1. Со амэндэ по ди, кала амэ лас тэ гиндосарас, сар о Иегова вся создал?

 КАЛА амэ гиндосарас, саво шукаримос создал о Иегова амэндэ по ди кадэлэстар бари радость. Кацаво по ди сас и кай о Давид, во ԥэндя лэ Иеговасти: «Кала мэ диқав по нэбо, пэ тварении, савэ стердэ тирэ вас, пэ луна и черӷая, савэ ту создал, тоди гиндосарав, ко кацаво о мануш, саво мэрэл, кай ту сэрэс пала лэстэ, и шаво манушыкано, кай ту заботиспэ пала лэстэ?» (Пс. 8:3, 4). Чаче, кала амэ гиндосарас пэ скати дэ бари люма создал о Иегова, и скати дэ бут черӷая, тоди можэм тэ полас пэ скати амэ дэ цынёне важ о Иегова! Но во шол сама амэн. Анда кадэя статья амэ уӷанаса, кай о Иегова най просто создал лэ пэрвонэ манушэн, но во и заботияспэ пала лэндэ и дажэ приля лэн андэ пэско ери.

2. Со о Иегова ԥэндя лэ Адамости и ла Евати?

² О Адамо и Ева сас пэрви лэ Иеговастирэ бэяцэ, савэн во создал пэ ԥув. Во лэн фартэ любияс и ԥэндя лэнди: «Авэн тумэ ерялэ, мэк авэн тумэндэ бут бэяцэ па вся и ԥув, залэнпэ ла ԥувьяса» (Быт. 1:28). О Иегова камэлас, кай вонэ и лэндирэ бэяцэ тэ заботинпэ пала ԥув, сар пала пэско цэр и тэ авэн бахталэ. Если о Адамо и Ева тэ канглоп лэ Иеговас и тэ тердоп, кадя сар лэсти чалёл, тоди и вонэ и всаворэ лэндирэ бэяцэ авелоп андэ лэ Иеговаско ери.

3. васо можно тэ ԥэнэс, кай важ о Иегова о Адамо и Ева сас фартэ куч?

³ Важ о Иегова о Адамо и Ева андэ лэско ери сас фартэ важни. Андэ Библия ԥэнэнпэ кай о Дэл стодя лэ манушэн «чуть май тэлэ чем лэ анӷелонэн, дян лэсти слава и честь» (Евр. 2:7; Пс. 8:5, сноска каринг о стихо). Чаче амэндэ нинай кацаво зор, сар кай и анӷелоря и амэ най кацавэ дэ мудри (Пс. 103:20). Но всаек и мануша чуть май тэлэ лэ анӷелонэндар.  Кати погиндон, сави райкани жызня авелоп кай лэ Адамостирэ бэяцэ, если во ла Еваса тэ на стердоп бэзэх!

4. Каринг со андя кода, кай о Адамо и Ева на канглэ лэ Иеговас и пала со уӷанаса анда статья?

 ⁴ Но о Адамо и Ева стердэ бэзэх и хасардэ пэско право, кай тэ авэн андэ лэ Иеговаско ери. И када андя бари бида лэндирэ потомконэнди. Но лэ Иеговаско гиндо на паруделя. Во кадяжэ камэл кай и мануша, савэ лэс кандэн, тэ авэн лэстирэ бэяцэ и тэ авэн вечно андэ лэско ери. Андэ кадэя статья амэ спэрва подаса дума, пэ скати дэ куч важ о Иегова и мануша. И уӷанаса, сар амэ можэм тэ сыкавас кай камас тэ авас андэ лэско ери. Ай кадяжэ уӷанаса, саво лашимос аштярэл англэ лэ манушэн, савэ лэна тэ жувэн пэ ԥув.

ПЭ СКАТИ ДЭ КУЧ ВАЖ О ИЕГОВА И МАНУША?

5. Сар амэ сыкаваса пэстири блаӷодарность лэ Иеговасти пала кода кай во амэн создал кацавэнца, сар во?

