Mo lï na yâ ti wungo tere ti Nzapa awe?

“Tënë ti Nzapa ayeke na fini na ayeke na ngangu ti sara ye.”​—AHÉB. 4:12.

1. Tongana nyen e lingbi ti lï na yâ ti wungo tere ti Nzapa laso? Ngbanga ti nyen a lingbi ti duti ngangu ti mä yanga?

NA YÂ ti article so ahon e manda so e lingbi ti lï laso na yâ ti wungo tere ti Nzapa tongana e mä yanga ti Jéhovah na e sara kusala maboko na maboko na bungbi ti lo. Tongana e mä yanga ti Jéhovah afa so e ye si ye so lo leke ti sara aga tâ tënë. Me na ambeni ngoi a lingbi ti duti ngangu ti mä yanga. Na tapande, na ngoi so e hinga so Jéhovah aye si e zia lege ti mbeni ye so e ye mingi ti sara ni, a lingbi ti duti ngangu na e ti mä yanga ti lo hio. Tongana ye tongaso asi na e, a lingbi e manda ti duti “nduru ti mä tënë”. (Jacq. 3:17). Na yâ ti article so, e yeke sara tënë na ndo ti ambeni ye so na yâ ni lege azi na e ti fa so e yeke nduru ti mä yanga na yâ ti aye kue.

2, 3. Nyen la a lingbi e ngbâ ti sara ti nzere na lê ti Jéhovah?

² Tongana mo manda Bible si mo bâ so a lingbi mo changé mbeni ye na yâ ti fini ti mo, mo yeke nduru ti sara ni? Gbu li na ndo ti tënë so: Bible atene so azo so Jéhovah aye ti ga na ala na yâ ti bungbi ti lo ayeke “ye ti nzoni mingi” ti amara kue (Ag. 2:7). Ye so aye ti fa so Nzapa asoro azo so lo bâ ala na nene ni mingi ndali ti so ala ndoye ye so ayeke mbilimbili. A yeke tâ tënë so na ngoi so e to nda ti manda Bible, mingi ti e ayeke sara lani aye so ayeke nzoni pëpe. Me teti so e ye Nzapa nga na Molenge ti lo nga so e ye ti nzere na Nzapa, a nzere lani na e mingi ti changé bibe nga na asarango ye ti e. E sambela lani Jéhovah ti mû maboko na e na pekoni e sara ngangu ti changé aye so a hunda ti tene e changé na yâ ti fini e. Na nda ni, e wara batême na Jéhovah abâ e na nzoni lê.​—Diko aColossien 1:9, 10.

³ Me e ngbâ lakue awasiokpari. E yeke lakue na bezoin ti changé aye na yâ ti fini ti e nga ti sara ngangu ti sara ye so ayeke na lege ni. Jéhovah  amû zendo ti mû maboko na e tongana e ngbâ ti sara ngangu ti nzere na lê ti lo.

Tongana a hunda ti changé aye na yâ ti fini ti e

4. Alege ota wa Jéhovah ayeke sara na kusala ti fa na e aye so a lingbi e changé na yâ ti fini ti e?

⁴ Kozoni ti changé aye na yâ ti fini ti e, a lingbi e hinga aye so a lingbi e changé. Ti sara ni, Jéhovah ayeke mû maboko na e na alege nde nde. Lo lingbi ti sara ni na lege ti mbeni diskur so e mä na Da ti Royaume wala na lege ti mbeni oko ti ambeti ti e ti fa na e so na yâ ti bibe ti e wala sarango ye ti e mbeni ye ayeke dä so ayeke na lege ni pëpe. Na ambeni ngoi e hinga pëpe so a lingbi e changé ambeni ye même na pekoni so e mä mbeni diskur wala e diko mbeni mbeti ti e. Tongaso, Jéhovah alingbi ti sara kusala na mbeni ita na yâ ti congrégation ti tene na nzoni bê lo kiri na e na nzoni lege.​—Diko aGalate 6:1.

