1. Пала со адес гиндон бут мануша?

 МОЖЭТ, ту диқэс, кай адес бут мануша гиндон ек пала пэстэ. Например, дэсавэ тратин бут время и зор, кай авэр тэ шон сама пэр лэндэ и пэ лэндири дила. И кати набут мануша терэн кадя, кай инке май фартэ тэ ашундёл амаро Дэл о Иегова. Анда кадэя статья амэ уӷанаса, сар о Иегова ашэл инке май ашунгло, со амэ можэм важ када тэ терас и васо када трэбуй. Кадяжэ амэ уӷанаса, со о Дэл стерэла англэ, кай лэско алав тэ ашундёл инке май фартэ.

САР О ИЕГОВА АШЭЛ ИНКЕ МАЙ АШУНГЛО?

2. Сар о Иегова сыкадя паша плай Синаё, саво во дэ ашунгло? (Кадяжэ диқэн и картинка.)

² Со сыкавэл о алав «ашунгло»? Андэ Библия кадэва алав можэт тэ сыкавэл вся, через со затерэн англа авэр патив. Посли кода, сар о Иегова виандярдя лэ израильтянонэн анда Египто, во сыкадя лэнди, саво во дэ ашунгло Дэл. Кати прецтавь, сар и милионоря мануша стидэпэ паша плай Синаё, кай тэ ашунэн, со ԥэнэна лэнди о Дэл. По плай змэкляпэ кали туча, ля фартэ тэ тинойпэ и ԥув и, можэт, дажэ ля тэ взорвийпэ о вулкано. Линэ тэ марэн и молнии, дядап о ӷромо и ля фартэ тэ ашундёл о звуко анда труба (Исх. 19:16—18; 24:17; Пс. 68:8). Кати погиндосар, сар дэ фартэ динэ наздив и израильтяноря посли кода, сар о Иегова сыкадя лэнди, саво во дэ ашунгло.

3. Сар через амэндэ лэ Иеговаско алав можэт тэ ашундёл инке май фартэ?

³ Ай со можно тэ ԥэнас пала амэндэ? Можэт о Иегова тэ ашэл инке май ашунгло через амэндэ? Да. Со амэ можэм важ када тэ стерас? Например, тэ росԥэнас аврэнди пала  лэстири удивительно дила и пала лэско шукарно характеро. Кадяжэ о Дэл ашэл май ашунгло, кала амэ прижанас, кай вся, сости амэ домарделям, амэндэ вижыля кати лэстирэ зорэса (Ис. 26:12). Амэ можэм тэ лас примеро лэ Давидостар. Во вся и время андярэлас лашо алав по Иегова. Еқвар, кала во мангэласпэ англа бут миро, во ԥэндя: «Иегова, ту фартэ баро и фартэ зорало, фартэ шукарно. Тутэ слава и достоинство, важ кода кай вся, со по нэбо и пэ ԥув, вся када тиро». И посли лэстири молитва всаворэ линэ драго тэ дэн дума пала Иегова (1 Лет. 29:11, 20).

4. Со терэлас о Исусо, кай лэ Иеговаско алав тэ ашундёл лашымаса?

