Ty Fihevera Ty Baiboly

“Ty Fagnatanjahan-tegna Losotse Loatse”—Toko’e Hanao ze Raha Magnoho-doza zay vao Rehe?

“MIHAMARO AMY IZAO TY NDATY MANAO FAGNATANJAHAN-TEGNA MAGNOHO-DOZA, LE MIVOAGNE BOAKE AMBONE O RAPOLANIO EY, MIZOTSO BOAKE AMBONE VOHITSEY AMY TY TALY, MIGORISA AMY TY LAKAGNE KEDEKEDE AMY TY LAKAGNE MANDEHA SADY MISITRIKE AMY TY RANO AGNATE AKATA AGNE.”—GAZETE WILLOW GLEN RESIDENT.

MAMPISEHO ty fahazaragne mihamitombo amo o fagnatanjahan-tegnao o fagnazavagne iohoe. Trea tie mitombo amy ty tontolo toy eto ty ndaty tea fagnatanjahan-tegna magnoho-doza, agnisa izay ty mivoagne boake amo o rapolanio ey, manganike vohitse misy gilasy, parapente (mivoagne amy ty tane mihoriragne), vaho ty BASE jumping. * Ampiasaegne ty raha retoagne mba hagnitara ty ndaty raike ty fetra ty raha ho vita’e naho fa mikezake mba hihoatse ty lengo i vohitsey reke ndra mitsambokogne boake ambone ty vato abo bey agne, ndra mitsamboagne magnambone le miheregne an-tane eo indraike (saute à longueur): Snowboard (hatae pisake igorisagne amy ty gilasy, aroso amy ty tomboke ndra amy ty tagnagne), VTT (bisikileta avegne amy ze amegnagne aze), tihoe planches à roullettes (hatae pisake sady fohe misy laro’e), tihoe karaza rollers ka (kiraro misy laro’e). Rehafe ty gazeteboke Time, fa ty fitomboa ty hatea “fagnatanjahan-tegna losotse loatse” le va’e hagnoho-doza ze ndaty manao aze. An-tapetrisa’e ty ndaty mandrambe anjara amy i “fagnatanjahan-tegna amy ty fetra ty toko’e ho vita’ey.” “Faie fitambara ty loza naho ty fahaizagne vaho ty tahotse io, le izay ty mahavy o mpihisa amy ty fara heregnandrò naho o atleta mahay io hahatsapa fa nahavita nihoatse ty fetra ty toko’e ho vita’e manokagne reke.”

Faie marom-pitea reo sady viliegne lafo. Mihamitombo avao ty ndaty maratse naho fa losotse loatse i fagnatanjahan-tegna rehafegne tie azo antokey. Tagnate ty taogne 1977 ta Etazonia agne, le nitombo 33 isan-jato ty isa ty ndaty naratse nindesegne amo o fitsaboagne vonjemekeo ey, nivoa tamy ty fihisagne Skateboard (hatae pisake misy laro’e), 31 isan-jato ty nivoa tamy ty fihisagne snowboard, sady 20 isan-jato ty nivoa tamy ty fanganihagne vohitse. Vao mainke mampiriatse holitse ty voka ty fagnatanjahan-tegna hafa, trea mibaribary tie mitombo ty ndaty nimate, amy i fagnatanjahan-tegna losotse loatsey. Tsapa o ndaty mpanohagneo tie magnoho-doza o fagnatanjahan-tegna reo. Hoe ty ampela raike nandrambe anjara amy ty skia losotse loatse: “Tsy niafake an-tsaiko ao i fatey.” Mamintigne izay ty mpihisa snowboard mahay raike toy, hoe reke: “Kanao rehe tsy naratse, le mbe tsy nikezake mafe zay.”

Naho henteagne o raha niseho rehoe, akore ty fihevera ty Kristiana raike ty fandrambesagne anjara amy ty fihisagne hoe ireo? Akore ty agnampea ty Baiboly antikagne hanapa-kevetse tie toko’e hanao fagnatanjahan-tegna losotse reo vao sa tsy toko’e hanao? Hagnampe antikagne hamale o fagnonteneagne rehoe, ty fandinehantikagne ty fomba fiheven’Andrianagnahare miomba ty fahamasigna ty aigne.

Ty Fiheveran’Andrianagnahare o Aigneo

Mirehake amantikagne ty Baiboly fa i Jehovah ty “niboaha o aigneo.” (Salamo 36:9) Namorogne o ndatio reke sady nagnomey ze raha ilaentikagne mba hankamamiantikagne o fiaignagneo. (Salamo 139:14; Asan’ny Apostoly 14:16, 17; 17:24-28) Ara-dalàna areke naho mitamà reke tie, ho kolokoloentikagne soa i raha nimei’e antikagne aman-kasoa fagnahỳ. Magnampe antikagne hahatakatse izay ty lalàna naho ty fitsipike nimei’e ty firene o Israelio.

