Nipetrake ta Edena Tagne Vao i Ndaty Voaloha’e Rey?

ALAO sare an-tsaigne tie amy ty zaridaigne tena bey rehe. Lavitse ty tabataba i rovay i toeragney, le tsy voahelengelegne rehe. Tena milamin-tsaigne rehe, salama naho matanjake. Afake mahatrea tsiro’e amy ty magnodidigne ka rehe.

Finaritse rehe magnente i folera maro loko rey, renerano mikararake soasoa, raha mitiry maintso naho mavògne tarafe i masoandroy, ndra ambane aloke ey. Misy tiotioke malemeleme minday fofogne tena magnitse ka ty boake agne! Rei’o ty feo i raven-katae mihofahofa rey, i rano mitopatopa amy ty vato ey, ty fio i vorogney vaho ty biby kedekede magnenogneno. Tsy mba tea’o vao ty ho amo o toeragne iohoe ao?

Maro ty ndaty mino fa toeragne hoe izay ty nitoboha i ndaty voaloha’e rey. Fa ela ty mpivavake amy Jodaisma naho ty Fivavahagne Mirehake ty Vata’e fa Kristiana vaho ty Silamo ro nampianaregne fa nataon’Andrianagnahare tamy teteke Edenay ao ty Adama naho i Eva. Rehafe ty Baiboly fa niadagne naho sambatse iareo, nifankahazo soa, sady tsy mba nasiake tamy iareo o bibio. Soa ka ty fifandrambesa iareo taman’Andrianagnahare, i nampitamà iareo fiaignagne nainai’e tamy toeragne tena fanjakay ao.​—Genesisy 2:15-24.

Mino ka o Hindoao fa nisy paradisa tie taloha, faie hafa ty fihevera’e aze. O Bodistao ka mino fa hoe paradisa ty tane toy iaby tie taloha sady sambatse o ndatio. Nao tamy izay zao ro nanomboke nanagne mpitarike ndra Bouddha iareo. Fivavahagne maro Afrika agne ka ro mampianatse tantara mitovy amy i Adama naho i Eva.

Ndra ty fivavahagne ndra ty talilin-drazagne areke le sambe mampianatse fa nisy paradisa tie taloha. Hoe ty mpanoratse raike toy: “Ndaty boake amy ty kolontsaigne sambe hafa ro mino fa nisy paradisa tie taloha, le voririke iaby ze kila raha, sady nanjaka ty fahafahagne, ty fiadagnagne vaho ty fahasambaragne. Tsy nisy nampijale ndra nampatahotse ndra nampinekoneko, sady tsy nisy aly. ... Maro areke ty manigne i paradisa tsy nisy sasay, sady nikezake mafe hagneregne io indraike.”

Raike avao vao ty nifotora i tantara naho i talilin-drazagne rey? Raha tena nisy vao ty tadidy o ndatio kanao manigne i paradisay iareo? Tena nisy zaridaigne Edena vao tie taloha, sady tena nisy vata’e vao ty Adama naho i Eva?

Misalasala naho mitsikike ty ndaty ila’e. Mandroso bey o siansao, le maro ty ndaty mirehake fa talily avao ty miomba i Edena. Mahagaga fa mpivavake ty ila’e amy i misalasala rey. Mpitondra fivavahagne maro ty mampianatse fa tsy nisy i zaridaigne Edenay. Nao tsy ara-bakiteny zao o tantara iohoe fa talily ndra fagnoharagne avao.

Maregne aloha fa misy fagnoharagne ty amy Baiboly ao! Ndra i Jesosy aza nirehake fagnoharagne tena malaza. Faie tsy fagnoharagne ty irehafa ty Baiboly ty tantara i Edena, fa tantara tena nisy. Azo atokisagne vao ty raha hafa rehafe ty Baiboly, naho tsy tena nisy i zaridaigne Edenay? Hodinehentikagne heike tie nagnino ro misy misalasala, sady maregne vao ty heve’e. Nagnino ro tena ilaentikagne tsikiraidraike ty mahafantatse ty raha niseho ta Edena tao?