Ntsrhaku ka loko a babatisiwile, Yesu a sungula ku zrezra a ku: ‘A Mfumu wa Xikwembu Nkulukumba wu le kusuhi.’ A zrezra a Galileya ni le Yudeya nakone a vadondzrisiwa vake a va li na yene. Loko Yesu a tlhelela ka doropa ledzri a pswaleliwiki ka dzrone, ku nga Nazareta, a ya sinagogeni. Hiloko a pfula buku dzra Ezaya a va a dzri dondzra hi zritu dzra le henhla a ku: ‘A moya wa Yehovha wu le henhla kwanga hikusa a ni hlawulile akuva ni twalisa madzrungula lamanene.’ Xana leswo a swi tlhamuxela yini? A swi tlhamuxela leswaku nambileswi vhanu a va djula ku vona Yesu na a yentxa mahlolana, a nkongometo wa kuva a nyikiwe moya wa ku xwenga a a li wa kuva a zrezra madzrungula lamanene. Ntsrhaku ka leswo a byela lava a va mu yingiseta a ku: ‘Namunhla a tsralwa ledzri ma ha ka ku dzri yingela dzri hetisekile.’

Hi ku landzrela, a suka a ya lwandle dzra Galileya, lani a tlhasiki a kuma mune wa vadondzrisiwa vake lava a va li vaphasi va tihlampfi. Kutani Yesu a va byela a ku: ‘Ni landzrani, ni ta mi yentxa vaphasi va vhanu.’ A mavito yavu hi lawa: Petro, Andreya, Yakobe na Yohane. Hi ku kahlula va tsrhika ntizro wavu wa ku phasa tihlampfi va va va mu landzrela. Va famba ka doropa hinkwadzru dzra Galileya na va zrezra madzrungula lamanene ya Mfumu wa Xikwembu Nkulukumba, nakone a va zrezra masinagogeni, mabazara ni le tindleleni lomu a ku kumeka vhanu. Phela a va landzriwa hi vhanu vanyingi kun’wana ni kun’wana lani a va ya kone. Xileswo a madzrungula lamanene mayelanu na Yesu ma hangalakile ka matlhelo hinkwawu ku ya tlhasa a Asiriya.

Hi ku famba ka nkama, Yesu a nyika van’we ka vadondzrisiwa vake wuswikoti bya ku daha mavabyi ni bya ku hlongola mademona, kasi lavan’wana va mu landzrela nkama lowu a fambaka a zrezra hi doropa ni doropa, ni hi muti ni muti. Kwavu a ku ni ni vavasati va vanyingi va ku dumbeka va ku fana na Mariya Magadala, Yowana na Suzana, lava hi ku tizrisa mintxhumu yavu, a va pfuna Yesu kun’we ni vadondzrisiwa vake.

Ntsrhaku ka kuva Yesu a va byela tindlela ta ku zrezra ha tone, a va zruma ku yentxa ntizro lowo. Loko va li kazri va famba a tikweni hinkwadzru dzra Galileya, vhanu vanyingi va ve vadondzrisiwa va tlhela va babatisiwa. Phela a va li vanyingi lava a va djula ku ndzruluka vadondzrisiwa lakakuva Yesu a va fanisa ni nsimu leyi a yi lulamele ku tsrhoveliwa. Kutani a byela vadondzrisiwa vake a ku: ‘Kombelani n’winyi wa ntsrhovelo leswaku a zrumela vatizri a ntsrhovelweni wake.’ Hi ku famba ka nkama a zruma 70 wa vadondzrisiwa vake, a va zruma na va li  vabidzrivabidzri leswaku va ya zrezra a tikweni hinkwadzru dzra Yudeya. Kutani va dondzrisa vhanu va tinxaka hinkwatu mayelanu ni Mfumu wa Xikwembu Nkulukumba. Loko vadondzrisiwa va tlhelela, a va nyonxe ngopfu lakakuva a va djula ku dzrungulela Yesu leswi va swi kumiki. A ku nga na ntxhumu lowu Sathana a a ta wu yentxa lowu a wu ta yimisa ntizro wa ku zrezra.

Yesu a tiyisekise vadondzrisiwa vake leswaku a va ta tama va hamba xiyenge xa lisima ka ntizro lowu ntsrhaku ka loko a tlhelelile matilweni. A va byele a ku: ‘Zrezrani madzrungula lamanene ya Mfumu wa Xikwembu Nkulukumba a misaveni hinkwayu. Mi dondzrisa vhanu mayelanu ni Zritu dzra Xikwembu Nkulukumba, mi tlhela mi va babatisa.’