⁵ О Иегова создал лэ манушэс «кацавэс, сар во» (Быт. 1:26, 27). Важ када амэ можэм тэ терас, сар во. Када тэ любисарас аврэн, тэ жалуисарас, тэ авас надёжни и справедливи (Пс. 86:15; 145:17). Кала амэ старысавас тэ терас, сар о Иегова, кадя амэ прославляем лэс и сыкавас, кай блаӷодарни лэсти пала вся (1 Пет. 1:14—16). И кала амэ терас, сар лэсти чалёл, кадэлэстар амэ екжэнэ бахталэ. Инке кала о Иегова амэн создал, во ужэ диқэлас, кай амэ аваса кацавэ мануша, савэн во камэл тэ диқэл андэ пэско ери.

6. Сар о Иегова сыкадя, кала создал и ԥув, кай и мануша важ лэстэ куч?

⁶ О Иегова подарисардя амэнди райкано цэр, када амари Ԥув. Во стердя ла май пэрво, чем лэ манушэн (Иов 38:4—6; Иер. 10:12). О Иегова щедро Дэл, важ када во стердя вся кадя, кай и жызня пэ ԥув тэ анэн амэнди бут радость (Пс. 104:14, 15, 24). И лэ Иеговасти фартэ чалёлас тэ диқэл пэ вся, со во создавал пэ ԥув (Быт. 1:10, 12, 31). Ай инке во дя лэ манушэнди, кай вонэ тэ диқэн пала растения и пала жывотни (Пс. 8:6). О Дэл загиндосардя, кай и совершэни мануша тэ жувэн вечно, тэ заботинпэ пала лэстирэ тварении и тэ лошавэн кадэлэстар. На бистэр тэ блаӷодарис лэ Иеговас пала када!

7. Сар дицол, кай и мануша моӷут екжэнэ тэ витидэн, сар ԥэнэнпэ андэ Иисус Навин 24:15?

⁷ О Иегова дя амэнди выборо. Када сыкавэл, кай амэ можэм екжэнэ тэ витидас, сар тэ жувас. (Адиносар Иисус Навин 24:15.) О Иегова фартэ лошало, кала амэ витидас тэ служысарас лэсти (Пс. 84:11; Прит. 27:11). Кадяжэ во дя выборо тэ прилас бут авэр ришэнии андэ пэстири жызня. О Иисусо вся и время прилэлас правильни ришэнии, и амэ можэм лэстар андэ када тэ сытювас.

8. Сости амэ сытювас, кай о Иисусо андэ кода, савэ во ришэнии витидэлас андэ пэстири жызня?

⁸ Амэ можэм сар о Иисусо тэ прилас кацави ришэния, кай тэ гиндосарас май бут пала авэр, чем пала пэстэ. Еқвар о Иисусо пэстирэ апостолонэнца росԥэнэнас пала Дэл и вонэ закамлэ тэ отцыён. Вонэ жылэ андо тихо ҭан, кай екжэнэ тэ побэшэн, но и мануша уӷанглэ, кай вонэ авэна, и жылэ каринг лэндэ. Вонэ камлэ, кай о Иисусо тэ росԥэнэн лэнди пала Дэл. Но кала о Иисусо додиқля лэ манушэн, во на росхоляйля пэр лэндэ, во жалуисардя лэн и ля бут сости тэ сытярэл лэн (Мар. 6:30—34). Если амэ сар  о Иисусо на жалуисарас пэско зор важ авэр, кадя амэ прославляем амарэ Дэвлэс лэ Иеговас (Матф. 5:14—16). Ай инке амэ кадя сыкавас, кай камас тэ авас андэ лэско ери.

9. Пала со трэбуй тэ сэрэн и родителя?

