Marcos 13:1-37
13 Yajni ja yeʼn elumxa ja b’a templo, june ja snebʼumaniki yala yabʼi: «Maestro, ¡kʼela! ¡Jel tsamal ja toniki sok ja naʼitsiki!».
2 Pe ja Jesús yala yabʼi: «¿Wan maʼ xa wila ja niwak naʼitsik it? Ja ili mini jun ton oj kan latsan. Ojni chʼak jemuk».
3 Yajni ti kulan ekʼ ja bʼa wits Olivo sok ti wa xkan bʼa stiʼ sat ja templo, ja Pedro, ja Santiago, ja Juan sok ja Andrés ti sjobʼoweyi nakʼul:
4 «Alakabʼtikon, ¿jas ora oj ekʼuk ja jastik jaw, sok jas senyaʼil oj ajyuk yajni ojxa eljul ja xchʼakulabʼil yibʼanal ja jastik jaw?».
5 Ja yuj ja Jesús kʼe yalyabʼye: «Talnabʼajik. Mok maʼ sloʼlayex.
6 Jitsan oj jakuke yajel makunuk ja jbʼiʼili sok oj yal-e ‹Keʼnon ja Kristo›, sok ojni sloʼlaye jitsan kristyano.
7 Chomajkil, yajni xa wabʼyex yabʼalil guerraʼik bʼa tuktukil lugar, mok xiwanik, yujni oj ekʼuk ja jastik junuk it, pe mitoni jaʼuk ja chʼakelali.
8 Yujni yeʼnta oj tiroʼanuke ja chonabʼiki sok yeʼnta oj tiroʼanuke ja gobyerno jumasaʼ, sok oj ajyuk terremotoʼik bʼa tuktukil lugar; cha ojni ajyuk waʼin. Ja it jani ja skʼeʼulabʼil ja niwak wokoliki.*
9 Jaxa weʼnlexi, talnabʼajik. Oj ajanik bʼa skʼabʼ ja juesik bʼa lugari sok oj makʼjanik ja bʼa naʼitsik wa stsomo sbʼajeʼi, sok oj tʼenjanik bʼa oj wajanik bʼa stiʼ sat ja mandaranumik sok ja reyik yuja jbʼiʼili. Jachuk oj makunuk bʼa oj kʼot snaʼe jbʼaj ja yeʼnleʼi.
10 Chomajkil, tʼilani oj cholxuk bʼajtan ja lekil rasonik bʼa yibʼanal ja chonabʼiki.
11 Pe yajni xyiʼajex bʼa oj yaʼex bʼa skʼabʼe ja matik ay xcholi, mok ochuka pensarex ja jas oja walexi; alawik ja jas oj ajuka naʼex ja bʼa jutsʼin jaw, yujni mi weʼnlukex ja maʼ oj kʼumanuki, jani ja yip ja Dyosi.*
12 Chomajkil, ja kristyano oj yaʼ ja yermano bʼa oj miljuk, cha jachni ja tatal soka skeremi, jaxa untiki oj skontraʼuke ja snantateʼi sok oj yaʼe miljel.
13 Spetsanile ja kristyano oj yilkʼujolukex yuja jbʼiʼili. Pe ja maʼ wa xkuchyuj* man xjak ja chʼakelali ojni staʼ skoltajel.
14 Ja yujil, yajni xa wilawex ti tekʼan ekʼ ja bʼa lugar mi xbʼobʼ ajyuki ja jas jel kistal juntiro sok wa xchʼakwani (bʼa oj abʼxuk stojol ja it, ja maʼ wan skʼumajeli* akan spensaraʼuk lek), anto ja matik tey bʼa Judea a-spake ajnel bʼa witsaltik.
15 Ja maʼ tey bʼa olom naʼitsi, mok koʼkon sok mok ochuk bʼa ay jas oj ya eluk ja bʼa snaji,
16 jaxa maʼ tey bʼa alaji, mok kumxuk ja bʼa jastik yaʼunejkani bʼa slejel ja spal kʼuʼi.
17 ¡Ajula sbʼaje ja ixuke matik embarazada ayeʼi sok ja matik wanto xyawe chunuk ja yalatse ja bʼa kʼakʼujik jawi!
18 Moka waʼexkan skʼanjel bʼa orasyon bʼa mi oja pakex ajnel bʼa styempoʼil invierno.*
19 Yujni ja bʼa kʼakʼujik jaw skʼakʼujik wokol. Man kʼejan ja luʼumkʼinali, bʼa yeʼn skʼulan ja Dyosi, man wego, mini bʼa ajyel jun wokol jastal jaw, sok cha mixa oj ajyuk.
