A-Da ti Royaume ayeke teti azo kue
Tondo so alondo na awafango tënë ti Royaume
A-Da ti Royaume ayeke teti azo kue
NA NGOI so lo yeke fa ye na adisciple ti lo teti kusala ti fango tënë na gbele azo kue, Jésus Christ awa ala ti “fa tënë so na ndo da.” (Matthieu 10:27). Biani, a hunda na ala ti sala kusala ti ala ti Chrétien polele, na lê ti azo kue. Na salango ye alingbi na wango so, aTémoin ti Jéhovah ayeke sala nga kusala ti ala polele. Salango ye polele so amû lege na aTémoin ti hon ndo ti akangango lege nga ti tene a sala anzoni tënë na ndo ti ala.
Atâa so azo kue alingbi ti gue na abungbi ti aTémoin ti Jéhovah, asioni bibe asala si ambeni zo asala mbito kete ti lï na yâ mbeni Da ti Royaume. A yeke ye so asi na Finlande. Ambeni zo asala gi kamene ti gue na afini ndo. Tongana a leke mbeni fini Da ti Royaume wala a kiri aleke yâ ti mbeni ngbele da ni, mingi ni a leke mbeni lango so azo kue alingbi ti gue ti bâ yâ ti da ni senge. Mingi ni a yeke sala ngangu ti hiri azo so alango ndulu na tele ti da ni ti ga ti bâ yâ ti Da ti Royaume ni na ti hinga ye na ndo kusala ti aTémoin ti Jéhovah.
Na mbeni ndo, na lango so aTémoin amû ti tene azo kue aga abâ yâ ti fini Da ti Royaume ti ala, ala leke nga ti kangbi apériodique. A-Témoin use atingbi na mbeni kangba koli so atene ni yeke na ngia mingi ti diko Tour ti Ba Ndo na Réveillez-vous! Aita ni atene na lo so azo kue alingbi ti gue ti bâ Da ti Royaume ti ala na ala hunda lo ti mû lo ti gue na lo kâ. Koli ni atene so lo yeke duti na ngia ti gue legeoko na ala. Na mango lisoro ni, wali ti koli ni adë kongo, “Mbi na mo e gue!”
Tongana lo lï na yâ Da ti Royaume ni, koli so abâ ndo na tele ti lo na lo tene: “A vuko oko pëpe. A yeke pendere nga yâ ni aza. A tene na mbi so aye ti yâ ti Da ti Royaume ni kue ayeke duti ande gi avuko ye!” Koli ni na wali ti lo angbâ kete na ala hunda ambeni mbeti so a tanda ni.
Mbeni kongregation aye lani ti fa na yâ mbeti-sango ti ndo ni tënë ti salango matanga ti zingo yanga Da ti Royaume ti ala, so azo kue alingbi ti gue dä. Tongana mbeti ni asi na tïtî lo, mokonzi ti awasungo mbeti-sango ni ahunda ti tene a sû mbeni kete mbeti na ndo ni. Aita ni ayeda, nga ngoi kete na pekoni, mbeni kete mbage ti mbeti-sango ni asala pendere tënë na ndo ni. Tënë ni ayeke na ndo ti matanga ni nga afa akusala ti kongregation ti aTémoin ti Jéhovah ti ndo ni so.
Na peko ti so article ni asigigi awe, mbeni Témoin so ayeke mbakoro atingbi na mbeni voizin ti lo so atene: “A sala mbeni pendere tënë na ndo ti aTémoin ti Jéhovah na yâ mbeti-sango ti laso!” Ita-wali ni awara lege ti fa tënë na lo nga na pekoni lo zia na tïtî lo brochure Les Témoins de Jéhovah du XXe siècle.
Na ndo ti so a zi polele nda ti atënë ti mvene so abi na li ti aTémoin ti Jéhovah, mara ti aye tongaso, so andu tënë ti guengo ti bâ yâ ti afini Da ti Royaume nga ti salango matanga ti zingo yanga-da ni, apusu awafango tënë ti duti ndulu ti hiri azo mingi ti ga na abungbi. Tâ tënë, na akodoro mingi, so andu nga Finlande, azo amanda so aDa ti Royaume ti aTémoin ti Jéhovah ayeke teti azo kue.