Talily Soa Nisorate i Marka 1:1-45
-
Nitory ty Jaona Mpanao Badisa (1-8)
-
Ty badisa i Jesosy (9-11)
-
Nitsapae i Satana hevetse ty Jesosy (12, 13)
-
Nanomboke nitory ta Galelia agne ty Jesosy (14, 15)
-
Nitokavegne i mpianatse voaloha’e rey (16-20)
-
Demonia niroahegne (21-28)
-
Nagnasitragne ndaty narare maro ta Kapernaomy ao ty Jesosy (29-34)
-
Nivavake tamy ty toeragne mitokagne (35-39)
-
Ndaty raike nivoa ty habokagne nisitragnegne (40-45)
1 Izao ty niatomboha ty talily soa miomba i Jesosy Kristy, i Anan’Agnaharey:
2 Arake ty nisorate i Isaia mpaminany toy: “(Hiraheko aloha’o eo i irakoy mba hagnomagne ty lalagne homba’o.)
3 Inay ty feo o ndaty mikoike am-patrambey agne manao tihoe: ‘Omano ty lala i Jehovah! Anò mahitsy i lala’ey.’”
4 Tamy i Jaona Mpanao Badisa tam-patrambey agney, le nitory tamo o ndatio reke, fa toko’e hatao badisa iareo mba hanoroa iareo tie mibebake, amy izay iareo mahazo famelan-keloke.
5 Ty voka’e, nandeha mbamy i Jaona mbeo ze ndaty tamy ty faritse i Jodia agne iaby naho ta Jerosalema agne iaby. Natao’e badisa tamy i Renerano i Jordanay teo iareo sady nieke ty fahota iareo tagnatreha o ndatio eo.
6 Volon-drameva ty akanjo nagnisia i Jaona, le ty sentira’e holitse. Valala naho tantele agn’ala ey ka ty nifihane’e.
7 Izao ty raha nitorie’e: “Misy ndaty mahery amboneko ho avy afarako, le ndra izaho aza tsy fagneva ty hiondreke hagnaha ty taly i kapa’ey.
8 Izaho manao badisa anareo amy ty rano, fa ireke hanao badisa anareo amy ty fagnahy masigne.”
9 Tagnate ze fotoagne zay, le niala boake a Nazareta a Galelia agne ty Jesosy, le nandeha mbamy i Jaona mbeo. Le natao i Jaona badisa tamy i Renerano i Jordanay eo reke.
10 Naho vaho niakatse boake agnate rano ao reke, le nisokake i lagnitsey, sady nitrea’e nizotso manahake o voromahilalao tambone i Jesosy teo i fagnahy masigney.
11 Nisy fiaragnanagne ka ty boake an-dagnitse agne nanao tihoe: “Irehe i Ana-dahiko tena teako sady ankasitrahakoy.”
12 Tafara izay, le avy le nente i fagnahy masigney tam-patrambey agne reke.
13 Nijanogne tam-patrambey agne tagnate ty 40 andro reke, le nitsapae i Satana hevetse. Nisy bibihako ka ty tagne. Faie nisy anjely nanohagne aze.
14 Tafara ty nitsepahagne i Jaona, le nandeha ta Galelia agne ty Jesosy mba hitory i talily soa boake aman’Agnaharey.
15 Hoe reke: “Avy hinane zao i fotoagne fa tinondroy, sady fa marine i Fanjakàn’Agnaharey. Mibebaha nareo, le inò’areo ka i talily soay.”
16 Tamy ireke nandeha a moron-dria i Galelia agney, le nahatrea i Simona naho i Andrea nandatsake i harato iareoy, satria mpagnarato ty asa iareo mirahalahy.
17 Le hoe ty Jesosy tamy iareo: “Andao hagnorike ahy, fa hataoko mpagnarato ndaty nareo.”
18 Le avy le nenga iareo eo i harato iareoy, le nandeha nagnorike i Jesosy iareo.
19 Ie iareo nandeha kedekede, le nahatrea i Jakoba naho i Jaona. Sambe ana-dahy i Zebedio iareo roe lahy. Tagnate i laka iareoy ao iareo aman-drae’e namboatse ty simba tamy i harato iareoy.
20 Le avy le nitokave i Jesosy iareo tamy izay, le nenga iareo agnate lakagne ao ty Zebedio rae iareo naho i mpiasa’e rey, le nandeha nagnorike i Jesosy iareo.