⁹ О Иегова дя лэ манушэнди, кай лэндэ тэ авэн бэяцэ. Кадяжэ во ԥэндя лэ родителёнэнди, кай вонэ тэ поможын пэстирэ бэятонэнди, кай лэндэ тэ авэл любовь каринг лэстэ и вонэ тэ закамэн тэ служын лэсти. Родителя, авэн блаӷодарни лэ Иеговасти пала пэстирэ бэяцэ. О Иегова дажэ лэ анӷелонэнди на дя, кай лэндэ тэ авэн бэяцэ, ай лэ манушэнди дя, кай вонэ тэ дэн жызня аврэнди. Када сыкавэл, кай о Иегова фартэ патял лэ манушэнди! И родителя трэбуй тэ сытярэн и тэ дэн годи пэстирэ бэятонэнди «кадя, сар ԥэнэн о Иегова» (Эф. 6:4; Втор. 6:5—7; Пс. 127:3). Вонэ обязанни када тэ терэн. Андэ лэ Иеговастири арӷанизацыя исин бут со поможыя лэ родителёнэнди. Када и литература, сави стерди па Библия, видеоря, диля и статьи па амаро сайто. Када сыкавэл, кай о Иегова и о Иисусо фартэ любин лэ цынёне ԥралорэн и ԥэёран андэ собрания (Луки 18:15—17). Если и родителя патян лэ Иеговасти, любин пэстирэ бэятонэн и заботинпэ пала лэндэ, тоди о Иегова фартэ лошавэл кадэлэстар. Кадя и родителя поможын пэстирэ бэятонэнди, кай и бэяцэ тэ авэн вечно андэ лэ Иеговаско ери.

10, 11. Саво лашимос андя о выкупо бутэ манушэнди?

¹⁰ О Иегова отдя пэстирэ само любимонэ Шавэс, кай амэ упалэ тэ авас андэ лэско ери. Сар амэ ужэ дям дума андо  штарто абзацо, о Адамо и Ева хасардэ пэско право тэ авэн андэ лэ Иеговаско ери. Но най кати вонэ, но и лэндирэ бэяцэ хасардэ кадэва право (Рим. 5:12). О Адамо и Ева нарошно на канглэ лэ Дэвлэс, важ када во видарадя лэн анда пэско ери. Но пала лэндирэ бэяцэ о Иегова на бистэрдя. Во дя, кай и мануша, савэ кандэн лэс упалэ тэ авэн андэ лэско ери. О Иегова отдя пэстирэ любимонэ Шавэс лэ Иисусос, кай во тэ витинэн амэн лэ бэзэхэстар (Иоан. 3:16; Рим. 5:19). И через када андэ лэ Иеговаско ери моӷут тэ авэн 144 000 мануша, када и мурша и жувля, савэ на парашэн тэ кандэн лэс (Рим. 8:15—17; Отк. 14:1).

¹¹ Кадяжэ андэ лэ Иеговаско ери авэна фартэ бут мануша, савэ кандэн лэс. Када авэла тоди, кала вонэ доԥэнэна, кай кандэн лэ Иеговас. Када авэла в концэ андэ лэ Иисусостири Тысячелетнё правления (Пс. 25:14; Рим. 8:20, 21). Кадэла мануша ужэ щяс моӷут тэ ԥэнэн по Иегова, кай во лэнго небесно Дад (Матф. 6:9). Инке о Иегова дэла возможность май драго тэ уӷанэн лэс и лэстирэ законоря лэ манушэнди, савэн во рия каринг и жызня. Кодэла, ко кандэла лэ Иеговас, тожэ авэна андэ лэско ери.

12. Пала со амэ щяс подаса дума?

¹² Амэ полям, кай о Иегова фартэ цэний лэ манушэн. И памазаникоря ужэ андэ лэско ери, ай авэр «бут мануша» потом авэна лэстирэ бэятонэнца, кала авэла раё пэ ԥув (Отк. 7:9). Но сар амэ ужэ акана тэ сыкавас, кай камас тэ авас андэ лэ Иеговаско ери?

