Лэ Петроско пэрво письмо 3:1-22
3 Точно кадя жэ и тумэ, жувля, кандэн пэстирэ ромэн. Если варикастэ андар тумэндэ о ром на приашундёл каринг о алав лэ Дэвлэстар, тоди тумэ можэте би алавэско тэ домардён лэн пэстиря диласа.
2 Када авэла возможно, кала вонэ диқэна, кай тумэ достойно* пэс андярэн и стон пэр лэндэ бари патив.
3 Мэк тумаро шукаримос дицол най андэ кода, со упрал: заплетимэ бал, сомнак или барвали ӥда.
4 Но мэк тумаро шукаримос, саво на римойпэ, дицол андэ кода, со андрэ, андо ди, — када спокойно и ковло характеро, саво фартэ куч лэ Дэвлэсти.
5 Кадя и андярэнас пэс андэ дэлмутни время и свынти жувля, савэ надеинаспэ по Дэл. Вонэ кандэнас пэстирэ ромэн,
6 кадя жэ сар и Сарра, сави кандэлас лэ Авраамос и ԥэнэнас пэр лэстэ ӷосподино*. Тумэ латирэ щея, если терэн лашымос и на домэкэн, кай тумэн тэ шол андэ дар.
7 Точно кадя жэ и тумэ, мурша, старыинпэ тэ полэн пэстирэ хулаян. Стон пэр лэндэ патив, важ кода кай вонэ май слаби тумэндар, сар сани ваза, и важ кода кай о Дэл па пэско баро лашымос подарисардя лэнди кацави жэ жызня, сар и тумэнди. Тоди о Дэл и дальшэ лэла тэ ашунэл тумарэ молитвы.
8 И инке, старыинпэ тэ гиндон еқэндар, тэ полэн, со по ди ек еқэстэ, анда вся ди тэ жалуин, тэ на андярэн пэс ӷордо и тэ любин ек еқэс, сар ԥрала.
9 На́ рин пала найлашымос и на́ ԥэнэн нисо вэрыто кодэлэнди, ко абисо дэл дума* пала тумэндэ. Но наоборот, терэн лашымос*, важ кода кай о Дэл ԥэндя тумэнди када тэ терэн. И тоди во тумэн блаӷословия.
10 Важ кода кай пистромэ: «Ко камэл тэ радуийпэ лащя времяти и тэ жувэл бахталэс, мэк слидий пала пэстири шыб, кай тэ на стерэл найлашымос и тэ на хохавэл.
11 Мэк во фэрийпэ лэ найлашымастар и терэл лашымос, старыийпэ тэ жувэл мирно аврэнца и тэ терэл вся важ када.
12 Важ кода кай о Иегова* диқэл пэ кодэла, ко ритярэл лэско законо, и во* ашунэл лэн, кала вонэ ясвэнца взвинпэ каринг лэстэ, но о Иегова против кодэла, ко терэл найлашымос».
13 И ко стерэла тумэнди вэрыто, если тумэ пристона зор*, кай тэ терэн лашымос?
14 Но дажэ если тумэнди прижалпэ тэ пэрэандярэн о ԥаримос важ лэ Дэвлэско законо, тумэ бахталэ. Ай кодэлэстар, состар лэн шол андэ дар, на́ даран* и ни пала со нэ пэрэжывайте.
15 Полэн лэ Христос сар Ӷосподинос андэ пэско ди и вся и время авэн ӷотови тэ зашонпэ пала пэстири вера* англа кажно, ко лэла тэ допушэл тумэндар пала када*. Но старыинпэ тэ терэн када ковлэс и баря пативаса.
16 Мэк тумэндэ авэл вужи совесть, кай кодэлэнди, ко дошалярэл тумэн, — со вонэ тэ на ԥэнэн против тумэндэ — тэ ашэл лажаво, важ кода кай тумэ андярэн пэс достойно сар лэ Христостирэ ученикоря.
17 Если о Дэл када домэкэл, тоди фэдэр тэ пэрэандярэн о ԥаримос важ и лащи дила, чем важ и вэрыто.
18 Важ кода кай и о Христос, саво ритярэл лэ Дэвлэско законо, кати еқвар муля важ и найлашэ мануша и уля лэндар о бэзэх. Во стердя када, кай тэ пашарэл тумэн каринг о Дэл. Лэс умардэ сар манушэс, но во жунделя сар анӷело.
19 И посли када во жыля тэ росԥэнэн пала сындо лэ анӷелонэнди, савэн стодэ андо баруно.
20 Вонэ на канглэ лэ Дэвлэс, кала жувэлас о Ноё. Андэ кодэя время о Дэл аштярэлас, пока строинас о ковчеӷо, андэ саво спасысайлэ 8 мануш, кала пэрэжудэ о потопо.
21 Кода, со тердяпэ андэ кодэла деса, шолпэ пэ крищения, сави акана спасый тумэн через кода, кай жунделя о Иисус Христос. (Кала тумэ болдён, када на схалавэл и мэл па тила, но кадя тумэ взвинпэ каринг о Дэл, кай и совесть тэ ашэл вужи.)
22 Во вазгляпэ по нэбо и бэшля справа* лэ Дэвлэстар, саво стодя лэс май вучес лэ анӷелонэндар и кодэлэндар, кастэ исин власть и зор.
Сноски
^ Или «вужэс».
^ Пэ греческо ки́рёс.
^ Или «пусавэл андэ дума».
^ Или «блаӷословин».
^ Дословно «лэ Иеговастирэ яқа».
^ Дословно «лэстирэ кан».
^ Или «лэнпэ хваткаса».
^ Или, можэт, «на́ пэрэдаран лэндиря думатар».
^ Дословно «надежда».
^ Или «пала кода, васо тумэ патяе».
^ Дословно «па право вас».