20 Lekbʼi ja Jyoba* mi xya kʼot tʼan tekʼan ja tyempo jaw, mini maʼ* oj staʼ skoltajel. Pe yuja matik tsaʼubʼali, ja matik stsaʼunej ja yeʼni, oj ya kʼot tʼan tekʼan* ja tyempo jawi.
21 Chomajkil, ta ay maʼ xyalawabʼyex ‹¡Kʼelawik, tey il ja Kristo!› ma ‹¡Kʼelawik, tey il oche!›, moka kʼuʼukex.
22 Yujni oj ajyuk kristoʼik mi meranuk sok alumanik mi meranuk sok oj skʼuluke milagroʼik* sok jastik jel cham yiljel bʼa slejel modo sloʼlajel ja matik tsaʼubʼali.
23 Ja yuj talnabʼajik. Ja keʼn bʼajtanxa kaluneja wabʼyex yibʼanal ja jastiki.
24 Pe ja bʼa kʼakʼujik jaw, yajni x-ekʼ ja wokol jawi, ja kʼaʼuji ojni kʼikʼbʼuk, jaxa luna mi oj ijlabʼanuk,
25 ja kʼanaliki oj mokʼukekon ja bʼa satkʼinali jaxa jastik ay ja bʼa satkʼinali oj nijkuk.
26 Anto oj yil-e ja Yunin ja Winik* jakum bʼa sat ason sok jitsan ipal sok toyjelal.
27 Jaxa yeʼn oj sjek ja yanjelik sok oj stsom ja matik tsaʼubʼale masan bʼa xchanil xchikin ja luʼumi, masan bʼa xchikin ja luʼumi man bʼa xchikin ja satkʼinali.
28 Nebʼawik ja slajelal it sbʼaja steʼil higo. Yajni wa x-och yaʼawbʼuk ja skʼabʼi sok wa x-el spowil, ja weʼnlexi waxa naʼawex mojanxa ja styempoʼil jaʼi.
29 Junxta ja weʼnlexi, yajni xa wilawex wan ekʼel ja jastik it, naʼawik ja yeʼn mojanxa ay, jaʼi, tixa ay bʼa puerta.
30 Wa xkalawabʼyex meran lek: ja lame kristyano it mini tʼun oj chʼayuk masan xchʼak ekʼuk yibʼanal ja jastik junuk it.
31 Ja satkʼinal sok ja luʼumi oj chʼayuke, pe ja jas wa xkala mini nunka oj chʼayuk.
32 Sok sbʼaja kʼakʼu jaw sok ja ora jawi, mini maʼ snaʼa, mini ja anjelik bʼa satkʼinali, cha mini ja Uninali; kechani ja Tatali.
33 Kʼelan jakan ajyanik, mok ochuka wayelex, yujni mixa naʼawex jas ora ja tyempo tsaʼubʼali.
34 Ja it jach jastal jun winik waj bʼa jun najtil lugar, sok yajni yaʼakan ja snaji, yakanyi bʼa skʼabʼe ja smosoʼiki sok yakanyi yaʼtele kada jujune, cha yakanyi mandar ja talna puerta bʼa aʼajyuk tolabida kʼelan jakan.
35 Ja yuj tolabida kʼelan jakan ajyanik, yujni mixa naʼawex jas ora oj jakuk ja yajwalil ja naʼitsi, bʼa och akwal ma nalan akwal ma ja yajni x-okʼ ja gallo ma bʼa sajto sakbʼel.
36 Bʼaxama lek wanex wayel staʼawex ja yajni junta chʼaykʼujol xjaki.
37 Ja jas wa xkalawabʼyex ja weʼnlexi, wa xkalayabʼye yibʼanale: ajyanik tolabida kʼelan jakan».
Notaʼik
^ Ja it jach jastal ja syajal wa xyabʼ jun ixuk yajni ojxa pojkuk (manxuk) ja yalatsi.
^ Ma «espíritu santo». Ja bʼa griego, pnéuma. Kʼela ja bʼa Yaljelik cholubʼal, Rúaj; Pnéuma.
^ Ma «ja maʼ kuchelyuj (tekʼxelyuj)».
^ Wa xkʼan alxuk, ja maʼ wan skʼumajel ja jas stsʼijbʼankan ja Daniel.
^ Ja bʼa Israel wa xyaʼa jaʼ sok wa xkoʼ teʼew ja bʼa styempoʼil invierno sok wokolni elel biaje.
^ Kʼela ja bʼa Yaljelik cholubʼal.
^ Jach kanel ja bʼa griego: «mini jun bʼakʼtelal».
^ Jach kanel ja bʼa griego: «ja yeʼn ya kʼot tʼan tekʼan».
^ Jach kanel ja bʼa griego: «senyaʼik».
^ Kʼela ja bʼa Yaljelik cholubʼal.