СЫКАВ ЛЭ ИЕГОВАСТИ, КАЙ КАМЭС ТЭ АВЭС АНДЭ ЛЭСКО ЕРИ

13. Со трэбуй тэ терас, кай тэ авас андэ лэ Иеговаско ери? (Марка 12:30).

¹³ Любисар лэ Иеговас и служысар лэсти анда вся оди. (Адиносар Марка 12:30.) О Иегова амэнди дя бут лашимос.  И ек со май важно, со исин амэндэ, када возможность тэ служысарас лэсти. Амэ сыкаваса, кай любисарас лэ Иеговас, если ласа тэ ритярас лэско законо (1 Иоан. 5:3). И ек анда лэстирэ законоря, када кай тэ поможысарас лэ манушэнди, кай вонэ тэ болдён и тэ ашэн лэстирэ ученикоря. Пала кадя ԥэндясас о Иисусо (Матф. 28:19). Кадяжэ амэ трэбуй тэ любисарас ек еқэс (Иоан. 13:35). Если амэ ласа тэ кандас лэ Иеговас, тоди амэ аваса андэ лэско ери, андэ саво и мануша анда разни нацыи и народо (Пс. 15:1, 2).

14. Сар амэ можэм тэ сыкавас, кай любисарас аврэн? (Матфея 9:36—38; Римлянам 12:10).

¹⁴ Любисар лэ манушэн. Андэ Библия пистромэ, кай «о Дэл исин любовь» (1 Иоан. 4:8). Во полюбисардя амэн, кала амэ инке на ӷанасас лэс (1 Иоан. 4:9, 10). Амэ сытювас лэстар тэ любисарас аврэн (Эф. 5:1). И амэ сыкавас амари любовь пэ дила, кала поможысарас лэ манушэнди тэ уӷанэн пала Иегова пока инке исин время. (Адиносар Матфея 9:36—38.) Тоди кай и мануша авэла возможность тэ авэн андэ лэ Иеговаско ери. И амэ трэбуй тэ на парашас тэ сыкавас амари любовь и тоди, кала о мануш ужэ болделя (1 Иоан. 4:20, 21). Но дэкала када можэт тэ авэл найвушэро. Например, кала амэ диқас, кай кадэва мануш терэл варисо най кадя и на полас васо во кадя пэс андярэл. Амэ на камас тэ гиндосарас пала лэстэ вэрыто. Наоборот, амэ стаса патив пэр лэстэ и на ласа тэ гиндосарас, кай амэ «май лашэ аврэндар» (Флп. 2:3; адиносар Римлянам 12:10).

15. Кас амэ трэбуй тэ полас и тэ жалуисарас?

¹⁵ Ав добро, полэ и жалуисар всаворэ манушэн. Кай тэ авас андэ лэ Иеговаско ери, амэнди трэбуй андэ вся лэс тэ кандас. Например, о Иисусо сытярэлас, кай амэ трэбуй тэ полас и тэ жалуисарас всаворэ манушэн, дажэ пэстирэ вороӷонэн (Луки 6:32—36). Дэкала када фартэ найвушэро тэ терас, но амэнди трэбуй тэ сытювас тэ гиндосарас сар о Иисусо и тэ терас сар во. Если амэ андэ вся старысавас тэ кандас лэ Иеговас и сытювас лэ Иисусостар, тоди амэ сыкаваса, кай камас вся и вечность тэ авас андэ лэ Иеговаско ери.

16. Сар амэ трэбуй пэс тэ андярас, кай пала лэ Иеговаско ери тэ на дэн дума найдраго?