5. Ngoi na ngoi e yeke sara ye tongana nyen na ngoi so mbeni ita akiri na e na nzoni lege? Ngbanga ti nyen a lingbi a-ancien angbâ lakue ti gi ti mû maboko na e?

⁵ Na ngoi so mbeni mba ti e so alingbi kue pëpe akiri na e na nzoni lege, a lingbi ti duti ngangu na e ti yeda na tënë so lo tene, même tongana lo tene tënë ni na e na nzoni bê. Me Jéhovah amû yanga na a-ancien ti ‘tara ti kiri na e na nzoni lege’ me ti sara ni “na ngangu pëpe”, so ti tene ti sara ni na nzoni bê (aGal. 6:1). Tongana e yeda na mungo maboko ti ala, e yeke kiri ti ga “nzoni mingi” na lê ti Jéhovah. Biani, fani mingi na yâ ti sambela ti e e tene na Jéhovah so e yeke awasiokpari nga so e yeke sara afaute mingi. Me na ngoi so mbeni zo atene na e so e sara mbeni faute, mingi ni e yeke ke ti yeda na ni. E yeke gi araison ti fa ngbanga ti nyen e sara ye ni so wala e yeke tene même so faute ni ayeke sioni mingi pëpe. Peut-être e tene so zo ni so asara tënë ni na e so aye e pëpe wala lege so lo sara na tënë ni na e anzere pëpe (2 aGbia 5:11). Wala e lingbi ti sara ngonzo ngangu tongana a-ancien asara na e tënë ti mbeni ye so e ye ti mä ni pëpe. Na tapande, ala lingbi ti tene na e so mbeni zo ti sewa ti e asara mbeni ye ti sioni wala yungo bongo ti e ayeke nzoni pëpe. Peut-être ala tene na e so a lingbi e sara si tere ti e aduti na saleté pëpe wala angia so e yeke sara anzere na Jéhovah pëpe. Teti so e sara ngonzo, e lingbi ti tene mbeni tënë so a lingbi e tene ni pëpe. Ye so alingbi ti sara si na pekoni vundu ayeke sara e nga vundu ayeke sara ita ni so agi ti mû maboko na e. Me na pekoni tongana ngonzo ni ahon awe, mingi ni e yeke yeda so tënë so ita ni atene so ayeke ndali ti nzoni ti e.

6. Na lege wa Bible ‘alingbi ti hinga nda ti abibe ti bê ti zo nga na aye so bê ti zo ni aye ti sara’?

⁶ A-Hébreu 4:12 so ayeke mama-tene ti article so atene so tënë ti Nzapa ayeke na “ngangu ti sara ye”. Ye so aye ti tene so Bible ayeke na ngangu ti mû maboko na zo ti changé aye na yâ ti fini ti lo. Bible amû maboko na e ti changé aye so a lingbi e changé na yâ ti fini ti e kozoni si e wara batême. A lingbi nga ti mû maboko na e ti changé aye na yâ ti fini ti e na peko ti batême ti e. Na yâ ti lettre so Paul atokua lani na aChrétien Hébreu, lo tene so tënë ti Nzapa ‘akpo alï juska akangbi popo ti âme na yingo,’ nga “a lingbi ti hinga nda ti abibe ti bê ti zo nga na aye so bê ti zo ni aye ti sara.” (aHéb. 4:12). Tënë “âme” ge aye ti sara tënë ti ngbongboro tere ti e so azo alingbi ti bâ. Tënë “yingo” ge aye ti sara tënë ye so ayeke na yâ ti bê ti e so azo alingbi ti bâ ni pëpe. Tongaso, Paul ayeke tene lani so, tongana na lege ti Bible e hinga ye so Nzapa aye ti tene e sara, asarango ye ti e ayeke fa na gigi ye so ayeke na yâ ti bê ti e. Kangbi ayeke na popo ti ye so lê ti azo ayeke bâ tongana ala bâ e nga na ye so ayeke na yâ ti bê ti e? (Diko Matthieu 23:27, 28.) Gbu li na ndo ti ye so mo yeke sara tongana mo yeke na yâ ti aye so e yeke gue fadeso ti sara tënë na ndo ni so.

