MO SARA maboko ti mo mo bara voizin ti mo. Ade ti ninga ape, mo bâ so lo yeke bâ ka mo na sewa ti mo. Lo nga kue lo sara maboko ti lo, lo bara mo. Lo iri mo ti ga, na lo tene: “Mbi peut ti hunda na mo mbeni tënë? Nyen la asara si ala yeke nde so?” Mo ngbâ mo hunda lo, mo tene: “E yeke nde ni tongana nyen?” Lo tene, “Ala yeke aTémoin ti Jéhovah, ni la? Ala yeke tongana tanga ti azo ape. Ala yeke mû ka tere ti ala na atanga ti abungbi ti nzapa ape, ala yeke sara ka ti ala afête ape, tënë ti poroso abâ ala ape nga ala yeke sara bira ape. Ala yeke nyon ka manga ape. Nga na bango ni, sewa ti mo ayeke sara ye gi na lege ni. Nyen la asara si ala yeke ti ala tâ nde tongaso?”

Kiringo tënë ni ayeke ngangu ape, a yeke so: E yeke na gbe ti komandema ti Royaume ti Nzapa. Teti so Jésus ayeke Gbia, lo ngbâ ti leke e nzoni. Lo ngbâ ti mû maboko na e ti tambela na peko ti lo, tongaso si e duti nde na yâ ti sioni dunia so. Na yâ ti mbage so, e yeke bâ ande tongana nyen la Royaume ni ayeke leke awakua ti Nzapa ti tene ala duti na nzoni songo na Jéhovah, ti duti na nzoni sarango ye nga ti leke yâ ti bungbi ni. Gbia ni ayeke sara aye ni so kue ti mû gloire na Jéhovah.