⁴ Кала о Исусо сас пэ ԥув, во терэлас вся, кай лэстирэ Дадэско алав тэ ашундёл инке май фартэ. Во ԥэнэнас, кай всаворэ чудеса во терэл кати лэ Дэвлэстирэ зорэса (Мар. 5:18—20). Кадяжэ о Исусо поможыяс лэ манушэнди тэ додиқэн, саво дэ лашо лэско Дад. Ай инке о Дэл ашундёлас лашымаса через кода, кай о Исусо драго обжаласпэ аврэнца. Еқвар, кала о Исусо сытярэлас андэ синагога, во шутя сама пэ ек жувли, вой сас насвали 18 бэрш через кода, кай андэр латэ сас о найвужо. Кадэла жувлятэ сас фартэ збангэ и думэ, и вой не моӷла тэ розбандёл. Ԥарэс дажэ прецтавить, сар дэ найвушэро и дэ лажаво лати сас. Лэ Исусости вой ашэля фартэ жалко. Во поджыля каринг латэ и анда ди ԥэндя: «Манушни, ту исцэлисайлян пэстирэ насвалимастар». Потом во стодя пэр латэ и вас, и латирэ думэ сразу жэ вивортосайлэ, и вой «ля драго тэ дэл дума пала Дэл». Кадэя жувли ля тэ ԥэнэн лашо алав по Иегова, важ кода кай во рисардя лати о зор. И акана лати сас най лажаво англа миро (Лука 13:10—13). Вой просто не моӷла тэ ашэл мулком! Амэндэ тожэ исин бут причины тэ терас, кай лэ Иеговаско алав тэ ашундёл лашымаса.

ВАСО АМЭ КАМАС ВАРИСО ТЭ ТЕРАС, КАЙ О ИЕГОВА ТЭ АВЭЛ МАЙ АШУНГЛО?

5. Васо амэ стас патив по Иегова?

⁵ Амэ стас бари патив по Иегова. Амэндэ исин бут причины тэ терас када. О Иегова само зорало — никастэ нинай кацаво дэ баро зор, сар лэстэ (Пс. 96:4—7). О Дэл само годявэрно, и када драго дицол анда кода, со во стердя. О Иегова создал амэн и дэл амэнди вся, со трэбуй важ и жызня (Тайна 4:11). О Дэл на ашавэл пэстирэ манушэн (Тайна 15:4). Пала сави дила во тэ на лэлпэ, лэстэ вся вижал, и во вся и время зритярэл пэско алав (Иис. Н. 23:14). Важ када о Еремия ԥэндя пала Иегова: «Машкар само годявэрнэ анда всаворэ народоря и царстворя нико на сыстояпэ туса» (Иер. 10:6, 7). Када кати дэсо, васо амэ стас патив пэ амаро небесно Дад. Но амэ най просто стас патив по Иегова, амэ лэс фартэ любисарас.

6. Васо амэ любисарас лэ Иеговас?

⁶ Амэ фартэ любисарас лэ Иеговас. Кай о Дэл фартэ шукарно характеро. Во одяло и фартэ жалуимаско (Пс. 103:13; Ис. 49:15). О Иегова амэн полэл. Кала амэнди найдраго — найдраго и лэсти (Зах. 2:8). Во поможый амэнди май бут тэ уӷанас пала лэстэ и тэ ашас каринг лэстэ май пашэ (Пс. 25:14; Дила 17:27). Ай инке во найӷордо — «во притэлёл, кай тэ диқэл по нэбо и пэ ԥув, ваздэл кодэлэс, ко слабо» (Пс. 113:6, 7). Хэба амэ можэм тэ на хвалисарас кацавэ Дэвлэс? (Пс. 86:12).

7. Васо амэ камас тэ росԥэнас аврэнди пала Иегова?

⁷ Амэ камас, кай авэр тэ уӷанэн о чачимос пала Иегова. Бут мануша на ӷанэн, саво о Иегова па чачимастэ. Васо? Важ кода кай о Сатана фартэ хохавэл по Дэл,  ай и мануша патян кадэлэсти (2 Кр. 4:4). О Сатана доԥэнэн лэ манушэнди, кай о Иегова фартэ холинако и кай лэсти всаек пар мэндэ. Кадяжэ во дошалярэл лэ Дэвлэс, кай када через лэстэ терэнпэ биды и мучийпэ о миро. Но амэ ӷанас о чачимос пала амаро небесно Дад! И амэ можэм тэ росԥэнас лэс аврэнди. Кала амэ кадя терас, амэ андярас лашо алав по Дэл (Ис. 43:10). Андо 96-то Псалом ԥэнэнпэ, кай амэ трэбуй тэ поможысарас аврэнди тэ уӷанэн, саво дэ ашунгло о Иегова. Давайте роздиқаса дэсавэ алава анда кадэя дили. Амэ шаса сама, кай лэ Иеговаско алав трэбуй тэ ашундёл инке май фартэ и погиндосараса, со амэ можэм важ када тэ стерас.

