O Adan ai e Eva sas len shave ai ande tsirha vriama sas but zhene pe Phuv. Atunchi uni angeluria kerde sar o Beng ai geletar pa o drom le Devlesko.

Von fuliste pe Phuv ai suako anda lende kerdias peske iek stato masesko ke kamenas te ansurinpe le zhuvliantsa. Sas len shave bi lashe ai mai zurale katar le kolaver manush.

E Phuv pherdili katar le manush bi lashe. E Biblia phenel ke “o bi lashimos le manushesko pherelas e phuv” ai suako gies le manush gindinaspe te keren prame desia bi lashe.

O Noe sas iek lasho manush. O Jehova phendias leske ke sas te anel iek baro brishin ai sas te tasavel e Phuv. Le manush bi lashe sas te meren.

Phendias leske te kerel iek arka kashteski sar iek baro pampuri (parajodo). Kotse trobulas te thol sa peska familia ai suako fialo animaluria.

O Noe phendias le manushenge ke sas te avel iek baro brishin ai chi ashunde les. But joliaile ai aver asaie lestar.

Kana sas gata e arka, o Noe thodias le animaluria andre.