Chakul cha Bibil

“Yerusalem musu,” madi mazu madia tupamp twaad mu Bibil, mamekeshin musumb wa chifanakesh udia chisak cha in kwilej a Yesu akuya mwiur mulong wa kuyikel nend mu Want wa Nzamb. (Kujingunik 3:12; 21:2) Bibil ulejen anch chisak chinech akutwish kand kuchitazuk anch ngachik wa Kristu.

Mutapu wa kumujingunin Yerusalem Musu

  1. Yerusalem Musu udi mwiur. Chisu chawonsu chisambidinay Bibil piur pa Yerusalem Musu, ukat kulond anch udiokil mwiur, mudia angel alamina yis ya musumb winou. (Kujingunik 3:12; 21:2, 10, 12) Chikwau kand, kujimb kwa musumb winou kumekeshin anch ukutwishap kwikal pa divu. Musumb winou wading wisikena pa kulep ni pa kujimb kwa ‘12 000 stade’ ap “akilometre tunan twaad ni yitot yaad” ushad ni ushad. * (Kujingunik 21:16) Kulep kwend kwa kudiokal pansh kuya mwiur kwafanyina kwikal kwa akilometre 560.

  2. Yerusalem Musu chidi chisak cha in kwilej a Yesu, ap anch ngachik wa Kristu. Yerusalem Musu amutazukin anch “ngachik, mband wa Mwan a Mukoku.” (Kujingunik 21:9, 10) Mu kulond kwinoku kwa chifanakesh, Mwan a Mukoku udi Yesu Kristu. (Yohan 1:29; Kujingunik 5:12) “Mband wa Mwan a Mukoku,” udia ngachik wa Kristu, umekeshin in Kristu akubombakana pamwing ni Yesu mwiur. Bibil ufanakeshin uruund udia pakach pa Yesu ni in Kristu inay mudi uding pakach pa ikundj ni mukajend. (2 Korint 11:2; Efes 5:23-25) Chikwau kand, mayal ma mufulandal wa Yerusalem Musu afundinap “majin [dikum ni yaad] ma atwimbuy dikum ni aad a Mwan a Mukoku.” (Kujingunik 21:14) Chom chinech chitukwashin kumujingunin Yerusalem Musu, mulong in Kristu atazukinau mulong wa kuya mwiur adi ‘atunginau pa mufulandal wa atwimbuy ni aprofet.’—Efes 2:20.

  3. Yerusalem Musu chidi chikunku cha guvernema. Yerusalem wa pasak wading musumb ujim wa Isarel, mwayikelay Mwant David, mwanend Salomon ni an a majuku mau pa ‘ditand dia Yehova.’ (1 Jinsangu 29:23) Yerusalem watazukangau anch “musumb utumbila,” wading umekeshin winyikel wa Nzamb kusutil an a David. (Nehemiy 11:1) Yerusalem Musu utazukinau kand anch “musumb utumbila,” amusadin kudi antu ibombina kudi Yesu mwiur mulong wa ‘kuyikel mudi ant pa divu.’—Kujingunik 5:9, 10; 21:2.

  4. Yerusalem Musu ukulet yiyukish kudi antu adia pa divu. Yerusalem Musu amumekeshin mudi “wadinga ni kushirik, udiokil mwiur kudi Nzamb,” charumburik anch Nzamb ukat kumusadin kadiap kwau ching mulong wa kutal milong ya mwiur. (Kujingunik 21:2) Mazu minam makwashin kwijik kukwatijan kudia pakach pa Yerusalem Musu ni Want wa Nzamb, usadidinay Nzamb mulong wa kuwanyish rusot rend “pansh mudi mwiur.” (Mateu 6:10) Chitongijok cha Nzamb piur pa antu adia pa divu chikwet yiyukish yilondwilaku ey:

    • Kupwa kwa chitil. “Wit wa mem ma mwom” madiokil mu Yerusalem Musu ni makwashin ‘mitond ya mwom’ yidiaku mulong wa “kuyok nich in michid.” (Kujingunik 22:1, 2) Kwok kwinoku kwa mu spiritu ni kwa ku mujimbu kukudiosh chitil ni kuyikwash antu kwikal kand ni mwom uwanyidina, mudi mwading chitongijok chakusambish cha Nzamb.—Rom 8:21.

    • Urund uwamp pakach pa antu ni Nzamb. Chitil chayitwala antu kulemp ni Nzamb. (Isay 59:2) Kupwa kwa chitil kukuwanyish kamu uprofet ulondina anch: “Katat ndond ya kushakam ya Nzamb yidi pakach pa antu! Ndiy ukez kushakam nau pamwing, niyau akwikal antwend. Nzamb amwinend ukez kushakam nau pamwing, chad ukwikal Nzamb wau.”—Kujingunik 21:3.

    • Disudiel dia mar ni rufu. Kusutil Want wend, Nzamb “ukez kayikusol mansoj mawonsu ku mes mau. Kukez kikalap kand rufu, ap madil, ap kwishikokin, ap kusansan, mulong yom yikur kiyamekanap kand.”—Kujingunik 21:4.

^ par. 5 Stade umwing chading chipim cha kulep chasadinangau in Rom chikutwisha kwisikan ni ametre 185.