MO HINGA sambela so Jésus afa lani na adisciple ti lo?— Tongana mo hinga ni ape, e lingbi ti diko ni na yâ ti Bible, na Matthieu 6:9-13. Azo mingi ahiri sambela so, Babâ ti e so ayeke na yayu. A wara atënë so dä: “E ye royaume ti Mo aga.” Royaume ti Nzapa ayeke nyen? Mo hinga ni?—

Royaume ayeke mbeni yanga-ti-komande wala ngorogbia. Mara ti angorogbia ayeke nde nde. Na ambeni kodoro, a yeke mbeni zo, so a hiri lo Président, si ayeke mû li ni. Me ngorogbia so Nzapa amû zendo ni ayeke mbeni Royaume. Mokonzi ni ayeke mbeni Gbia.

Zo wa si Jéhovah Nzapa amû lo ti duti Gbia ti ngorogbia ti Lo?— A yeke Molenge ti Lo, Jésus Christ. Ngbanga ti nyen lo yeke nzoni mokonzi ahon amokonzi kue so azo alingbi ti soro?—  Ngbanga ti so Jésus aye biani Babâ ti lo, Jéhovah. Lo yeke sala lakue ye so ayeke mbilimbili.

Giriri kozoni si a dü Jésus na Bethléhem, Bible asala tënë ti dungo lo, na lo tene so lo yeke ga Mokonzi so Nzapa asoro. Zia e diko tënë na ndo ni, na Esaïe 9:5, 6. A tene: ‘A dü Molenge na e, A mû Molenge-koli na e, na fade ngangu ti komande [wala ngorogbia] ayeke na ndogo ti Lo; fade a di iri ti Lo Mokonzi Ti Siriri. Fade nda ti wungo ti royaume ti Lo [wala ngorogbia ti lo] na ti siriri ayeke pëpe.’

Na yâ ti versê so, Jésus ayeke na li ti Royaume ti Nzapa. Ni la a hiri lo “Mokonzi”. Lo yeke nga Molenge ti Kota Gbia, Jéhovah. Me Jéhovah asala nga si Jésus aga Gbia ti ngorogbia ti Lo, so fade ayeke komande na ndo ti sese teti ngu saki oko (Apocalypse 20:6). Na peko ti so Jésus awara batême awe, lo komanse “ti fa tënë, Lo tene, I changé bê ti i, teti royaume ti yayu ayeke ndulu.”​—Matthieu 4:17.

Ti mo, ngbanga ti nyen Jésus atene so Royaume ni ayeke ndulu?— Ngbanga ti so Gbia ni, lo so ayeke komande ande na yayu kâ, ayeke tâ gi na popo ti ala! Ndani la si Jésus atene: “Royaume ti Nzapa ayeke na popo ti i.” (Luc 17:21). Mo ye ti tene Gbia so Jéhovah asoro lo aduti ndulu na mo si mo lingbi ndu lo, ni la ape?—

Tene na mbi, kota kua wa Jésus aga lani ti sala na ndo ti sese?— Jésus akiri tënë na ni, lo tene: ‘A yeke ngbanga ti Mbi ti fa nzo tënë ti royaume ti Nzapa na ambeni kodoro nga; teti A tokua Mbi teti tënë so.’ (Luc 4:43). Jésus ahinga so lo lingbi ti hunzi kua ni gi lo oko pëpe. Tongaso, lo sala nyen?—

Jésus amû azo na tele ti lo, na lo fa na ala tongana nyen ti fa tënë. Akozo zo so lo fa ye na ala ayeke  lani azo 12 so lo soro ala tongana abazengele (Matthieu 10:5, 7). Me Jésus afa kusala so gi na abazengele ti lo oko? Oko pëpe, Bible atene so Jésus afa nga ye na ambeni zo mingi ti fa tënë. Na mbeni ngoi, lo tokua ambeni disciple 70 ti gue kozoni na lo ti fa tënë. Lo tokua ala use use. Ala fa lani nyen na azo?— Jésus atene: “I tene na ala, Royaume ti Nzapa aga ndulu na i.” (Luc 10:9). A yeke na lege so si azo amä lani tënë na ndo ngorogbia ti Nzapa.

Giriri, na Israël, afini gbia ayeke duti ka na ndo ti alele ti fa tele ti ala na azo. A yeke ye so Jésus asala tongana lo gue ti tanga ni na Jérusalem. Mo bâ, Jésus ayeke komande ande na yâ Royaume ti Nzapa. Azo aye si lo ga Gbia ti ala?—

Na ngoi so lo yeke tambela na ndo ti lele ni, gbâ ti azo akomanse ti gbala abongo ti ala na ndo ti lege na gbele lo. Ambeni afâ amaboko ti akeke na ala zia ni na ndo ti lege ni. Ala fa biani so ala ye si Jésus aga Gbia ti ala. Ala dekongo: “Sala tënë nzoni na Gbia so aga na iri ti Seigneur!” Me a yeke azo kue si ayeke na ngia pëpe. Ambeni mokonzi ti vorongo atene na Jésus: ‘Tene na adisciple ti mo ti kanga yanga ti ala.’​—Luc 19:28-40.

