Kozo ye so mbaï so ayeke na Deutéronome 22:25-27 aye ti fa ayeke pëpe tënë so ayeke na li ti koli ni, ndali ti so mbaï ni afa awe so tënë ayeke na li ti lo. Ndia so aye ti fa so tënë ayeke na li ti wali ni ape. Bâ ambeni versê so ayeke na terê ni.

Aversê so aga kozo asara tënë ti mbeni koli so abungbi na mbeni wali, so mbeni koli aga na peko ti lo, “na yâ ti gbata”. So lo bungbi na lo, tënë ti lango-sioni ayeke na li ti lo, ndali ti so a bâ lani mbeni wali so mbeni koli aga na peko ti lo tongana wali so asara mariage awe. Ka ti wali ni? “Lo dekongo na yâ ti gbata ni pëpe”. Tongana lo dekongo fade, azo ayeke mä lo biani na ala yeke ga ti mû maboko na lo. Me lo dekongo ape. Ndani la lo nga kue lo sara lango-sioni, tongaso a tene so tënë ayeke na li ti ala use kue.—Deut. 22:23, 24.

Na pekoni, Ndia ni afa mbeni ye nde so alingbi ti si: “Me tongana, na yâ ti ngonda, mbeni koli atingbi na mbeni molenge-wali so koli aga na peko ti lo awe, na lo lango na lo teti so ngangu ti lo ahon ti wali ni, gï koli ni la ayeke kui, me mo sara ye oko na wali ni pëpe. Lo sara pëpe mbeni siokpari so alingbi na kuâ. Ye ni so ayeke tongana ti so mbeni koli apika mba ti lo si lo fâ lo. Lo tingbi na molenge-wali ni na yâ ti ngonda, na molenge-wali ni adekongo, me zo ti mû maboko na lo ayeke dä pëpe.”—Deut. 22:25-27.

Na yâ ti ye so, ajuge ni ayeda lani so wali ni “adekongo, me zo ti mû maboko na lo ayeke dä pëpe.” Tongaso, lo sara lango-sioni ape. Ye oko, tënë ti langongo na ngangu na wali so koli aga na peko ti lo nga na tënë ti lango-sioni ayeke na li ti koli ni ndali ti so ‘lo lango na wali ni teti so ngangu ti lo ahon ti lo’.

Tongaso, atâa so ndia ni aye ti fa so tënë ayeke na li ti wali ni ape, mbaï ni afa gï so tënë ayeke na li ti koli ni ndali ti so lo lango na wali ni na ngangu nga lo sara lango-sioni. E yeke na kite ape so ajuge ni ‘agi ti hinga tënë na ndö ni mbilimbili’ nga so ala mû mbeni desizion so ague oko na aye so Nzapa ahunda na e ti sara so lo fa ni polele fani mingi.—Deut. 13:14; 17:4; Ex. 20:14.