Nandily ty tsikiraidraike mba hiaro ty fiay ty ndaty hafa ty lalà i Mosesy. Naho tsy norihegne zay, le nisy aigne nafoe sady hivesatse trosan-dio i ndaty toko’e ho nisakagne i lozaỳ. Nililiagne ohatse iareo, mba hampitsotake hatae miarikatoke ty tragno’e etaze. Naho tsy manao izay iareo, le hivesatse trosan-dio i tragnoy naho misy ndaty nitonta ty boake agne sady nimate. (Deoteronomia 22:8) Naho nisy agnombe raike nitomboke ndaty sady nahafate aze, le tsy tompon’antoke amy izay i tompo’ey. Faie naho fa nifantatse tie magnoho-doza i agnombey, sady fa nirehafegne amy i tompo’ey faie tsy nambena’e i agnombe’ey, le nitomboke ndaty avao, le hivesatse trosan-dio i tompo’ey sady ho vonoegne. (Eksodosy 21:28, 29) Trea boake amy i Lalàna miomba ze fiarovagne o aigneo zay fa tena sarobily amy i Jehovah o aigneo.

Fanta ze mpanompo i Jehovah tsy mivalike fa mihatse amy ty fomba hiarovagne amy ty loza va’e hanjò ty tegna’e ka i fitsipike rey. Tantaraegne amy Baiboly ao ohatse fa nirehake ty Davida tie, te hinon-drano boake amy i vovogne ta Betlehema aoy. Faie o Filistinao ty nifehe i Betlehema tamy izay. Naho vaho naharey i reha i Daviday ty ila’e amy i maramila’e rey, le tsy nangatake alalagne iareo fa nizilike amy ty tobe o Filistinao ao, sady nanovy rano tamy i vovogne ta Betlehema aoy, le nindese iareo mbamy i Davida mbeo. Faie nanao akore ty fihetse i Davida? Tsy nipaoke ninogne i ranoy reke fa naili’e an-tane eo i ranoy. Hoe reke: “Sagnatria ahy ty hanao izay noho ty fagnajako an’Andrianagnahare! Le hinogne ty lio o lahilahy nanao sorogne ty fiai’e reo vao raho? Nanao sorogne ty fiai’e iareo mba hindesegne ty rano toy amako atoy.” (1 Tantara 11:17-19) Fanta i Davida fa tsy hanao raha mba hagnoho-doza ty fiay ty ndaty raike reke mba hahazoa’e fahafaham-po.

Hoe izay ka ty fihetse i Jesosy naho fa nitsapa hevetse aze ty Devoly, tamy i reke nampitontae’e boake ambone i tempolỳ agney. Nirehake reke tie, mbe ho trea eo tie hisy anjely hitsepake azo mba hahavy azo tsy haratse. Hoe ty Jesosy: “Ko mitsapa hevetse i Jehovah Andrianagnahare’o.” (Matio 4:5-7) Trea boake amy ireo fa sambe nagneke ty Davida naho i Jesosy fa raty agnatrehan’Andrianagnahare eo ty misatry raha hagnoho-doza ty ay ty ndaty hafa.

Naho misaintsaigne o ohatse reo tikagne, le va’e hieretseretse tie: ‘Akore ty ahafantaragne tie fagnatanjahan-tegna losotse loatse toy ndra magnoho-doza? Ndra ty fihisagne mahazatse tsy magnoho-doza aza, naho itaregne, le va’e hagnoho-doza. Akore ty amaritagne aze tie hatrake aia ty fetra ty toko’e hanoagne aze?’

Fagneva ty Hanoagne Sorogne ty Aigne Vao?

Magnampe antikagne hamantatse ty vale izay ty fandinehagne soa ze raha va’e ho eretseretentikagne hatao. Azontikagne atao ty magnontane tie: ‘Fire isan-jato ty loza miseho amy ty fagnatanjahan-tegna toy? Nahazo fampiofagnagne naho ze fitaovagne ilaegne mba hiarovagne ahy tsy haratse vao raho? Ino ty ho voka’e naho mitonta raho, ndra losotse loatse ty fetra ty itsambokonako, ndra naho tsy mandeha i fitaovagne fiarovakoy? Ho kadraotse avao vao zay sa va’e haratse bey ndra hahafate?’

Ty fanoagne raha magnoho-doza mba hihisagne avao, le va’e hisy voka’e amy ty fifandrambesa ty Kristiana raike amy i Jehovah sady hahavy aze tsy hahafeno fepetse manokagne amo o fiangonagneo eo. (1 Timoty 3:2, 8-10; 4:12; Titosy 2:6-8) Mazava areke fa naho mihisa ty Kristiana raike, le mila mihevetse ty aigne ho masigne agnatreha i Mpamorogney eo.

[Fagnamarehagne ambane peje]