Ngbâ ti gue na li ni legeoko na bungbi ti Jéhovah

7, 8. (a) Ngbanga ti nyen ambeni Chrétien Hébreu aye lani ti ngbâ ti sara ye alingbi na ambeni mbage ti Ndia ti Moïse? (b) Ngbanga ti nyen e lingbi ti tene so ala yeke sara ye lani ague nde na ye so Jéhovah aleke ti sara?

⁷ Mingi ti e ahinga nzoni mingi atënë so ayeke na aProverbe 4:18. Versê ni atene: “Lege ti azo ti mbilimbili ayeke tongana lâ ti ndapre so asu, a su mingi, juska a ga kota lâ.” Ye so aye ti  tene so tongana ngoi ayeke hon, tambela ti e ayeke ga nzoni mingi ahon ti kozo nga e yeke hinga ye so Jéhovah aleke ti sara nzoni mingi ahon ti kozo.

⁸ Tongana ti so e bâ na yâ ti article so ahon, na peko ti kuâ ti Jésus mingi ti aChrétien so ayeke aHébreu aye lani ti ngbâ ti bata Ndia ti Moïse (Kus. 21:20). Paul atene na ala polele so aChrétien ayeke mbeni pëpe na gbe ti Ndia ti Moïse, me ambeni ake ti yeda na ye so Jéhovah aku na mbage ti ala (aCol. 2:13-15). Peut-être ala pensé ti ala lani so tongana ala ngbâ ti sara ye alingbi na ambeni mbage ti Ndia ti Moïse, a yeke sara si azo so angbâ ti mû peko ti bungbi ti nzapa ti aJuif ayeke sara ye ti ngangu na ala pëpe. Me Paul atene polele na ala so tongana ala ngbâ ti sara ye ague nde na ye so Nzapa aleke ti sara, ala yeke lï pëpe na yâ ti wungo tere ti Nzapa. * (aHéb. 4:1, 2, 6; diko aHébreu 4:11.) Ti nzere na lê ti Jéhovah, a lingbi ala yeda so fadeso Jéhovah aye si azo ti lo avoro lo na mbeni lege nde.

9. Bê ti mo ayeke tongana nyen na ngoi so ngbâa be-ta-zo so ayeke sara ye na ndara achangé lege so e gbu na nda ti ambeni ye na yâ ti Bible?

⁹ Laso, ngbâa be-ta-zo so ayeke sara ye na ndara ayeke mû maboko na e ngoi na ngoi ti gbu nda ti afango ye ti Bible na mbeni lege so ayeke nde na ti so e pensé na ni kozo. A yeke nzoni e duti na ngia ndali ti agbiango ye so. A fa na e so Jéhovah ayeke sara kusala na ngbâa be-ta-zo so ayeke sara ye na ndara ti fa na e tâ tënë. Ngoi na ngoi, Bebungbi, so ayeke sara kua na iri ti ngbâa be-ta-zo so ayeke sara ye na ndara, akiri abâ yâ ti lege so e gbu na nda ti ambeni tâ tënë. Tongana aita ti Bebungbi abâ so a lingbi a changé ambeni ye, ala yeke na mbeto pëpe ti changé lege so ala zi na nda ti ambeni fango ye ândö wala ti sara si afango ye ni akiri aduti polele. Ala hinga so ambeni zo ayeke tene asioni tënë na ndo ti ngbâa be-ta-zo so ayeke sara ye na ndara ndali ti agbiango ye so, me ye so la ayeke kota mingi na lê ti ala pëpe. Ye so ayeke kota mingi na lê ti ala ayeke ti sara ye ague oko na ye so Nzapa aleke ti sara. Bê ti mo ayeke tongana nyen na ngoi so ngbâa be-ta-zo so ayeke sara ye na ndara achangé lege so e gbu na nda ti ambeni ye na yâ ti Bible?​—Diko Luc 5:39.

10, 11. Nyen la ambeni Wamandango Bible asara lani na ngoi so a fa na ala so a yeke nzoni ala tara ambeni fini kode ti fango tënë? Ye so afa nyen na e?

