Tea mandrambe ambahiny ty ndaty a Meksika agne. Tamy ty taogne 1917 ro nanomboke nitory tamy iareo ty mpianatse Baiboly Iraisam-pirenena, i tokavegne tihoe Vavolombelo i Jehovah rey. Am-polo’e taogne tafara izay, le ndaty liagne an-jato’e ty nanjare mpanompo i Jehovah. Faie tagnate i aly lahibey faharoey, le rinara ty fanjakagne ta Meksika tao ze toeragne itoriantika naho ivoriantika.

 Rehafe ty lalàna tagne tamy izay fa amo o tragnom-panjakagneo agne avao ty azo anoagne fanompoam-pivavahagne hoahy ty ndaty maro. Ni-olagne hoantikagne ze raha zay satria ty havoriambey fataontikagne zao, le natao amy ty toeragne malalake bey, le ty fivoriantikagne ka natao tan-tragno o ndatio agne. Le itika mitory an-dalagne ey sady mitory isan-tragno.

 Mba hankatoavagne i lalànay areke, le nisorategne ho fikambanagne sivily naho ara-kolontsaigne tsy natao hipaliam-bola ty fikambanantika tamy ty taogne 1943. Nampianatse o ndatio mba hagnasoa ty fiaigna’e o fikambanagne iohoe. Noho itika voasoratse ara-panjakagne tie fikambanagne ara-kolontsaigne, le zo mifagnarake amy izay ty anagnantikagne fa tsy zo ty fivavahagne. Tsy voatere ho amy ty tragnom-panjakagne avao areke ty ivoriantika naho ty itoriantika.

 Mba hahafahagne mahafeno fepetse ho fikambanagne sivily naho ara-kolontsaigne areke, le nandamigne fandaharagne ara-kolontsaigne naho fandaharagne natao mba hampianaragne o ndatio tika. (Romanina 13:1) Trea boake amy izay fa ty hagnampe o ndatio hahatrea i hamarenagne agnate Baiboly aoy ty tanjontikagne. (Isaia 48:17, 18) Tsiela tafara izay, le nitrea fa nitahie i Jehovah o fanapahan-kevetse nirambesentikagne iohoeke. Maro amy ty Vavolombelogne agne ro mitantara fa noho i fanapahan-kevetse ignehoeke, le nihamaro ty ndaty nanompo i Jehovah.

 Ty hitory i talily soa i Fanjakagney ty asa tena nataontika ta Meksika agne amparake izay. Faie nanahake i apostoly Paoly tika, le nagnova ty fomba fitoriantika mifagnarake amy ty raha misy. (1 Korintianina 9:20-23) Tsy nirehake mivantagne miomba ty Soratse Masigne zao ohatse reke naho fa nitory tamo o Atenianao, tamy i Areopaogoy eo. (Asan’ny apostoly 17:22-31) Hoe izay ka ty nataontika ta Meksika agne. Naho fa nanombo-drehake tamo o ndatio tika, le tsy ninday Baiboly sady tsy nirehake raha boake ao.

 Hoe ty Isabel: “Nirehake amy i ndatỳ zahay tie boake amy ty fikambanagne raike ara-kolontsaigne sady mampianatse o ndatio. Mateteke raho ro mirehake lahatsoratse boake amo o Mifohazao! ao satria tsy le mirehake mivantagne miomba ty Baiboly ty lahatsoratse ao.” Ie i ndatỳ trea tie liagne amy ty Baiboly vaho izay irehafagne raha boake ao. Izao ty nihazavae i Aurora: “Tsy maintsy nitadidy andinin-teny maro zahay satria tsy nanday Baiboly naho fa nitory.” Toe fale ka i ndatỳ naho fa ty Baiboli’e ty ampiasaegne.

 Fa niomagne mialoha tika amy ty havale ze ndaty magnontane tie ara-dalàna vao sa tsy ara-dalàna ty asantika. (Filipianina 1:7) Tena nagnampe antikagne ka i karatse famantaragne boake amo o fanjakagneoy. a Hoe ty María: “Tsy nisarake ama’ay i karatse famantaragne nisy sonia boake amy ty Minisitse ty Raharaham-bahinỳ.” Izao ka ty nirehafe i Samuel: “Le fa i karatsey avao ty nakare’ay naho fa nisy manam-pahefagne nanakagne naho nagnadihady ty raha natao’ay.”

