Faminaniagne 2. Keré

“Hisy keré.”​—MARKA 13:8.

● Keré ty lahilahy raike, le nipay vonje ta Quaratadji, a Niger agne. Nilay ty hakeregne ka ty troke raike ama’e naho ty nimbondrene’e, le niala tamy ty faritse misy iareo. Faie i lahilahỳ avao ro niroro ambone tihy ey. Ino ty anto’e? Hoe ty Sidi, mera amy i tanàgney: “Tsy velo’e [ty keleia’e] le tsy tante’e sasa ty hagnente iareo amy izao avao.”

MAMPISEHO INO TY RAHA MISY? Ndaty raike agnate ty fito magneran-tane ro tsy ampe hanegne isan’andro. Faie mbe raty noho izay ty Afrika atimo i Sahara agne, satria ty am-pahatelo ty ndaty agne ro keré agnate ty fotoagne ela bey. Eretsereto tie misy keleiagne raike misy rae rene naho ajaja kedekede raike. Ia ty tsy hihinagne, naho anjara o ndaty roe avao ty anagna iareo? I rae’ey vao sa i rene’e sa i ajajay? Tsy maintsy mifily hoe izay ty keleiagne raike isan’andro.

INO TY HEVE O NDATIO? Mamokatse hanegne mihoatse ty ilaegne o taneo, fa mila zaraegne soa avao.

MAREGNE VAO ZAY? Maregne fa afake mamokatse naho mandefa hanegne maro naho oharegne amy ty taloha o mpamboleo. Toko’e ho vita ty fitondram-panjakàn’olombelogne ka ty hizara o hanegne vokatse ty tane toio mba tsy hisia ty hakeregne. Faie tsy nahavita izay iareo, ndra tie fa nagnandragne nanao izay tagnate ty folo taogne aza.

AKORE TY HEVE’O? Tanterake vao ty Marka 13:8? Tsy mampijale o ndatio magneran-taneo vao ty hakeré ndra tie mandroso bey aza o teknolojiao?

Mateteke ty horohoron-tane naho ty keré ro mahavy i raha fahatelo mampiambake ty andro fara’ey.

[Hevetse Lahibey]

“Maro ty ajaja mate ty pnemonia naho ty aretem-pivalagnagne vaho ty aretegne hafa. Faie tsy toko’e ho mate ty am-pahatelo’e mahery amy iareo naho ampe hanegne soa.”​—ANN M. VENEMAN, MPITANTAGNE TY SAMPAN-DRAHARAHA ONU MIKARAKARA TY RENE NAHO TY AJAJA TALOHA TEO.

[Soratse Magnazava i Sarey]

© Paul Lowe/​Panos Pictures