Tumonyi tua Yehowa tui na aato Bible su?
Tumonyi tua Yehowa afufubaa na ma Bible elekeenelekeene mu kulonga kuabo kua Bible. Mu ndimi yabadi baluule Bible Ngaluluilo a nsenga ishima atumukuminaa ngofu muanda, mui eshina di’Efile Mukulu, mbamufunde kalolo, na apushika kalolo.
Mui eshina di’Efile Mukulu. Bangi bafundji ba Bible mbakutue kupa Efile mukulu kineemo kimupuandjikiile. Bu kileshesho, mu ungi Bible mui mulongo wa mashina a bantu bakile pa 70 babaadi bakuashe buashi bamufunde. Kadi, yawa Bible te na eshina dia winyi mumutuushe—Yehowa Efile Mukulu—eetu!
Anka, Bible a Bible Ngaluluilo a nsenga ishima mmualushule eshina di’Efile Mukulu mu ma mbalo binunu muadidi mu bifundue bia kala, na dingi bantu abaadi mu komite baadi mutuushe yawa Bible ta mbafunde mashina aabo muanka nya.
Mmufundibue kalolo. Ta ma Bible ooso abadi bafunde kalolo biashi a atuusha mianda y’abakuila mu ma Bible a kiina Ebelu na kiina Greke nya. Bu kileshesho, mu ungi Bible mbaluule Mateo 7:13 bino shi: “Tuelelayi ku kibelo kipeela, muanda kibelo akituala kuishiba dia kaalo nkikata na eshinda dia kuanka ndibofule.” Aku namu mu bifundue bia ku kibangilo mbafubishe muakua “kabutu,” kushi muaku “eshiba dia kaalo.” Pangi baluudi abaadi batueshe muaku “eshiba dia kaalo” muanda abambaa’shi bantu bebubi abakebakiengiesha muishiba dia kaalo bua loso. Anka bina binangu ta mbipushene na abiamba Bible nya. Kadi mu Bible Ngaluluilo a Nsenga Ipia mbaluule uno verse kalolo bino’shi: “Tuelelayi ku kibelo kipeela, muanda kibelo kikata n’eshinda dikata adituala ku kabutu.”
Apushika kalolo. Bible abadi baluule kalolo ta nka penda yawa abadi bafunde kalolo nya kadi abitungu ekadikie apushika kalolo, mubofule bua kupusha. Tuate kilesheho. Mu mukanda wa Bena Loma 12:11, muina Nkidishitu Mpoolo mutumibua baadi mufubishe muaku apatuula kishima ku kishima bu “kusaka mu kikudi.” Bu biabidi’shi kiakia kishima t’akipushika kalolo mu Kisongie lelo uno, mu Bible a Ngaluluilo a Nsenga Ipia mbaluule wawa muaku mu mushindo aupushika kalolo. Abamba’shi abitungu muina Nkidishitu ekale “muwule ndaa na kisumi ku bukuashi bua kikudi.”
Kukaasha kutumika n’eshina di’Efile Mukulu, kufundjibua kalolo, na kupushika kalolo, Bible a Ngaluluilo a nsenga ipia e na kingi kintu akimuabuula na angi ma Bible: Abamuabilaa buntu. Bipeta abituuku, bantu midiyo be na mushindo wa kubadika Bible mu ndimi yabo ya butandua—mpa na baaba bashii na mushindo wa kumuula.

