ʻOku ʻikai ha toe veiveiua ko e Tohi Tapú ko e tohi ʻiloa taha ia ʻi he māmaní. Ko e hā hono ʻuhingá? Ko e meʻa ʻe taha, ʻoku faingofua hono mahinoʻi iá. ʻOku ʻi ai ʻa e ngaahi hokosia moʻoni ʻa e kakai moʻoni mo ʻenau fakafeangai ʻiate kinautolu pea mo e ʻOtuá. Ko e ngaahi fakamatala ko ení ʻoku akoʻi ai ha ngaahi lēsoni ʻaonga ʻo ngāueʻaki ha ngaahi lea faingofua mo fakahangatonu ʻa ia ʻe lava ke liliu ki he ngaahi lea ʻe lauingeau pea mahinoʻi ia ʻe he kakai ʻoku nau nofo ʻi ha feituʻu pē pe ko ha faʻahinga vahaʻa taimi pē. Pea ko e ngaahi tefitoʻi moʻoni Fakatohitapú ʻoku ʻaonga maʻu pē ia.

Ko e mahuʻinga tahá, ʻoku taukaveʻi ʻe he Tohi Tapú ʻoku ʻikai ko ha tohi pē ia ʻoku fekauʻaki mo e ʻOtuá ka ko ha tohi foki ia mei he ʻOtuá. ʻOku fakahā ai ʻa e huafa ʻo e ʻOtuá, ko hono ʻulungāngá mo ʻene taumuʻa taʻealaliliu ʻi hono fakatupu ʻa e māmaní mo e faʻahinga ʻo e tangatá. ʻOku toe lave foki ʻa e Tohi Tapú ki he fāinga fakahisitōlia ʻi he fepaki ʻa e leleí mo e koví: ko ha tulama fakatoʻoaloto mo fakaʻuniveesi fakataha mo ha ikuʻanga fakafiefia. Ko hono lau ʻa e Tohi Tapú mo ha fakakaukau fakamātoato, ʻoku fakatoka ai ʻa e makatuʻunga ki he tuí mo e ʻamanakí.

ʻI he Tohi Tapú, ʻoku tau maʻu ai ʻa e fakamatala ʻoku ʻikai toe ala maʻu ia ʻi ha feituʻu kehe. Ko e fakatātaá, ʻoku tala mai ʻe he Tohi Tapú ʻa e moʻoni fekauʻaki mo e ngaahi tuʻunga-lea hangē ko ení:

• Feituʻu ʻoku tau haʻu mei aí mo e ʻuhinga ʻoku tau faingataʻaʻia aí

• Fokotuʻutuʻu ʻa e ʻOtuá ke fakatauʻatāinaʻi ʻa e faʻahinga ʻo e tangatá

• Meʻa kuo fai ʻe Sīsū maʻa kitautolú

• Kahaʻu ʻo e māmaní mo e tangatá

Ko e hā ʻoku ʻikai ke vakai nounou ai ki he ngaahi peesi hokó pea fakakaukau pe ko e hā ʻoku fekauʻaki mo e Tohi Tapú?