Ko e hā e tupuʻanga ʻo e talatupuʻá?

“Ko e muʻaki kau filōsefa Kalisitiané naʻa nau ohi ʻa e foʻi fakakaukau faka-Kalisi ʻo e taʻefaʻamate ʻa e laumālié mo e fakakaukau naʻe fakatupu ʻe he ʻOtuá ʻa e laumālié pea fakahū ia ki he sinó ʻi he tuʻituʻiá.”—The New Encyclopædia Britannica (1988), Voliume 11, peesi 25.

Ko e hā e lau ʻa e Tohi Tapú? “Ko e laumalie ʻoku fai angahala ko ia ia ʻe mate.”—Isikeli 18:4.

ʻI he fekauʻaki mo e fakatupu ʻo e ʻuluaki laumālie fakaetangatá, ʻoku pehē ʻe he Tohi Tapú: “Nae gaohi e Jihova koe Otua ae tagata mei he efu oe kelekele, bea ne manava ki hono avaʻi ihu ae manava oe moui; bea hoko ae tagata koe laumalie moui [faka-Hepelū, neʹphesh].”—Senesi 2:7, PM.

Ko e foʻi lea faka-Hepelū ko e neʹphesh, naʻe liliu ko e “laumalie,” ʻoku ʻuhinga iá ‘ko ha meʻamoʻui ʻoku mānava.’ ʻI he taimi naʻe fakatupu ai ʻe he ʻOtuá ʻa e ʻuluaki tangatá, ʻa ʻĀtama, naʻe ʻikai te ne fakahū kiate ia ha laumālie taʻefaʻamate ka ko e ivi moʻui ʻa ia ʻoku fakatolongaʻaki ʻa e mānavá. Ko ia ai, ko e “laumalie” ʻi he ʻuhinga Fakatohitapú ʻoku ʻuhinga iá ki he meʻamoʻuí kakato. Kapau naʻe fakamavaheʻi mei he ivi moʻui naʻe muʻaki foaki ʻe he ʻOtuá, ʻe mate ʻa e laumālié.—Senesi 3:19; Isikeli 18:20.

Ko e tokāteline ʻo e taʻefaʻamate ʻa e laumālié kuo langaʻi hake ai ʻa e ongo fehuʻi: ʻOku ʻalu ki fē ʻa e laumālié ʻi he hili ʻa e maté? Ko e hā ʻoku hoko ki he laumālie ʻo e kau fulikivanú? ʻI hono ohi ʻe he kau Kalisitiane lau peé ʻa e talatupuʻa ʻo e laumālie taʻefaʻamaté, naʻe taki atu ʻe he meʻá ni ke nau tali ha toe talatupuʻa ʻe taha—ko e akonaki ʻo e afi ʻo helí.

Fakafehoanaki ʻa e ngaahi veesi Tohi Tapu ko ení: Koheleti 3:19; Mātiu 10:28; Ngāue 3:23