Ho Sebedisa Tjhelete Hantle
Ho sebedisa melaomotheo ya Bibele ho thusitse batho ba bangata hore ba se ke ba ba le mathata a ditjhelete.
EBA LE MORERO O MOTLE KA TJHELETE
MOLAOMOTHEO WA BIBELE: “Ka sebele merero ya ya kgothetseng e tlisa molemo, empa ka sebele e mong le e mong ya lepotlapotla o leba bohloking.”—Liproverbia 21:5.
SEO E SE BOLELANG: O lokela ho rera esale pele hore na o tlo etsang ka tjhelete mme o tshepahalle morero oo. O hopole hore o ka se reke ntho e nngwe le e nngwe eo o e batlang. Ka hoo o lokela ho sebedisa tjhelete ya hao hantle.
SEO O KA SE ETSANG:
-
Tshepahalla bajete ya hao. Ngola dintho tseo o di hlokang kaofela mme o di behe ka mananeo. Ebe o a ngola hore o tla sebedisa tjhelete e kae ho e nngwe le e nngwe ya tsona. Haeba o sebedisa tjhelete e fetang eo o neng o batla ho e sebedisa lenaneng le itseng, sebedisa e mananeng a mang. Ka mohlala, haeba o sebedisa tjhelete e ngata ho feta eo o neng o rerile ho e sebedisa bakeng sa petrolo, nka tjhelete e mananeng a mang ao e seng a bohlokwa hakaalo jwalo ka ho ya restjhurenteng.
-
Qoba ho etsa dikoloto tse sa hlokahaleng. Haeba ho kgoneha qoba ho etsa dikoloto ka ho felletseng. Ho e na le hoo, boloka tjhelete e le hore o ka reka dintho tseo o di hlokang. Haeba o sebedisa credit card leka ho patala dikoloto ka nako, e le hore o ka qoba ho di patala ha di se di na le tswala. Haeba o le dikolotong etsa leano la hore na o tla di patala jwang hanyane hanyane ho fihlela o di qeta.
Thuto e nngwe e bontsha hore ha batho ba reka ka credit card ba sebedisa tjhelete e ngata haholo. Jwale, haeba o na le credit card e sebedise hantle.
ITHLOKOMELE DINTHONG TSE KOTSI
MOLAOMOTHEO WA BIBELE: “Ka lebaka la mariha ya botswa a ke ke a lema; o tla kopa nakong ya kotulo, empa ho tla be ho se na letho.”—Liproverbia 20:4.
SEO E SE BOLELANG: Botswa bo etsa hore motho a futsanehe. Ka hoo, sebetsa ka thata mme o sebedise tjhelete ya hao hantle, e le hore o ka ba le dintho tseo o di hlokang.
SEO O KA SE ETSANG:
-
Sebetsa ka thata. Haeba o sebetsa ka thata mosebetsing wa hao bahiri ba hao ba tla o tshepa ebile ba tla o rata mme seo se ka etsa hore ba batle hore o dule o ba sebeletsa.
-
Tshepahala. O se ke wa utswetsa mohiri wa hao, hobane seo se ka senya botumo ba hao mme sa etsa hore batho ba se ke ba batla ho o hira.
-
Qoba meharo. Haeba o dula o batla ho ba le tjhelete e ngata, seo se ka etsa hore o kule mme wa lahlehelwa ke metswalle kapa ba lelapa. O lokela ho hopola hore tjhelete ha se yona ntho ya bohlokwa ka ho fetisisa bophelong.
MELAOMOTHEO E MENG YA BIBELE
Bala Bibele Inthaneteng, e fumaneha ka dipuo tse makgolo ho jw.org
O SE KE WA SENYA NAKO LE TJHELETE DINTHONG TSE SE NANG THUSO.
“Etswe letahwa le monyollo ba tla futsaneha, mme ho otsela ho tla apesa motho maharaso.”—LIPROVERBIA 23:21.
O SE KE WA TSHWENYEHA HAHOLO KA TJHELETE.
“Kgaotsang ho tshwenyeha ka meya ya lona hore na le tla jang kapa le tla nwang, kapa ka mmele ya lona hore na le tla aparang.”—MATHEU 6:25.
O SE KE WA BA MONA.
“Motho ya leihlo le mohono o hahamalla dintho tsa bohlokwa, empa ha a tsebe hore bohloki bo tla mo wela hodimo.”—LIPROVERBIA 28:22.
O ka Nna wa Rata le Tsena
DIHLOOHO TSE DING
O ka Phela ka Tjhelete e Nyenyane Jwang?
Le hoja o ka tshwenngwa ke maemo a hao a ditjhelete, ho na le dintho tseo o ka di etsang tse tswang ka Bibeleng tse ka o thusang hore o phele ka tjhelete e nyenyane.