¹⁰ Zia e bâ mbeni tapande nde. A sara ngu ngbangbo oko tongaso awe, ambeni Wamandango Bible so ayeke mû ândö apendere diskur apensé so mungo adiskur la ayeke nzoni lege so ahon atanga ni kue ti tene ala fa tënë. Ala ye mingi ti sara tënë na gbele gbâ ti azo. Ambeni na popo ti ala aye mungo diskur mingi ndali ti so azo ayeke gonda ala ndali ti adiskur so ala mû. Me angu mingi na pekoni, azo ti Jéhovah aga ti hinga polele so Jéhovah aye ti tene ala sara ye mingi ahon gi ti mû adiskur. Lo ye si ala fa tënë da na da nga na ambeni lege nde. Ambeni Wamandango Bible ni so ayeke lani anzoni wamungo diskur ayeda na ni pëpe. Adiskur ti ala asara si azo apensé lani so ala ye Jéhovah nga so ala mä yanga ti lo, me sarango ye ti ala na ndo ti tënë so afa so ala ye Jéhovah pëpe nga ala mä yanga ti lo pëpe. E hinga so sarango ye ti ala so anzere na Jéhovah pëpe. Ala sigigi na yâ ti bungbi ti lo.​—Mat. 10:1-6; Kus. 5:42; 20:20.

¹¹ A yeke nga lani kete ye pëpe na azo kue so angbâ be-ta-zo na bungbi ti Jéhovah ti fa tënë da na da. Na tongo nda ni, a yeke ngangu na mingi ti ala ti sara kusala ni. Me ala mä yanga. Tongana ngoi ayeke hon, ala hon ndo ti agingo bê ti ala, na Jéhovah airi tënë nzoni mingi na ndo ti ala. Tongana a wa mo ti fa tënë na ambeni lege nde so ade mo sara ni lâ oko pëpe, mo yeke sara ye tongana nyen? Mo yeke nduru ti tara ni?

Na ngoi so mbeni zo so e ye lo azia Jéhovah

12, 13. (a) Ngbanga ti nyen Jéhovah atene na e ti “zi zo ti sioni” na popo ti e? (b) Ye wa a lingbi ti duti kete ye pëpe na mbeni babâ na mama so ayeke aChrétien?

¹² Kite ayeke pëpe so e kue e yeda so ti nzere na lê ti Jéhovah a lingbi e sara ye alingbi na commandement  ti lo so ahunda ti duti na sioni oko pëpe na yâ ti aye kue. (Diko Tite 2:14.) Me ambeni ye ayeke dä so na yâ ni a lingbi ti duti ngangu na e ti sara ye alingbi na commandement so. Na tapande, gbu li na ndo ti ye so: Mbeni koli na wali ti lo so ayeke aChrétien be-ta-zo ayeke gi na molenge ti koli oko me lo dö tâ tënë lo zia. Ti wara “ngia na yâ ti siokpari teti kete ngoi” anzere na lo ahon songo ti lo na Jéhovah nga na babâ na mama ti lo. Sarango ye ti lo asara si lo lingbi pëpe ti ngbâ membre ti congrégation. Tongaso, a bi lo na gigi.​—aHéb. 11:25.

¹³ Babâ na mama ni ayeke na vundu mingi! Ala hinga so Bible ahunda ti “zia ti sara songo na mbeni zo so a iri lo ita na so lo yeke zo ti sarango lango-sioni, wala zo ti sarango bê ti ye, wala zo ti vorongo ayanda, wala zo ti zongango ndo, wala ngbâa ti sämba, wala zo ti mungo ye ti zo na likisi, na même ti tene ala te kobe na mara ti zo tongaso pëpe.” A tene nga atene: “Ala zi zo ti sioni na popo ti ala.” (1 aCor. 5:11, 13). Babâ na mama ni ahinga nga so tënë “mbeni zo” andu nga amembre ti sewa ni so alango pëpe da oko na ala. Me teti so ala ye molenge ti ala mingi, ala lingbi ti tene: ‘E yeke na bezoin ti sara lisoro mingi na molenge ti e tongana lege ayeke dä. E lingbi pëpe ti mû maboko na lo ti kiri na Jéhovah tongana e sara lisoro na lo pëpe.’ *

14, 15. Na ngoi so babâ na mama aye ti bâ wala ala yeke sara lisoro na molenge ti ala so a bi lo na gigi, nyen la a lingbi ala dabe ti ala na ni?

