuk lek: ta chamtik soka yeʼn, cha ojni ajyukotik sakʼan soka yeʼni;
12 ta wa xkuchkujtik,* cha ojni katik mandar soka yeʼn; ta wa xkalatik mi xnaʼatik sbʼaj, ja yeʼn oj cha yal mi snaʼa jbʼajtik;
13 ta mi toj la ajyitik, ja yeʼn tojni oj ajyuk, yujni mi xbʼobʼ sjom sbʼaj ja jastal mero kʼoteli.
14 Moka wakan yajel julskʼujole ja jastik it sok yajelyile ja tojelalik it* bʼa stiʼ sat ja Dyos bʼa mok tiroʼanuke yuj yaljelik, pes ja it mini xmakuni, yujni wa xyajbʼesjiye* ja matik wa xyabʼyeʼi.
15 Kʼulan spetsanil ja janekʼ wa xbʼobʼawuji bʼa oj ajyan ja bʼa stiʼ sat ja Dyos jastal june maʼ lek ilubʼal, jun aʼtijum bʼa mi jas oj kʼixwukyuj, bʼa wa xya makunuk toj lek ja Yabʼal ja Dyosi.*
16 Mokni akis ja yaljelik mi xmakuni bʼa wa xyijnay ja jas saki, yujni ja it masto oj ikʼwanuk bʼa mi oj kisxuk ja Dyosi,
17 sok ja jas wa xyalaweʼi jachni oj spuk sbʼaj jastal wa x-och kʼaʼuk ja bʼakʼtelali.* Jani it ja jas ekʼ sbʼaje ja Himeneo sok ja Fileto.
18 Ja winike it spilata sbʼaje ja bʼa smeranili, wani xyalawe ke ajyitabʼi ja sakʼwelali, sok wane sjomjel ja skʼuʼajel yiʼoje jujuntik.
19 Ama jachuk, mini snika sbʼaj ja jas jel yij yaʼunej kujlajuk ja Dyosi sok ayni yiʼoj ja seyo it: «Ja Jyoba* wa snaʼa sbʼaj ja matik sbʼaji», sok «Spetsanil ja maʼ wa spatayi skʼujol ja Jyoba* bʼa sbʼiʼil wani xyaʼakan ja bʼa jas mi tojuki».
20 Pe bʼa jun niwan naʼits mi kechan ay jastik* bʼa oro sok bʼa plata, cha ayni jastik bʼa teʼ sok bʼa barro. Jujuntik wa x-axi makunuk bʼa jun modo chaʼanyabʼalil sok jaxa tuki bʼa jun modo mi chaʼanyabʼaliluk.
21 Ja yuj ja maʼ mi mojanuk wa x-ajyi ja bʼa jastik tsaʼan it ojni kʼot jun jasunuk* bʼa oj axuk makunuk bʼa jun modo chaʼanyabʼal, bʼa sak, bʼa oj makunuk yuja swinkili sok chapan ay bʼa oj skʼul tuktukil tikʼe lekil aʼtel.
22 Ja yuj paka ajnel ja bʼa jastik wa xkʼankʼuniyuj ja keremtik soka akʼixuki sok leʼa ja jas toji, ja skʼuʼajeli, ja yajalkʼujol sok ja lamanili, sok leʼa lajan soka matik wa spataweyi skʼujol ja Kajwaltik jach sok jun skʼujole bʼa sak.
23 Chomajkil, moka kis ja k’e’el kʼumal mi xmakuni sok bʼa mey sbʼeji, pes wani xa naʼa wa snika tiro.
24 Ja smoso ja Kajwaltiki mini tʼilanuk oj tiroʼanuk, pes tʼilani oj sjeyi lekil smodo ja tuk, chapan oj ajyuk bʼa sjejel, skomjel sbʼaj ja yajni mi lek wa x-ilji
25 sok kʼunxta* a-sjeyi ja matik mi xyaʼa sbʼajeʼi. Bʼobʼta ja Dyos oj ya sutxuk skʼujole* bʼa jachuk oj ijuke och bʼa jun meran snajelil sbʼaja smeranili,
26 sok jachuk oj snaʼe kʼinal sok oj eluke libre sbʼaja strampa ja Dyablo, pes yujni sakʼan yamubʼalekan bʼa oj skʼuluke ja jas wa skʼana.
Notaʼik
^ Ma bʼobʼta «ja bʼa jas wa xkʼulaxi kada kʼakʼu».
^ Jach kanel ja bʼa griego: «korona».
^ Ma «oj ya wabʼ stojol ja stukil».
^ Ma «ta mi xkaʼatikan kuchelkujtik (tekʼxelkujtik)».
^ Ma «xcholjel yabʼye tsʼikan lek».
^ Ma «wa xjipjiye luʼum», «wa xjomjiye».
^ Jach kanel ja bʼa griego: «ja yabʼal bʼa smeranili».
^ Ma «gangrena».
^ Kʼela ja bʼa Yaljelik cholubʼal.
^ Kʼela ja bʼa Yaljelik cholubʼal.
^ Ma «oxomik».
^ Ma «jun yamkʼabʼal», «jun oxom».
^ Ma «mansoxta».
^ Ma «oj yakan bʼa oj tukbʼuk ja smodoʼe».