¹⁶ Андяр пэс кадя, кай пала лэ Иеговаско ери тэ дэн дума драго. Часто андо ери о цыкно бэято сытёл лэ барэстар. И если о барэдэр ԥрал жувэл па Библия, о цыкно лэстар сытёла. Ай если о барэдэр лэла найдраго пэс тэ андярэл, тоди о цыкно тожэ андэ када сытёла лэстар. Кацаво можэт тэ авэл и андэ лэ Иеговаско ери. Дэкала о христианино, саво варикала кандэлас лэ Иеговас, ашэл отступнико или лэл тэ андярэл пэс билажавардэс. Тоди авэр андэ собрания моӷут тэ сытён лэстар. И через када пала лэ Иеговаско ери моӷут найдраго тэ дэн дума (1 Фес. 4:3—8). Амэнди нащи кадя тэ терас и на трэбуй тэ домэкас, кай хоть варисо тэ римой амари дружба лэ Иеговаса.

17. Сар амэнди нащи тэ гиндосарас и васо?

¹⁷ Надеисав по Иегова, ай най пэ ловэ и по мищимос, саво тутэ исин. Если андэ амари жызня по пэрво ҭан авэла о Иегова и лэско Царство, тоди во дэл алав, кай амэндэ авэла, со тэ хас, со тэ лас пэр пэстэ и кай тэ жувас (Пс. 55:22; Матф. 6:33). Важ када амэ на ласа тэ гиндосарас, сар и мануша, савэ на служын лэ Иеговасти. Кабута и ловэ и о мищимос фэрина амэн и лэндар  амэ аваса май бахталэ. Но па чачимастэ амэ аваса бахталэ, если жуваса па лэ Иеговаско законо (Флп. 4:6, 7). Дажэ если амэ можэм бут со тэ тинас пэсти, всаек трэбуй тэ пушас пэстар: «Чаче када манди трэбуй или када авэла просто тэ пашлёл? Хутила мандэ зор и время тэ диқав пала вся када? На лава мэ фартэ тэ цырдавпэ пала мэрно мищимос?» Важно тэ сэрас, кай о Иегова дя амэнди тэ терас бари дила и во камэл, кай амэ ла драго тэ терас. Нащи кай андэ амари жызня тэ авэл варисо май ӷлавно, чем о Иегова. Амэ на камас тэ авас, сар кодэва тэрно начальнико, саво парудя и служэния лэ Иеговасти пэ варисаво мищимос! (Мар. 10:17—22).

ЛЭ ИЕГОВАСТИРЭ БЭЯЦЭ АВЭНА ТЭ ЛОШАВЭН ВСЯ И ВЕЧНОСТЬ

18. Саво лашимос авэла лэ манушэндэ, савэ кандэн лэ Иеговас?

¹⁸ И мануша, савэ кандэн лэ Иеговас, авэна тэ служын лэсти и авэна лэстирэ друӷоря вся и вечность! Кодэла, ко авэна тэ жувэн андо раё пэ ԥув, лэна тэ диқэн пала латэ, сар пала пэско цэр, саво о Иегова дя лэ манушэнди. Ӥто кала лэла тэ правий лэ Дэвлэско Царство, и ԥув и жызня пэр латэ фартэ парудёла. О Иисусо, сар Царё улэла вся о ԥаримос, саво ашадя амэнди о Адамо и Ева. О Иегова рия лэ манушэн каринг и жызня, лэндэ авэла райкано зор и вонэ авэна тэ жувэн вечно пэ ԥув (Луки 23:42, 43). Прожала время и всаворэ лэ Иеговастирэ бэяцэ авэна совершэни и вонэ авэна тэ славин лэ Иеговас, сар пала када дилабэлас о Давид (Пс. 8:5).

19. Пала со никала на трэбуй тэ бистрас?

¹⁹ Если ту анда кодэла мануша, савэ лэна тэ жувэн андо раё пэ ԥув, тоди тут аштярэл райкани жызня. О Иегова тут любий и камэл, кай ту тэ авэс андэ лэско ери. Важ када ту трэбуй кажно дес тэ радуис лэ Иеговас пэстиря жызняса. Никала на бистэр пала со дя алав о Иегова и фэрисар лэстирэ алава андэ пэско ди. Цэнисар, кай ту можэш тэ служыс амарэ небеснонэ Дадэсти лэ Иеговасти и тэ славис лэс вся и вечность!