¹⁴ A sara e nzoni pëpe ti bâ vundu ti babâ na mama so. Lege ayeke dä lani na molenge ti ala ni ti changé. Me lo soro ti ngbâ ti sara ye ti sioni ahon ti duti na tere ti babâ na mama ti lo nga na aita ti congrégation. Babâ na mama ni aye ti mû maboko na molenge ti ala, me ala lingbi pëpe ti kanga lege na ye so molenge ni amû desizion ti sara. Biani, a yeke senge pëpe si ala yeke na vundu.

¹⁵ Me nyen la babâ na mama so ayeke sara? Ala yeke sara ye alingbi na commandement ti Jéhovah so ayeke polele so? Ala yeke gi ande araison ti sara songo lakue na molenge ti ala so bungbi abi lo na gigi na tenengo so a yeke teti “ambeni kota ye so andu sewa ni”? Na ngoi so ala yeke mû desizion na ndo ti tënë so, a lingbi ala dabe ti ala na ye so Jéhovah aye ala sara. A lingbi ala girisa pëpe so Jéhovah aye si azo ti lo aduti na sioni oko pëpe. Lo ye nga ti mû maboko na zo so asara ye ti sioni ti changé lege ti lo na ti kiri na yâ ti congrégation. Tongana nyen la ababâ na amama so ayeke aChrétien alingbi ti fa so ala kue aye ye so Jéhovah aye?

16, 17. Nyen la e lingbi ti manda na lege ti tapande ti Aaron?

¹⁶ Aaron, ita ti Moïse, ayeke lani na yâ ti mbeni kpale ndali ti ye so amolenge ti lo ti koli use asara. Nadab na Abihu so ayeke amolenge ti lo amû sandaga na mbeni lege so Jéhovah ayeda na ni pëpe. Jéhovah asara si wâ alondo na yayu aga agbi ala na afâ ala. Tara ti bâ vundu ti Aaron ndali ti ye so asi so. Lo lingbi mbeni pëpe ti sara lisoro na ala ndali ti so ala kui awe. Me mbeni ye ayeke dä so asara si ye so akiri aga ngangu  mingi na Aaron nga na sewa ti lo. Moïse atene na Aaron nga na tanga ti amolenge ti lo so Jéhovah aye pëpe ti tene ala sara vundu. Lo tene: “I zi kuali ti i pëpe, na i suru bongo ti i pëpe, si i kui pëpe, na ngonzo agbu L’Éternel tënë ti bungbi ti azo ni kue pëpe.” (Lév. 10:1-6). Tënë ni ayeke polele. A lingbi e ye Jéhovah mingi ahon amembre ti sewa ti e so ayeke be-ta-zo pëpe na Jéhovah.

¹⁷ Laso, Jéhovah ayeke fâ pëpe na lê ni lê ni azo so asara ye ague nde na andia ti lo. Lo fa so lo ndoye ala nga lo mû lege na ala ti zia lege ti aye ti sioni so ala sara. Me bê ti Jéhovah ayeke duti tongana nyen tongana babâ na mama ake yanga ti lo na ala pensé so ala yeke na araison mingi ti sara lisoro na molenge ti ala so a bi lo na gigi?

18, 19. Aye ti nzoni wa amembre ti sewa alingbi ti wara tongana ala ngbâ lakue be-ta-zo na Jéhovah?

¹⁸ Mingi ti azo so akiri na bungbi atene so ala kiri ndali ti so akamarade ti ala nga na afami ti ala angbâ be-ta-zo na Jéhovah na ala sara lisoro na ala pëpe. Na tapande, mbeni wali atene na a-ancien atene so mbeni ye so apusu lo ti changé aye na yâ ti fini ti lo ayeke sarango ye ti ita ti lo ti koli. Ita ti lo ti koli ni ayeke lani be-ta-zo na lo sara ye alingbi na commandement ti Jéhovah na ngoi so a bi ni na gigi. Ye so asara lani si lo ye ti kiri na bungbi.