21 Nandeha ta Kapernaomy agne iareo.
Naho vaho nanomboke i Sabatay, le nizilike tamy ze sinagoga zay ao reke, le nampianatse tao.
22 Le nigaga tamy ty fomba fampianara’e iareo, satria nampianatse iareo manahake o ndaty managne fahefagneo reke, fa tsy manahake o mpampianatse lalànao.*
23 Tsy ela tafara izay, le nisy lahilahy raike nisy demonia tamy i sinagogay ao zay nikorakorake hoe izao:
24 “O Jesosy te Nazareta, ino ty idira’o amy ty afera’ay? Hamono anay vao ty niavia’o? Haiko soa tie irehe i Masigne nirahen’Andrianagnaharey!”
25 Faie nagnendake aze ty Jesosy tie: “Mamantsy rehe, le miakara boake amo o lahilahy iohoe ao!”
26 Le niakatse boake ao i demoniay, naho fa boake nampikopokopoke i lahilahỳ naho nampikorakorake aze mafe.
27 Nilatsan-draha i vahoakey naho fa nahatrea izay, le nifampirehake tihoe tie: “Akore ka zao? Fampianaragne vaovao zao! Aia ndra o demoniao naho fa komandie’e, le avy le magnorike ty raha rehafe’e!”
28 Le avy le nalaza nagneneke ty faritse i Galelia iaby areke ty miomba aze.
29 Naho fa niala tamy i sinagogay ao ty Jesosy, i Jakoba, i Jaona, naho i Simona vaho i Andrea, le nandeha an-tragno ry Simona agne.
30 Nizoe iareo nandre i rafoza i Simona ampelay satria niazo ty tazogne. Le avy le nirehafe iareo tama’e ka ze raha nanjò i rakembay zay.
31 Nandeha mbamy i rakembay mbeo reke, le nirambese’e i fità’ey sady natroa’e reke. Le niala tama’e i tazogney sady nanomboke nikarakara hanegne hoahy iareo reke.
32 Naho fa nitsofotse i androy, le nente o ndatio mbama’e mbeo ze ndaty narare naho nisy demonia.
33 Nivory tan-dalan-tragno eo ka ze ndaty tamy i tanàgney eo iaby.
34 Le nisitràgne’e ze narare tamy i ndaty rey sady maro ka ty demonia niroahe’e, faie tsy nenga’e hirehake i demonia rey, satria nihay iareo tie ireke o Kristio.
35 Nifoha reke naho fa nimaraindray bey, tamy i androy mbe naienkiegney, le nandeha tamy ze toeragne mitokagne zay, le nivavake reke naho fa tagne.
36 Faie nikodebe aze mbaombao ty Simona naho i mpianatse ila’e rey.
37 Naho fa nitrea iareo reke, le hoe iareo tama’e: “Mipay azo anio o ndatio.”
38 Faie hoe reke tamy iareo: “Andao tika ho amy ty tanàgne hafa marinerine etoy mba hitoriako agne ka satria izay ty niaviako.”
39 Le nandeha nitory tamy ty sinagoga nagneragne i Galelia reke sady nandroake demonia.
40 Nisy lahilahy nivoa ty habokagne* zay ka nimbama’e mbeo, le nanongaleke sady nirehake tama’e tie: “Vita’o ty magnalio ahy, le mba liovo raho naho zoto’o.”
41 Niferenaigne i lahilahỳ ty Jesosy, le nitsapae’e reke sady hoe reke tama’e: “Zotoko zay! Maliova rehe.”
42 Teo naho eo avao, le avy le niafake tamy i lahilahỳ i habokagne nahazo azey sady nanjare nalio reke.
43 Nampandehane i Jesosy reke naho fa niavy eo faie rinara’e
44 tie: “Ao rehe tsy hirehadrehake ama o ndaty! Akia mandehana amo o mpisorogneo agne, le atoloro i fagnomezagne nandilia i Mosesỳ, soa hotrea iareo tie fa sitragne vata’e rehe.”
45 Faie naho fa nandeha i lahilahỳ, le nitseize’e i raha natao i Jesosy tama’ey, hafarà i Jesosy tsy afake nizilike an-tanàgne fa nijanogne amy ty toeragne bangigne agne avao. Faie le mbe nandeha mbama’e mbeo avao ze ndaty nagnodidididigne ey.