 Nagnampe antikagne avao ka i karatse famantaragney naho fa nisy fanoheragne. Nitantara hoe izao ohatse ty rahalahy Jesús, nanompo ta Jalisco agne: “Nindese ze mopera raike mpitarike ndaty mpigoreve zay amo o manam-pahefagneo agne raho naho ze mpirovaly Vavolombeloagne raike zay. Noho izahay tsy tea’e hanao i asa fitoriagney ty anto’e. Natoro’ay i manam-pahefagne rey i karatse famantaragney, le tsy nahoa iareo sasa zahay. Nahazo fagnampeagne ara-pitsaragne zahay tafara izay, le mbe niafake nagnampe ty ndaty liagne tao. Nanjare maro ty fiangonagne agne tie amy izao.”

 Nampianatse namaky teny naho nanoratse o ndatio ka tika satria fikambanagne sivily mampianatse ndaty. b Hoe ty Ariel: “Tena niavy tamy ty fotoagne nipaliavagne aze ze fandaharagne zay. Tamy izay, le maro ty ndaty tsy nandia lakilasy faie te hamaky Baiboly. Nampianare’ay mamaky teny heike areke iareo. Ie fotoagne kede tafara izay, le nimaro tamy iareo ty nanjare nianatse Baiboly.”

 Izao ty nitantarae i Ruth: “Le vata’e tena nifale iareo naho fa nahay namaky teny naho nanoratse sady nahatsapa ho nahavita raha lahibey. Iareo aza vata’e vaho nanomboke nahay nonognogne rehake, le avy le fa nandroso ty fianara’e Baiboly. Tena nitrea’ay ty fandrosoa iareo naho ty nahavy iareo nanjare niharine i Jehovah.”

 Tam-pagnivoa ty taogne 1943 hatrake amy 1993, le nekégne ara-dalàna ho fikambanagne sivily naho ara-kolontsaigne ty Vavolombelo i Jehovah. Tamo o fotoagne iohoe, le ndaty eo ho eo amy ty 127 000 ty nampeantika mba hahay hamaky teny naho manoratse, le 37 000 ty isa ty ndaty nampeantika mba hagnasoa ty fahaia’e mamaky teny naho manoratse. Nidera antikagne o fitondram-panjakagneo noho ze raha nataontikagne zay. (Romanina 13:3) “Niasa mafe zao ohatse tika mba hampianaragne o ndatio hahay hamaky teny naho hanoratse. Tam-polo’e taogne ty nanoantika izay. Voka’e, nahazo marem-pankasitrahagne manokagne tika tamy 2010 satria nahavy ty fiaigna ty ndaty agnarivo’e ta Meksika ao hihasoa zay.”

 Tinoka tihoe Efitragno Fanoagne Fianaragne Ara-kolotsaigne ty toeragne fivoriagne tamy izay satria tika fikambanagne sivily. Natao manahake ty pozy o lakilasio ty pozi’e, le tao ty nanoagne fivoriagne naho fianaragne mamaky teny naho manoratse.

 Izao ty nihazavae i Ángel: “Tamy ty tragno ty rahalahy ila’e ty nanoagne i fianaragne rey. Tena nahafinaritse ahy i mpiara-manompo reihoeke. Tsy tihoe mpagnarivo iareo, faie le hamake nagnomey ty efetse ila’e amy i tragno iareoy, le ty mbagnila’e avao ty nitoboha iareo. Niafy tao iareo ndra tie maro aza ty isa iareo.”

 Tena nilaegne ze fahafoizan-tegna nanagna i mpiara-manompo rey zay. Izao indraike ty rineha i Ángel: “Kindraike le maro ty ndaty avy mivory. Noho izay le maro ka ty tsy maintsy mitsangagne an-tane ao. Tsy maintsy nitilihitse an-dafinety eo ka zahay naho fa hagnomey toin-drehake. Ndra tie teo iaby ze raha rey zay, le tena nahafinaritse i fivoriagney.”

