YE TI MANDA 12
Nyen la ayeke mû maboko na mo ti ngbâ ti manda Bible?
Mandango Bible ayeke ga na zo anzoni ye, me ti sara ni a yeke lakue kete ye ape. Na ambeni ngoi, peut-être mo yeke hunda terê ti mo wala mo peut ti ngbâ ti manda Bible. Ngbanga ti nyen la a yeke nzoni ti sara effort ti ngbâ ti manda ni? Nyen la apeut ti aidé mo ti ngbâ ti manda ni atâa mo wara akpale?
1. Ngbanga ti nyen la a yeke kota ye ti manda Bible?
“Tënë ti Nzapa ayeke na fini na ayeke na ngangu ti sara ye.” (aHébreu 4:12). Bible ayeke ye ti ngangu ngere ndali ti so afa na mo apensé ti Jéhovah na ndö ti mo. A yeke mû maboko na mo ti wara hingango ye, tâ ndara nga na beku. Kota ye ni ayeke so Bible ayeke mû maboko na mo ti ga kamarade ti Jéhovah. Na ngoi so mo yeke manda Bible, mo yeke mû lege na ngangu so Bible ayeke na ni ti sara si gigi ti mo aga nzoni mingi.
2. Ngbanga ti nyen la a yeke kota ye ti hinga so atâ tënë ti Bible ayeke ye ti ngangu ngere?
Atâ tënë so ayeke na yâ ti Bible ayeke tongana aye ti ngangu ngere. Ndani la Bible awa e ti ‘vo tâ tënë, na ti kä ni lâ oko pëpe’. (aProverbe 23:23). Tongana e bata na li ti e so atâ tënë ti Bible ayeke ye ti ngangu ngere, e yeke sara kue ti ngbâ ti manda ni atâa e wara akpale.—Diko aProverbe 2:4, 5.
3. Tongana nyen la Jéhovah apeut ti aidé mo ti ngbâ ti manda Bible?
Jéhovah, so ngangu ti lo ahon angangu kue, so acréé mo nga so ayeke Kamarade ti mo aye ti mû maboko na mo ti hinga lo. Lo peut ti zia na bê ti mo “nzara ti sara ye nga na ngangu ti sara ye ni so.” (Diko aPhilippien 2:13.) Tongaso, na ambeni ngoi tongana mo bezoin ti wara nzara mingi ti manda ye wala ti sara ye alingbi na ye so mo manda, lo peut ti aidé mo. Tongana mo bezoin ngangu encore ti hon ndö ti akpale wala kangango lege, lo peut ti mû ni na mo. Hunda na Jéhovah lakue na yâ ti sambela ti mû maboko na mo ti ngbâ ti manda Bible.—1 aThessalonicien 5:17.
GI TI HINGA AYE MINGI
Gi ti hinga tongana nyen la mo peut ti ngbâ ti manda Bible atâa mo yeke na akua mingi wala azo akanga lege na mo. Na pekoni, bâ tongana nyen la Jéhovah ayeke aidé mo ti ngbâ ti manda ni.
4. Sara kue ti tene mandango Bible ti mo aduti kota ye na lê ti mo
Na ambeni ngoi e yeke na aye mingi ti sara, a sara si e bâ so e yeke na ngoi mingi ape ti manda Bible. Nyen la apeut ti mû maboko na e? Diko aPhilippien 1:10, na pekoni kiri tënë na ahunda so:
-
Mo pensé ambeni ye wa la ayeke “aye so ayeke akota ye mingi ahon atanga ni” na yâ ti fini ti mo?
-
Nyen la mo peut ti sara ti fa so mandango Bible ti mo ayeke kota ye na lê ti mo?
-
Tongana mo fû mbutu na yâ ti seau si mo ye ti zia atênë dä, atênë ni kue ayeke gue na yâ ti seau ni ape
-
Tongana mo zia atênë ni kozo, mo yeke wara place ti zia mbutu dä gbani. Legeoko nga, tongana mo zia “aye so ayeke akota ye mingi” kozo na yâ ti fini ti mo, mo yeke wara lege ti sara ni nga ngoi ayeke ngbâ na mo ti sara ambeni ye nde
Mandango Bible ayeke kaï bezoin ti aye ti yingo so e yeke na ni, so ti tene bezoin so e yeke na ni ti hinga Nzapa nga ti voro lo. Diko Matthieu 5:3, na pekoni kiri tënë na hunda so:
-
Tongana e bâ mandango Bible ti e tongana kota ye, ye ti nzoni wa la e yeke wara?