СО ТЭ ТЕРАС, КАЙ О ИЕГОВА ТЭ АВЭЛ ИНКЕ МАЙ АШУНГЛО?

8. Сар через амари дума о Иегова ашэл инке май ашунгло? (Псалом 96:1—3).

⁸ Проадинон Псалом 96:1—3. О Иегова ашэл май ашунгло, кала амэ росԥэнас пала лэстэ аврэнди. И пэрви стихоря анда 96-то Псалом ԥэнэн амэнди: «дилабэн лэ Иеговасти», «терэн лэско алав май ашунгло», «росԥэнэн и лащи... [новость], кай во спасыя», «дэн дума машкар миро пала кода, сави лэстар марэл бах». Вся када сыкавэл, сар амэ можэм тэ андярас лашо алав пэ амаро небесно Дад. И кандинэ израильтяноря, ай кадяжэ и христианоря андо пэрво вико на лажанас тэ росԥэнэн аврэнди пала Дэл и пала кода, со во важ лэндэ стердя (Дан. 3:16—18; Дила 4:29). Сар и амэ можэм тэ терас кадя жэ?

9, 10. Сости тумэ сытён анда кода, со сас кай и Анжэлина? (Кадяжэ диқэн и картинка.)

⁹ Роздиқаса, со сас еқа амаря ԥьяса анда США, савя ақарэн Анжэли́на a. Вой смило зашутяпэ пала Иегова пэ бути. Котэ стердэ найбари мероприятия, пэ сави и нэвэ мануша, савэ кати линэ тэ терэн, моӷли тэ росԥэнэн набут пала пэстэ. И Анжэлина витидя дэсавэ карточки, кай тэ сыкавэл, сави вой лошали, кай терэл лэ Иеговастири дила. Но англа латэ авэр мануш ԥэндя, кай лэстирэ родителя свидетеля, и ля тэ приасалпэ амаря вератар. И Анжэлина росԥэнэн: «Мандэ ля фартэ тэ марэлпэ оди. Но мэ погиндосардэм: „Кода, со во ԥэндя пала Иегова, — найчачимос. Мэ не моӷу тэ ашав мулком, всаворэ трэбуй тэ уӷанэн, саво о Иегова па чачимастэ“».

 ¹⁰ Кала и Анжэлина трэбуй сас тэ росԥэнэн пала пэстэ, вой май ӥто мангляпэ андо гиндо, и потом най холяса ԥэндя кодэлэ манушэсти: «Амэ бут андэр со туса шаспэ. Мэрнэ родителя тожэ лэ Иеговастирэ свидетеля. И мэ екжэни свидетелё». Хоть када сас найвушэро, и Анжэлина ашэляпэ спокойно. Вой ля тэ сыкавэл и карточки и ковлэс тэ росԥэнэн, андэр со патял (1 Пёт. 3:15). И со сас посли када? Кала и Анжэлина парашэля тэ дэл дума, кодэва мануш парудя пэско гиндо и во дажэ росԥэндя приятни маменторя анда пэско децтво, кала проандярэлас и время лэ свидетелёнэнца. И Анжэлина ԥэнэн: «О Иегова ашэл, кай пала лэстэ тэ ӷанэн о чачимос. Тэ зашоспэ пала лэско алав — када со май бари бах». Дажэ кала важ о Иегова дэн дума найпативалэс, через амэндэ лэско алав можэт тэ ашэл инке май ашунгло.

11. Сар лэ Иеговастирэ мануша жы анда дэлмутни время жувэн кадя, сар пистромэ андо Псалом 96:8?

