Ngaahi Fehuʻi mei he Kau Lautohí

ʻI heʻene tohi ki he kau Hepeluú, naʻe lave ai ʻa e ʻapositolo ko Paulá ki he “hilifaki oe nima.” Naʻá ne ʻuhingá ki hono fakanofo ʻo e kau mātuʻá pe ki ha meʻa kehe ia?—Hep. 6:2, PM.

ʻOku ʻikai ha ʻuhinga ia ke fakamatematē, ka ʻoku ngalingali naʻe ʻuhinga ʻa Paulá ki he hilifaki nima ke foaki ʻa e ngaahi meʻaʻofa ʻo e laumālié.

ʻOku ʻi ai ʻa e lave ʻa e Tohi Tapú ki he hilifaki nima ʻi he fekauʻaki mo e ngaahi fakanofo fakateokalatí. Naʻe “hilifaki nima” ʻa Mōsese kia Siosiua ʻi heʻene fakanofo ia ko hono fetongí. (Teu. 34:9) ʻI he fokotuʻutuʻu faka-Kalisitiané, ko e kau tangata taau ʻe niʻihi naʻe fakanofo kinautolu ʻaki ʻa e hilifaki nimá. (Ng. 6:6; 1 Tim. 4:14) Naʻe faleʻi ʻa Paula ke ʻoua ʻe hilifaki nima fakavaveʻi ha tangata.—1 Tim. 5:22.

Kae kehe, naʻe enginaki ʻa Paula ki he kau Kalisitiane Hepeluú ke nau “fai atu [pe tuiaki atu] ki he haohaoa” pe matuʻotuʻá he ko ʻeni kuo nau hiki atu mei he “gaahi uluaki akonaki.” Naʻá ne hiki fakahokohoko leva ʻa e “fakatomala mei he gaahi gaue mate, bea mo e tui ki he Otua, ae akonaki oe gaahi babitaiso, moe hilifaki oe nima.” (Hep. 6:1, 2, PM) ʻE hoko nai ʻa e fakanofo ʻo e kau mātuʻá ko ha meʻa ʻuluaki pē ia ʻoku totonu ke tuiaki atu mei ai ʻa e kau Kalisitiané? ʻIkai. Ko e hoko ko ha mātuʻa ʻi he fakatahaʻangá ko ha taumuʻa ia ʻoku totonu ke kakapa atu ki ai ʻa e fanga tokoua matuʻotuʻá pea nau houngaʻia leva ai.—1 Tim. 3:1.

Ka naʻe ʻi ai hano toe ngāueʻaki ʻe taha ʻo e hilifaki nimá. ʻI he ʻuluaki senitulí, naʻe siʻaki ʻe Sihova ʻa ʻIsileli fakakakano ʻi hono tuʻunga ko ʻene kakaí kae hōifua ia ʻi he ʻIsileli fakalaumālié, ʻa e fakatahaʻanga ʻo e kau Kalisitiane paní. (Mt. 21:43; Ng. 15:14; Kal. 6:16) Ko e ngaahi tokonaki fakaemana ʻo e laumālié, ʻo hangē ko e lea ʻi he lea kehekehé, naʻá ne ʻomi ʻa e fakamoʻoni ʻo e liliu ko iá. (1 Kol. 12:4-11) ʻI he hoko ʻa Koliniusi mo hono falé ʻo tuí, naʻe maʻu ʻe he faʻahinga foʻou ko ʻení ʻa e laumālie māʻoniʻoní, ʻa ia naʻe hā ʻi heʻenau “leaʻaki ʻa e ngaahi lea kehekehe.”​—Ng. 10:44-46.

ʻI he taimi ʻe niʻihi, naʻe foaki ʻa e ngaahi meʻaʻofa fakaemaná ʻo fakafou ʻi he hilifaki nimá. ʻI he taimi naʻe malangaʻi ai ʻe Filipe ʻa e ongoongo leleí ʻi Samēliá, naʻe papitaiso ʻa e tokolahi. Naʻe fekauʻi ʻe he kulupu pulé ʻa e ongo ʻapositolo ko Pita mo Sioné ki ai. Ko e hā hono ʻuhingá? ʻOku tau lau: “Pea na toki hilifaki hona nima [ki he kakai naʻe toki papitaisó], pea nau maʻu ʻa e Laumālie Maʻoniʻoni.” Kuo pau pē naʻe ʻuhinga iá naʻá na maʻu ʻa e ngaahi meʻaʻofa ʻo e laumālié, ʻa e ngaahi malava naʻe lava ke sio ki ai ʻa e kakaí. ʻOku tau ʻiloʻi ʻeni koeʻuhi ko Saimoné, ʻa ia naʻá ne faʻa angaʻaki ki muʻa ʻa e tōʻonga fakafaimaná, naʻá ne sio ki he ngāue ko ʻeni ʻa e laumālié peá ne feinga mānumanu ke ne fakatau ʻa e malava ke hilifaki nima ki he niʻihi kehé ke foaki ʻa e laumālie māʻoniʻoní ke nau malava ai ke fakahoko ha ngaahi mana. (Ng. 8:5-20) Ki mui ai, naʻe papitaiso ai ʻa e toko 12 ʻi ʻEfesō. ʻOku tau lau: “ʻI he hilifaki ʻe Paula hono nima kiate kinautolu, naʻe hoko hifo kiate kinautolu ʻa e Laumālie Maʻoniʻoni; pea nau kamata lea ʻaki ʻa e ngaahi lea kehekehe mo palofisai.”—Ng. 19:1-7; fakafehoanaki mo e 2 Timote 1:6.

Ko ia ai, ʻi he Hepelu 6:2, ʻoku pau pē naʻe ʻuhinga ʻa Paulá ki he hilifaki nima ke foaki ʻa e ngaahi meʻaʻofa ʻo e laumālié ki he faʻahinga foʻou naʻe tuí.