Alango oku na pekoni, a gbu Jésus na a gue na lo na yâ mbeni da na gbele gouverneur, Ponce Pilate. Awato ti Jésus atene so lo tene ni yeke gbia, na so lo ke ngorogbia ti Rome. Tongaso, Pilate ahunda Jésus na ndo ni. Jésus afa so lo yeke gi ti kinda ngorogbia ni pëpe. Lo tene na Pilate: “Royaume ti Mbi ayeke ti sese so pëpe.”​—Jean 18:36.

Pilate asigigi na lo tene na azo ni so lo bâ ti lo pëpe mbeni sioni so Jésus asala. Me ti so, azo ni aye ti tene Jésus aga Gbia ti ala mbeni pëpe. Ala ye si a zi lo pëpe (Jean 18:37-40). Pilate akiri asala tënë na Jésus. Lo ga ti bâ biani so Jésus asala ye ti sioni oko pëpe.  Tongaso, tongana lo sigigi na Jésus ti ndangba ni, Pilate atene: “Bâ, Gbia ti i!” Me azo ni adekongo: “Fâ Lo, fâ Lo, fâ Lo na [keke ti pasi]!”

Pilate ahunda: “I ye mbi fâ Gbia ti i na [keke ti pasi]?” Amokonzi ti vorongo ni akiri tënë: “E yeke na mbeni gbia pëpe, gi César oko.” So tënë! Asioni prêtre so awara lege ti pusu azo ti ke Jésus!​—Jean 19:1-16.

Laso, aye akpa mingi aye ti ngoi ti Jésus. Mingi ti azo ake biani ti tene Jésus aga Gbia ti ala. Ala yeke tene peut-être so ala mä na bê na Nzapa, me ala ye pëpe ti tene Nzapa wala Christ afa na ala ye so a lingbi  ala sala. Ala ye gi angorogbia ti ala mveni na ndo ti sese ge.

Ka ti e? Tongana e manda ye na ndo Royaume ti Nzapa nga na apendere ye kue so lo yeke sala ande, e yeke bâ Nzapa tongana nyen?— E ye lo, ni la ape?— Tongaso, tongana nyen e lingbi ti fa na Nzapa so e ye lo, na so e ye si Royaume ti lo akomande na ndo ti e?—

E lingbi ti fa na Nzapa ye so ayeke na yâ bê ti e na mungo peko ti tapande ti Jésus. Jésus asala ti lo lani nyen ti fa so lo ye Jéhovah?— Lo tene: “Mbi sala ye so amû ngia na Lo lakue.” (Jean 8:29). Tâ tënë, Jésus aga na sese ti ‘sala ye so bê ti Nzapa aye’ na “ti sala kusala ti Lo kue.” (aHébreu 10:7; Jean 4:34). Bâ ye so Jésus asala lani kozoni si lo komanse ti fa tënë.

Jésus ague awara Jean Baptiste na tele ti Ngu ti Jourdain. Tongana ala lï na yâ ti ngu awe, Jean ayôro Jésus na yâ ti ngu ni kue, na pekoni lo sigigi na lo. Ngbanga ti nyen Jean abatize Jésus? Mo hinga nda ni?—

Jésus la ahunda Jean ti batize lo. Tongana nyen e hinga so Nzapa aye si Jésus awara batême?— Na lege so tongana Jésus asigigi na yâ ti ngu ni  awe, lo mä go ti Nzapa na yayu kâ atene: “Mo yeke Molenge ti Mbi so Mbi ndoye Mo, Mo mû ngia na Mbi mingi.” Nzapa atokua même yingo vulu ti lo tongana mbeni pigeon na ndo Jésus. Tongaso, na warango batême, Jésus afa so lo ye ti sala kusala ti Jéhovah na yâ fini ti lo kue, wala teti lakue lakue.​—Marc 1:9-11.

Ti fadeso, mo de molenge. Me mo yeke sala ande nyen?— Mo ye ti duti tongana Jésus na ti wara batême?— A yeke nzoni mo mû tapande ti lo, teti Bible atene so lo zia mbeni ‘tapande na i si i lingbi tambela na peko ti Lo.’ (1 Pierre 2:21). Tongana mo wara biani batême, mo yeke fa so mo ye biani ti tene Royaume ti Nzapa akomande na ndo ti mo. Me a hunda ti wara gi batême pëpe.

A lingbi e bata nga ye kue so Jésus afa. Jésus atene so a lingbi e “duti ti sese so pëpe”. Tongana e bi tele ti e na yâ aye ti sese so, e yeke mä yanga ti Jésus la? Jésus na abazengele ti lo angbâ lani yongoro na aye tongaso (Jean 17:14). Me ala sala nyen na mbage?— Ala fa tënë ti Royaume ti Nzapa na azo. Kusala so ayeke lani kota ye mingi na yâ fini ti ala. E lingbi ti sala tongaso nga?— E lingbi, na e yeke sala ni tongana na yâ tënë ti e, e fa biani so e ye si Royaume ti Nzapa aga.