¹¹ Проадинон Псалом 96:8. О Иегова ашэл инке май ашунгло, кала амэ дас ловэ важ лэстири дила. Жы анда дэлмутни время лэ Дэвлэстирэ мануша сыкавэн, кай полэн лэс через кода, со лэндэ исин (Прит. 3:9). Например, и израильтяноря дэнас дэсо анда пэско мищимос, кай тэ строин и тэ диқэн пала храмо (2 Цар. 12:4, 5; 1 Лет. 29:3—9). Дэсавэ лэ Христостирэ ученикоря поможынас лэсти и лэ апосталонэнди «пэстирэ ловэнца» (Лука 8:1—3). Кадяжэ и христианоря андо пэрво вико дэнас помощь лэ ԥралэнди и лэ ԥэянди, савэ жувэнас чорорэс (Дила 11:27—29). И адес, кала амэ дас ловэ важ лэ Дэвлэстири дила, лэ Иеговаско алав лэл тэ ашундёл инке май фартэ.

12. Сар инке май фартэ лэл тэ ашундёл о Иегова, кала амэ дас ловэ пэ лэстири дила? (Кадяжэ диқэн и картинка.)

¹² Роздиқаса ек случаё. Андо 2020 бэрш андо Зимбабвэ через кода, кай бут время на жалас брышын, милионоря мануша дожанас боқатар. Котэ сас и амари ԥэй, савя ақарэн При́ска. Хоть котэ и сас кацаво боқалимос, вой на парашэлас тэ ԥирэл дувар андо курко тэ росԥэнэн пала Дэл, дажэ кала лати трэбуй сас тэ жал тэ терэл пэ мал. И сосидоря асанаспэ латар и ԥэнэнас: «Ту трэбуй тэ терэс пэ мал, ай най тэ ԥирэс тэ росԥэнэс пала Дэл. А то ӥто тиро ери мэрэла боқатар». Пэ када и Приска всегда ԥэнэнас: «О Иегова никала на ашавэл пэстирэ манушэн». Май интя и ԥрала андэ́ лати хамос. Лэ Иеговаско  народо можэт тэ дэл кацави помощь, важ кода кай и ԥрала и ԥэя па вся и люма дэн ловэ важ лэ Дэвлэстири дила. Када кадя фартэ ля лэ одестар кодэлэ сосидонэн, кай вонэ ԥэндэ ла ԥьяти: «Тиро Дэл па чачимастэ тут на ашавэл. Амэ камас май бут тэ уӷанас пала лэстэ». И семь латирэ сосидоря линэ тэ ԥирэн пэ собрания.

13. Сар лэ Иеговаско алав лэл тэ ашундёл инке май фартэ, кала амэ правильно пэс андярас? (Псалом 96:9).

¹³ Проадинон Псалом 96:9. О Иегова ашэл инке май ашунгло, кала амэ драго пэс андярас. И священикоря андэ лэ Иеговаско храмо трэбуй сас тэ халадён англа кода, сар тэ терэн и дила (Исх. 40:30—32). Но важно тэ следин най кати пала кацаво вужимос. Фартэ важно вужэс пэс тэ андярас (Пс. 24:3, 4; 1 Пёт. 1:15, 16). Амэнди трэбуй тэ злас пар пэстэ «о пурано характеро» и тэ лас о нэво. Када сыкавэл, кай амэнди трэбуй тэ парашас тэ гиндосарас пала кода, со на чалёл лэ Иеговасти, и тэ на андярас пэс неправильно. Амэ камас тэ сытювас тэ гиндосарас и тэ терас сар о Иегова, и тэ старысавас тэ лас лэстар примеро (Клс. 3:9, 10). Лэ Иеговастирэ зорэса дажэ само билажавардэ и жэстоки мануша моӷут тэ парудён и тэ утидэнпэ андо нэво характеро.

14. Сости амэ сытювас анда кода, со сас кай о Джэко? (Кадяжэ диқэн и картинка.)