 Tsy nihira sady tsy nivavake i Vavolombelogne rey naho fa nivory. Hoe ty Edmundo: “Mateteke i rahalahy nanao lahajaka Ara-kolontsaigney ndra lahateny hoahy ty ndaty maro tie amy izaoy, ro nagnasongadigne fampiharagne boake amy ty andinin-teny agnate Baiboly ao mba hagnampeagne i mpagnatrekey hagnasoa ty fiaigna’e naho hanjare ho ndaty vagnogne.” Faie akore ty hamantara i mpagnatrekey tie ty andinin-teny manao akore ty rehafe i mpizakay? Izao ty ohatse nimea i Manuel: “Naho ty Apokalypsy toko faha-21, andine’e faha-3 naho faha-4 zao ohatse ty tea’e horehafegne, le nirehake reke tie ty Boke faha-66, 21, 3 naho 4.” Nirehake ka ty rahalahy raike atao tihoe Moises tie: “Tsy maintsy nianara’ay tie boke fahafire iaby i boke agnate Baiboly ao rey fa naho tsy izay, le tsy arake tie ty andinin-teny manao akore o vakie i mpizakay zao.”

 Amy ty ankapobei’e, le mitovy amy ty toe fa fatao i fandaminagne amy ty toeragne hafa agne avao ka ty atao’e a Meksika agne. Ndra tie fetraegne avao aza ty raha azontikagne atao, le trea tie mitahy ty vahoa’e ty Jehovah. Tamy ty taogne 1943 zao, le mpitory miiake 1 565 ty nisorategne ho agnisa ty fikambanagne sivily. Ie tamy ty taogne 1993, le nekégne ho ara-dalàna fa fivavahagne tika. Tamo o taogne iohoe avao ka le nahatratse ho 366 177 ty isa ty mpitory tagne. Vao mainke nitombo areke ty isa ty vahoa i Jehovah noho ty asa mafe natao o mpitory rehoeke. Tamy 2021 zao ohatse, le fa 864 633 ty isa ty mpitory ta Meksika agne. Ino ty lesogne rambesentikagne boake amy ty tantarantikagne agne?

 Manoa fagnovàgne mifagnarake amy i raha sarotse atrehe’oy. Noho itika nanao izay ta Meksika agne, le nanjare afake nanao i asantikagney ara-dalàna avao tika tagnate ty 50 taogne. Izao ty nirehafe i Mario: “Nisy fotoagne raho nieretseretse tie nagnino zahay ie tsy afake manompo i Jehovah manahake ty mpanompo’e ila’e an-toeran-kafa agneo. Faie mbe tsy naharey raho tie nisy nisalasala miomba ty tari-dalagne mea i fandaminagne ty atoy. Lava nankatò avao zahay satria natoky tie nitarike ty vahoa’e ty Jehovah.”

 Mifantoha amy ty asa i Jehovah. Nagnazava ty Guadalupe tie: “Tsy le ninekoneko loatse zahay satria tondregne nampianatse o ndatio ty miomba i Jehovah. Tena fale zahay satria afake nanompo aze. Toe izay ka ty raha tena lahibey ama’ay.”

 Miharoa lognandro amo o mpiara-manompò. Hoe ty Anita: “Ze raha tsy niazo’ay natao tamy i Anjomba Fanoagne Fianaragne Ara-kolontsaigney agne, le nanoe’ay an-tragno agne. Agnisa izay ohatse ty nihira i hira i Fanjakagney. Niharo saigne avao zahay sady niarake nanao raha mateteke. Nanao rehake mampahery ka zahay naho fa nifampirehake tamy i fivoriagney agne.”

 Hoe izao ty namintigna i Florentino i fotoagne reihoeke: “Naho fa nandineke raho, le treako tie maro ty soa rambesentikagne boake amy i raha niseho reihoeke sady andrambesantikagne lesogne maro. Tena rese lahatse raho tie nitarike antika lognandro ty Jehovah tamy i fotoagne rey ndra tie nitoheregne aza ty asantikagne.”