INO TY HAGNAMPE AZO HIZAKA TY HAOREA’O?

Tena Magnampe ty Baiboly

MANDEFA

MARO TY FIKAROHAGNE NATAO MBA HAGNAMPEAGNE ZE NIZOEN-KAOREAGNE. Faie mifagnarake amy ty raha rehafe ty Baiboly i torohevetse tena mandaitse rey arake ty nitreantikagne teo. Trea boake amy izay fa tsy mete lany date o Baibolio ndra tie boke fa hambo’e aza. Faie tsy torohevetse avao ty rehafegne ao. Misy raha tsy trea ndra aia ndra aia ka ty ao, sady tena mampahery ze nizoen-kaoreagne.

Magnomey toky ty Baiboly fa tsy mijale o ndaty nimateo

Izao ty rehafegne ao: “Ty mate tsy misy raha rendre’e.” (Mpitoriteny 9:5) “Foagne ty eretsere’e.” (Salamo 146:4) Ohare ty Baiboly amy ty ndaty miroro o ndaty nimateo.—Jaona 11:11.
Mampionogne ty mahafantatse fa bey hatea ty Andrianagnahare

Hoe ty Salamo 34:15: “Ty fihaino i Jehovah * mitalake ty ndaty maregne, sady ty ravem-bia’e mijanjigne ty toka vonjeo atao iareo.” Manjare maivagne tikagne sady tsy mivali-doha sasa naho fa rehafentikagne amy i Jehovah ze am-pontikagne ao. Faie tsy izay avao. Magnampe antikagne hifandrambe soa amy i Mpamorogne antikagney ty vavake. Tena mahery reke, le afake mampionogne antikagne.
Mampitamà hoavy fanjaka ty Baiboly

Eretsereto tihoe ho velomegne ty mate, le hiaigne nainai’e an-tane etoy indraike. Hanao akore ty fiaignagne amy izay? Mirehake mateteke ty miomba izay ty Baiboly. Hoe ty Apokalypsy 21:3, 4: ‘Hofafan’Andrianagnahare ty ranomaso amy ty masontikagne, le tsy hisy sasa ty fate, sady tsy hisy sasa ty alahelo ndra ty fitaraignagne ndra ty fanaintaignagne.’

Mahavita mizaka ty haorea’e ty ndaty maro mino i Jehovah Andrianagnahare. Matoky iareo fa mbe hahatrea i longo’ey indraike. Nimate ohatse ty valy i Anna, naho fa nimpivaly tagnate ty 65 taogne iareo. Hoe reke: “Nitreako tamy Baiboly ao tie, tsy mijale ty mate sady mbe ho velomen’Andrianagnahare ze agnate fitadidia’e ao. Izay avao ty ataoko an-tsaigne isake tie mahatsiaro i valiko raho. Tena mafe tamako ty namoe aze faie nivitako avao ty niatreke aze.”

Hoe ty Tina, i nirehafegne taloha teoy: “Tsapako tie tsy nienga ahy ty Andrianagnahare hatrake amy i nimateza i Timoty zay. Nagnampe ahy avao ty Jehovah naho fa kivy raho. Tena matoky ka raho fa mbe ho velomegne ty mate, arake ty rehafe ty Baiboly. Nagnampe ahy tsy hijanogne zay, fa handigne i fotoagne hahatreavako i Timoty indraikey.”

Misy ndaty hafa an-tapetrisa’e ka magneke fa azo itokisagne ty Baiboly. Faie akore naho mieretseretse rehe tie sarotse inoagne ty raha rehafe ty Baiboly, ndra hoe nofinofy avao? Tsy aleo vao magnadihady soa? Va’e ho rese lahatse rehe tie azo itokisagne ty raha ampitamae ty Baiboly sady azo ampiharegne soa ty torohevetse mei’e. Hotrea’o tie tena afake magnampe ze nizoen-kaoreagne ty Baiboly.