Kadi brožura tut sikaďa, hoj o biblicka zasadi šaj pomožinen tuke the tira fameľijake. O Jehovas kamel, kaj tut te el šukar dživipen. Sľubinel, hoj tut dela savoro, so tuke kampela te les thoveha pro peršo than. (Matúš 6:33) Ov igen kamel, kaj te aves leskero prjaťeľis. Kam le Devles andal calo jilo. Ada hin bari visada, te el le Devleskero prjaťeľis. (Matúš 22:37, 38)

SO PHENEL E BIBLIJA: Me avava tumaro Dad [a] tumen avena mire čhave the čhaja, phenel [o Jehovas]. (2. Korinťanenge 6:18 NZ) O Del kamel, kaj te aves leskero lačho prjaťeľis. Kaj ada avka te el, modľin tut! O Jehovas amenge phenel: Ma preačhen tumen te modľinel! (1. Tesaloničanenge 5:17 NZ) Kamel, kaj leske te phenes savoro, so tut hin pro jilo the oda, sostar daras. (Filipanom 4:6) Modľin tut la romňaha, le čhavenca. On dikhena, hoj paťas, hoj o Del hino skutočno the džido.

Ko kamel te vakerel le Devleha, mušinel the te šunel, so phenel o Del. Vašoda študin leskero lav the o publikaciji, so višvetľinen e Biblija. (Žalm 1:1, 2) Premišľin a phen tuke, savo užitkos tut hin olestar, so tut sikaďal. (Žalm 77:11, 12) Le Devles šuneha thiš avka, hoj phireha pro kresťanska zhromažďeňa. (Žalm 122:1-4)

Tiri laska ko Jehovas barola thiš avka, sar deha duma avrenca pal leste. Vaker buter pal o Del a buter les paľis kameha. (Matúš 28:19, 20)

SO ŠAJ KERES:

• Arakh tuke časos pre ada, kaj tuke sako ďives te genes e Biblija a te modľines tut

• Prekal tumari fameľija mi el dvoležiteder o biblicka veci a na o filmi, o giľa, o navšťevi the o odpočinkos

SO PHENEL E BIBLIJA: Aven pašeder ko Del a ov avela pašeder ke tumende. (Jakob 4:8 NZ) Dohodňinen tumen, kaj tumen te el praviďelňe roďino študijum a doľikeren ada. (1. Mojžišova 18:19) Dvoležiteder hin mek vareso aver! Mušinen te dživel le Devleha sako ďives. Keren savoro, kaj andre tumari fameľija te barol e laska ko Del. Sar ada te kerel? E Biblija phenel: De duma pal o Del, sar bešes khere, sar džas pal o drom, sar džas te pašľol, sar ušťes. (5. Mojžišova 6:6, 7) Aven ajse sar o Jozua. Ov phenďa: Me the miri fameľija, amen služinaha le Jehovaske. (Jozua 24:15)

SO ŠAJ KERES:

• Praviďeľne študin e Biblija a ker ada avka, kaj la romňa, le čhaven te el alestar užitkos