5. Ngbâ ti manda Bible atâa a kanga lege na mo
Na ambeni ngoi, azo apeut ti gi ti découragé mo ti tene mo manda Bible ape. Bâ tapande ti Francesco. Zia VIDÉO ni, na pekoni kiri tënë na ahunda so:
-
Na yâ ti vidéo ni, akamarade ti Francesco nga na afami ti lo asara ye tongana nyen na ngoi so lo tene na ala so lo yeke manda Bible?
-
So lo ngbâ ti manda Bible, futa ti nyen la lo wara?
Diko 2 Timothée 2:24, 25, na pekoni kiri tënë na ahunda so:
-
Afami nga na akamarade ti mo apensé ti ala nyen na ndö ti aye so mo yeke manda so?
-
Ti gue oko na aversê so, a yeke nzoni mo sara ye tongana nyen tongana a nzere na mbeni zo ape so mo yeke manda Bible? Ngbanga ti nyen?
6. Zia bê ti mo na Jéhovah ti aidé mo
Tongana mo ga nduru na Jéhovah, mo yeke ye mingi ti zia ngia na bê ti lo. Me mo peut ti bâ so a yeke ngangu na mo ti sara achangement na yâ ti fini ti mo ti sara ye so Jéhovah ahunda na mo. Tongana mo pensé tongaso, découragé ape. Jéhovah ayeke aidé mo. Zia VIDÉO ni, na pekoni kiri tënë na ahunda so:
-
Na yâ ti vidéo ni, achangement wa la Jim asara ti zia ngia na bê ti Jéhovah?
-
Nyen la andu bê ti mo mingi na yâ ti tapande ti lo?
Diko aHébreu 11:6, na pekoni kiri tënë na ahunda so:
-
Nyen la Jéhovah ayeke sara ndali ti “azo so ayeke gi lo ngangu”, so ti tene, azo so asara kue ti gi ti hinga lo nga ti zia ngia na bê ti lo?
-
Ti gue oko na versê so, tongana Jéhovah abâ a-effort so mo sara ti manda Bible, eskê a nzere na lo? Mo tene tongaso ngbanga ti nyen?
AMBENI ZO APEUT TI HUNDA MO ATENE: “Ngbanga ti nyen la mo yeke manda Bible?”
-
Mo yeke tene nyen?
NA NDURU TËNË
Atâa so mandango Bible ayeke lakue kete ye ape, a peut ti aidé mo ti duti na ngia lakue lakue. Ngbâ ti zia bê ti mo na Jéhovah, lo yeke futa mo.
Dango bê
-
Ngbanga ti nyen la atâ tënë ti Bible ayeke ye ti ngangu ngere na lê ti mo?
-
Tongana nyen la mo peut ti “hinga biani aye so ayeke akota ye mingi ahon atanga ni”?
-
Ngbanga ti nyen la a lingbi mo hunda Jéhovah ti aidé mo ti ngbâ ti manda Bible?
GI NDA TI YE
Bâ aye osio so a-aidé azo mingi ti sara kua nzoni na ngoi ti ala.
“Lege ti sara kua nzoni na ngoi ti mo” (Zingo na lango!, février 2014)
Bâ tongana nyen la Jéhovah amû maboko na mbeni wali so koli ti lo ahinga pëpe ndani so lo yeke sara effort ti zia ngia na bê ti Nzapa.
Bâ tongana nyen la mbeni koli abâ nzoni ndali ti so wali ti lo angbâ ti manda Bible.
A yeke si ka so ambeni zo atene aTémoin ti Jéhovah ayeke ga na kangbi na yâ ti asewa. Me eskê a yeke tâ tënë?
Bâ nga
ATËNË SO AZO AYEKE HUNDA KA
A-Témoin ti Jéhovah ayeke manda Bible na azo tongana nyen?
Mo peut ti sara kua na traduction ti Bible so mo ye na temps so a-Témoin ti Jéhovah ayeke manda Bible na mo senge senge. Mo peut ti tisa afami ti mo kue wala ambeni kamarade ti mo.