¹⁹ Tongaso, a lingbi e sara nyen? A lingbi e mä yanga ti Jéhovah na yâ ti aye kue. Teti so e lingbi kue pëpe, na ambeni ngoi a lingbi ti duti ngangu na e. Me a lingbi e hinga na bê ti e kue so ye so Jéhovah ahunda na e ti sara ayeke lakue ndali ti nzoni ti e.

“Tënë ti Nzapa ayeke na fini”

20. E gbu nda ti versê ti aHébreu 4:12 na alege use, a yeke alege wa? (Bâ kete tënë na gbe ni.)

²⁰ Tongana Paul atene so “tënë ti Nzapa ayeke na fini”, lo yeke sara lani tënë ti Bible pëpe. * (aHéb. 4:12). Ambeni versê ti yâ ti chapitre so afa so lo yeke sara lani tënë ti azendo ti Nzapa. Paul ayeke tene lani so azendo ti Nzapa ayeke ga lakue tâ tënë. Jéhovah atene: “Fade tënë ti Mbi akiri na Mbi senge pëpe.” Lo tene nga lo tene: “Fade tënë ni awu na kusala so Mbi to lo dä.” (És. 55:11). Tongaso, a lingbi e kanga bê ti e e ku tongana ade Jéhovah asara pëpe si azendo ti lo aga tâ tënë na ngoi so e ku ti tene lo sara ni. E hinga biani so Jéhovah angbâ ti sara kua ti hunzi ye so leke ti sara.​—Jean 5:17.

21. Na lege wa aHébreu 4:12 alingbi ti mû maboko na ambakoro so ayeke na popo ti “azo mingi mingi” ti ngbâ ti sara na Jéhovah?

²¹ Mingi ti azo so ayeke na popo ti “azo mingi mingi” asara na Jéhovah asara angu mingi awe (Apoc. 7:9). Ala ku lani pëpe ti ga mbakoro na yâ ti sioni dunia so. Me ala ngbâ ti sara na Jéhovah na ngangu ti ala kue (Ps. 92:15). Ala hinga so “tënë ti Nzapa ayeke na fini” nga so azendo ti Jéhovah ayeke ga tâ tënë (aHéb. 4:12). Ala hinga so lo ngbâ ti sara kua ti sara si ye so leke ti sara teti sese nga na azo aga tâ tënë. Teti so ye so Nzapa aleke ti sara ayeke kota ye mingi na lê ti lo, a yeke nzere mingi na lo tongana e fa so ye so ayeke nga kota ye mingi na lê ti e. Na ngoi ti lango mbasambala ti wungo tere so, mbeni ye oko ayeke kanga lege pëpe na Jéhovah ti hunzi ye so lo leke ti sara. Lo hinga nga so azo ti lo, tongana a mû ala kue, ayeke ngbâ ti sara ye ague oko na ye so lo leke ti sara. Mo nga kue mo yeke sara ni? Mo lï na yâ ti wungo tere ti Nzapa awe?

[Akete tënë na gbe ni]

Mo dabe ti mo na ni?

• Nyen la a lingbi e sara ti lï na yâ ti wungo tere ti Nzapa laso?

• Na ngoi so e manda na yâ ti Bible ye so Nzapa aku na mbage ti e, tongana nyen la e yeke fa so e ye ti zia ngia na bê ti lo?

• Aye wa so na yâ ni a lingbi ti duti ngangu na e ti sara ye so Jéhovah ahunda na e ti sara? Me ngbanga ti nyen a yeke kota ye ti tene e mä yanga ti lo?

• E gbu nda ti versê ti aHébreu 4:12 na alege use, a yeke alege wa?

[Ahundango tënë ti manda na ye]

[Foto na lembeti 31]

Babâ na mama ayeke na vundu mingi!