Mukanda ku Bagalatia 1:1-24
1 Nene Paulo ndi mutumua; nsyaasaakwilue na bantu ao sie kupitila muntu, inzi naasaakwilue na Yesu Kristu ni Leeza Baba, olia waamufufwile Kristu kufuma ku bafwile;
2 nene pamo ni ba lupua bonse bali pamo ni nene, twamipozia mwe bilonghaano bili ku Galatia:
3 Buwame* bwakue Leeza Baba wetu ni bwakue Mulopue Yesu Kristu, pamo ni mutende wabo, biye byali pamo ni mwemue.
4 Kristu waaipeele ye mwine juu ya mazambi etu evi atupususie kufuma mu kenu kyalo kibipile* kukonkana ni kutona kwakue Leeza, Baba wetu.
5 Mupeele Leeza bulumba lonse sie.* Amen.
6 Napapa kumona nangue muli mukufumiiwa lubilo* kuli Leeza olia waamikuutile kupitila buwame bwakue Kristu, kisia muli mukwitabila mpunda inge nga mwemue bali mukwitabila mpunda iweme.
7 Nsikebele kulanda nangue kuli ni mpunda inge iweme; inzi kuli bamo bali mukumivulunghania, kabili batonene kwalulula mpunda iweme pa lwakue Kristu.
8 Inzi, ata sie kine muntu umo pakati ketu ao malaika kufuma ku muulu, wamipundila mpunda iweme ipuseene ni elia itwaamipundiile, muleke alainiwe.
9 Nga vitwalandanga kale, nalanda kabili nangue: Olia onse ali mukumipundila mpunda iweme ipuseene ni elia imwaaitabiile, muleke alainiwe.
10 Eba, ndi mukukeba kwitabilua na bantu ao kwitabilua na Leeza? Ao eba, ndi mukwezia kubasansamusia bantu? Kine ndi mukwezia kubasansamusia bantu, nsili muzia wakue Kristu.
11 Mwe ba lupua, ntonene mumane nangue mpunda iweme inaamisimikiile te ifumine ku bantu;
12 pantu nsyaaipokeleele kufuma ku bantu ao sie kusambiliziiwa, inzi naafiikwiliilue na Yesu Kristu.
13 Kakiine, mwaaunvwile palua lwendo lwane lwa kale mu dini ya Kiyuda, nangue naatwaliliile* kwemia sana kilonghaano kyakue Leeza ni kukiinoona;
14 kabili naali nakita maendeleo akata mu dini ya Bayuda kuliko bantu bengi ba myaka yane mu ntundu yane, pantu naali ni mute sana palua desturi ya ba baba wane.
15 Inzi, musita Leeza olia waalengiizie nvyalue,* kabili olia waankuutile kupitila buwame bwakue,* lwaamwene kyaweme
16 kumufiikula Mwana wakue kupitila nene, evi mpunde mpunda iweme ku ntundu pa lwakue Mwana, nsyaalombele muntu* ata umo ansoke penka papo;
17 kabili, nsyaapilukiile ku Yerusalemu ku baalia baalukile batumua ntanzi nene nsinaaluke mutumua, inzi naaile ku Arabia, ni kisia naabwelele ku Damasko.
18 Myaka itatu kisia papo, naapilukiile ku Yerusalemu kumwendela Kefa,* kabili naaikeele nakue nsiku likumi na isano (15).
19 Inzi, nsyaamwene ata umo pakati ka batumua bange, inga sie Yakobo lupua wakue kwa Mulopue.
20 Lonu, palua bintu bindi mukumyandikila, namisininkiziizia ntanzi yakue Leeza nangue nsili mukubepa.
21 Kisia papo, naaile mu tuzonga twa Siria ni twa Kilikia.
22 Inzi, mbanga nakili sie nsinamonuepo na basambi bakue Kristu ba mu bilonghaano bya mu Yudea belia byaali mu buumo ni Kristu.
23 Bene baali baunvuako sie nangue: “Olia muntu abanga watwemia lwa kale, lonu ali mukusimikila mpunda iweme palua kiketekelo kelia kyabanga wakeba kwinoona.”
24 Pa kako, baatendekele kumutasia Leeza juu yane.
Bulondolozi bwa Pensina
^ Ao, “Buwame busipalilue.”
^ Ao, “enu mpangilo ibipile ya bintu; kenu kipindi kibipile.” Mona Mana ya Milandu.
^ Ao, “muyayaya ni muyayaya.”
^ Ao, “muli mukwaluluka lubilo kufuma.”
^ Mulandu kwa mulandu, “naatwaliliile mu nzila ipitile mipaka.”
^ Ao, “olia waantenganisiizie kufuma mu livumo lyakue mama.”
^ Ao, “buwame bwakue busipalilue.”
^ Mulandu kwa mulandu, “nama ni milopa.”
^ Ali wakuutua kabili Petro.
