MAMA-NDIA TI BIBLE: “Tongana azo so asara kua ngangu aleke gere ti akua ti ala, ye ni ayeke ga gï nzoni, me azo kue so adö terê ti sara ye ayeke tï biani na yâ ti yere.”—aProverbe 21:5.

NDA TI VERSÊ NI: Leke gere ti aye so mo ye ti sara nga sara ye alingbi na ni. Tongaso, gbu li nzoni kozo ti dépensé nginza. Girisa ape, peut-être mo peut ti vo ande ye kue so mo ye ape. Ni la, dépensé nginza ti mo na lege ti ndara.

YE SO MO PEUT TI SARA:

• Zia mbeni nginza ndali ti adépense ti mo. Sara liste ti aye so mo bezoin ti vo ni; kangbi ni na agroupe nde nde, na tapande ti kobe, bongo wala da ti lango. Fa nginza so mo doit ti dépensé ni ndali ti aye ni oko oko. Tongana na yâ ti mbeni groupe ni mo dépensé nginza mingi ahon ti so mo leke kozo, zi nginza ti mbeni nde na kanga na dû ni. Na tapande, tongana mo dépensé mingi ndali ti carburant ahon ti so mo leke, zi nginza ti mbeni ye so ayeke kota mingi ape na zia na place ni.

• Kpe ti mû bon senge senge. Tongana lege ayeke dä, kpe ti mû bon. Me, bata nginza ti vo aye so mo ye. Tongana mo doit ti mû bon, sara kue ti payé ni hio tongaso si bon ahon ndö ti mo ape. Tongana bon ayeke na li ti mo, gbu li ti bâ ye so mo peut ti sara ti payé ni nga sara ye alingbi na ye so mo leke.

  Tongana zo amû ka bon mingi, mingi ni lo yeke dépensé mingi. Tongaso, tongana mo ye ti mû bon, gbu li ti mo kozo si.

MAMA-NDIA TI BIBLE: “Zo ti goigoi ake ti dë yaka na ngoi ti dê ti hiver; tongaso lo yeke iri ye na ngoi ti kongo lê ti kobe, na ngoi so lo yeke na ye oko pëpe.”—aProverbe 20:4.

 NDA TI VERSÊ NI: Zo so aye kua ape apeut ti tï na yâ ti yere. Duti zo so aye kua, nga sara kua na nginza ti mo nzoni tongaso si mo wara aye so mo bezoin ni.

YE SO MO PEUT TI SARA:

• Sara kua ngangu. Tongana mo sara kua ngangu nga mo yeke zo ti confiance, apatron ti mo ayeke ye ande mo mingi.

• v Sara ye na lege ni. Nzi patron ti mo ape. Tongana mo nzi, iri ti mo apeut ti buba nga azo ayeke kpe ti mû mo na kua.

• Kpe sarango bê ti ye. Tongana mo ye gï ti wara gbâ ti nginza, a gue ngbii a peut ti ga na mo kpale ti seni nga ti buba songo ti mo na azo. Girisa ape, nginza ayeke pëpe ye so ayeke kota mingi ahon atanga ni kue na yâ ti fini ti zo.

BUBA TEMPS NGA NA NGINZA TI MO APE NA TERÊ TI ASIONI SARANGO YE.

“Ngbâa ti sämba na zo ti tengo ye ahon ndö ni ayeke tï na yâ ti yere, nga zo so lê ti lo ayeke gï na lango ayeke yü gbagbara bongo.”​—APROVERBE 23:21.

GI BÊ NGBII NA NDÖ TI NGINZA APE.

“Ala zia ti gi bê ti ala na ndö ti fini ti ala, wala ala yeke te nyen, wala ala yeke nyon nyen. Nga, ala zia ti gi bê ti ala na ndö ti terê ti ala, wala ala yeke yü bongo ti nyen.”​—MATTHIEU 6:25.

KPE TI SARA BÊ TI YE.

“Zo ti sarango bê ti ye aye mingi ti wara mosoro, me lo hinga pëpe so yere ayeke wara lo ande.”​—APROVERBE 28:22.