NDALI TI AKOLI NA AWALI
2: Sara kua maboko na maboko
TËNË SO AYE TI TENE NYEN?
Tongana koli na wali ayeke sara kua maboko na maboko na yâ ti sewa ti ala, ala yeke tongana mbeni zo ti kpengo na avion na mba ti lo so ayeke mû maboko na lo, so ayeke na oko plan ti voyage. Même tongana akpale asi, zo oko oko la ayeke leke ni ape, me ala use kue.
MAMA-NDIA TI BIBLE: “Ala yeke use mbeni pëpe, me terê oko.”—Matthieu 19:6.
“Ti tene mariage aga nzoni, koli na wali adoit ti sara kua maboko na maboko.”—Christopher.
NGBANGA TI NYEN A YEKE KOTA YE?
Tongana kpale alondo, si koli na wali ayeke azo so ayeke sara kua maboko na maboko ape, ala yeke gi ti bi gï tënë na li ti mba ahon ti leke kpale ni. Kete tënë apeut ti ga kota kpale.
“Ti sara kua maboko na maboko ayeke kota ye na yâ ti sewa. Tongana fade mbi na koli ti mbi e sara tongaso ape, e yeke duti gï tongana azo so alango da oko me pëpe tongana koli na wali so amû terê. A yeke ga fade ngangu na e ti mû akota desizion.”—Alexandra.
YE SO MO PEUT TI SARA
HUNDA TERÊ TI MO
-
Eskê mbi bâ nginza so mbi yeke wara tongana “nginza ti mbi, mbi oko”?
-
Ti tene mbi wara lege ti wu pupu bien, a lingbi mbi hon ayo na koli wala wali ti mbi si?
-
Eskê mbi ye ka afami ti koli wala wali ti mbi ape, même si lo ye ala mingi?
SARA LISORO NA KOLI WALA WALI TI MO
-
Na yâ ti aye wa la e yeke sara kua maboko na maboko dä nzoni mingi?
-
Na yâ ti aye wa la e bâ so a lingbi e sara effort dä?
-
Aye wa la e peut ti sara ti tene e sara kua maboko na maboko ahon ti kozo?
AWANGO
-
Bâ koli wala wali ti mo tongana mbeni zo so mo yeke joué tennis wala ballon contre lo ape. Ala use kue adoit ti duti na yâ ti même équipe, na akpale so ala wara la aga tongana zo so ala joué ye ni contre lo.
-
Ahon ti tene, ‘Mbi peut ti hon ndö ti kpale so tongana nyen?’ tene ‘Tongana nyen la e use kue e peut ti hon ndö ti kpale ni so?’
“Gi pëpe ti hinga zo wa la ayeke na faute wala zo wa la ayeke na raison. Ye so ayeke kota ye ayeke ti duti na siriri nga na nzoni songo na zo so mo sara mariage na lo.”—Ethan.
MAMA-NDIA TI BIBLE: “[Ala zia] lê ti ala gï na ndö ti aye ti ala wani pëpe, me nga na ndö ti aye ti amba ti ala.”—aPhilippien 2:3, 4.