¹⁴ О Джэко сас фартэ жэстоко и опасно мануш. Лэсти дажэ динэ кличка Бэнг. Важ лэстири найлащи дила лэсти виандярдэ приӷоворо — смэртно казнь. Но пока во бэшэлас андо баруно и аштярэлас, кала када авэла, во познакомился амарэ ԥралэса, саво авэлас интя тэ росԥэнэн пала Дэл. О Джэко закамля тэ адиной лэса и Библия. Хоть во и повитердясас бут биды, о Джэко ашэля совсем авэр мануш и через дэсави время болделя. Во кадя фартэ паруделя, кай андо дес, кала лэс трэбуй сас тэ казнин, и охраникоря динэ тэ ровэн. Ек мануш, саво терэл андо баруно ԥэндя: «Кала лэ Джэкос андэ кардэ, во сас само вэрыто мануш андэ кадэва ҭан. Ай акана во ек анда со май лашэ». Через куртестэ посли кода, сар лэ Джэкос казнисардэ, и ԥрала, сар обычно, проандярэнас андо баруно и собрания. Вонэ шутэ сама, кай пэр латэ авеля ек барунари, саво котэ инке ни еқвар на сас. Васо во закамля интя тэ авэл? Лэс фартэ ля лэ одестар, сар паруделя о Джэко, и во закамля тэ уӷанэн, со трэбуй тэ  терэл, кай тэ андярэл лэ Иеговастири время. Драго дицол: кала амэ пэс правильно андярас, лэ Дэвлэско алав лэл тэ ашундёл лашымаса (1 Пёт. 2:12).

СО О ИЕГОВА СТЕРЭЛА, КАЙ ЛЭСКО АЛАВ ТЭ АШУНДЁЛ МАЙ ФАРТЭ?

15. Со ӥто стерэла о Иегова, кай лэско алав тэ ашундёл инке май фартэ? (Псалом 96:10—13).

¹⁵ Проадинон Псалом 96:10—13. Андэ послидни стихоря андо 96-то Псалом по Иегова ԥэнэнпэ Сындомари и Царё. Со ӥто стерэла о Иегова, кай лэско алав тэ ашэл инке май ашунгло? Во лэла справедливо тэ сындой. Ӥто во стрия па ԥув всаворэ хохавнэ веры — о Ашунгло Вавилоно — важ кода, кай вонэ лажаварэн лэско свынто алав (Тайна 17:5, 16; 19:1, 2). Можэт, дэсавэ мануша, кала додиқэна када, закамэна вместе амэнца тэ андярэн лэ Иеговастири время. Тоди андо Армагедоно о Иегова нисо на ашавэла лэ Сатанастиря люматар. Кодэлэндар, ко найпативалэс дэл дума пала Дэл и вэрыцый лэс, на ашэлапэ и слидо. Ай кодэлэн, ко любий лэ Иеговас, кандэл лэс и на лажал тэ дэл дума пала лэско алав, во спасыя (Мар. 8:38; 2 Фес. 1:6—10). Посли кода сар о Христос парашэла тэ правий, авэла доԥэндо, кай ек лэ Иеговас всаворэ трэбуй тэ полэн сар Дэвлэс (Тайна 20:7—10). Тоди «пэ вся и ԥув лэна тэ ӷанэн, кай о Иегова ашунгло Дэл» (Авв. 2:14).

16. Со ту камэс тэ терэс? (Кадяжэ диқэн и картинка.)

¹⁶ Амэ аштярас кодэя время, кала всаворэ и по небо, и пэ ԥув, лэна тэ андярэн лашо алав по Иегова и тэ прижанэн, кай када ашэл ек во! Ай пока амэнди трэбуй тэ терас вся, кай через амари дума и дила лэ Дэвлэско алав тэ ашундёл лашымаса инке май фартэ. Кай амэ тэ на бистрас, пэскати када дэ важно, о Руководящё совето витидя, кай и ӷлавни алава андо 2025 бэрш — када котор тексто анда Псалом 96:8: «Хвалин лэ Иеговас, важ кода кай лэско алав ашунгло».