Mundo enteropi ashtaca gentecunami jariyashpa nin, “ñucaca cristianomi cani” nishpa. Shinapash shuj gentecunataca na ali tratanllu. Huaquingunaca solo paicunapillami pensarin. Shujcunaca na honradocunachu can. Cutin shujcunaca huarmita o cusataca shujhuanmi traicionan. Chaicunata ricushpami huaquin gentecunaca “cristianocunaca shinachu cana can” nishpa pensarin.

Cristianocunaca ¿imashinata cana can?

 “Cristianomi cani” ninaca facilmi can. Shinapash na shimillachu nina can. Bibliapi nishcashnaca, cristianocunaca Jesuspa discipulocunami cana can (Hechos 11:26). Jesusca nircami: “Ñucapa yachachishcacunata catishpa causashpaca, ñucapa discipulocunapachami canguichi” (Juan 8:31). Jesuspa yachachishcacunata tucuipi cazuitaca nipi na ushapanchichu. Shinapash, cristianocunaca cada punllami Jesuspa yachachishcacunata pactachishpa causangapaj esforzarin. ¿Imashinata esforzarin? Huaquin ejemplocunata ricupashun.

Cristianocunaca tucui shunguhuanmi shujcunataca juyan

 ¿Imatata Jesusca nirca? Jesusca Juan 13:34, 35​pica nircami: “Cangunamanga shuj mushuj mandamientotami cuni, caishuj chaishujmi juyarina canguichi. Imashinami ñucaca cangunata juyashcani, shinallatami cangunapash caishuj chaishuj juyarina canguichi. Shinaca, cangunapura caishuj chaishuj juyarijpimi, tucui gentecuna ñucapa discipulocuna cashcata yachanga”.

 ¿Imatata Jesusca rurarca? Jesusca tucuilla gentecunatami juyarca. Chaimandami charij charijpi, pobre cajpi o maijan llactamanda cajpipash tucuicunata juyarca. Jesusca ungushca gentecunatami jambirca. Yarjachinajuj gentecunamanga micunagutami cararca. Y gentecunata salvangapami paipa causaitapash curca (Mateo 14:14-21; 20:28).

 Cristianocunaca ¿imatata ruran? Cristianocunaca tucui shunguhuanmi gentecunataca juyan. Chaimandami generosocuna can. Shinallata tucuicunatami igual tratan y perdonanbash. Llaqui apanajujcunatapashmi ayudan. Ashtahuangarin paicunapa munaitapash huashaman saquishpami, ayudangapaj dispuestocuna can (1 Juan 3:16).

Cristianocunaca honradocunami can

 ¿Imatata Jesusca nirca? Jesusca Juan 14:6​pica ‘ñucami ima cierto cashcata pactachij cani’ nircami.

 ¿Imatata Jesusca rurarca? Jesusca imata nishpapash siempremi ciertota nirca. Imata rurashpapash siempremi honrado carca. Jesusca shuj gentecuna paipa nishcata rurachun o pai imata munashcata crichingapaca nunca na llullarcachu. Gentecunaca Jesús ciertota nijtaca alimi yacharca. Problemacuna ricurina cajpipash Jesusca siempremi ciertota nirca carca (Mateo 22:16; 26:63-67).

 Cristianocunaca ¿imatata ruran? Cristianocunaca na llullanllu, na shuhuanllu. Impuestocunata pagan, ali trabajadorcunami can, paicuna trabajana horascunatapashmi pactachin (Romanos 13:5-7; Efesios 4:28). Na shujcunataca engañashpa shuanllu. Examengunapipash na trampacunata ruranllu, ni documentocunatapash na falsificanllu (Hebreos 13:18).

Cristianocunaca shujcunataca alimi tratan

 ¿Imatata Jesusca nirca? Jesusca Mateo 11:28-30​pica nircami: “Shinllita trabajajcuna, llashaj quipita aparishcashna causajcuna, ñucapaman shamuichi. Ñucami cangunataca fangalla sintirichun ayudasha. Ñuca yugota cangunapa rigrapi churanshna ñuca imata yachachishcata catichi. Shinami cangunaca fangalla sintiringuichi. Ñucaca ali ali, humildemi cani. Ñuca yugota apanaca facilmi can. Ñucapa cargapash fangallami can” nircami.

 ¿Imatata Jesusca rurarca? Jesusca ali alimi carca. Gentecunataca cushijushpami chasquin carca. Huahuacunahuan canatami gushtan carca. Desanimado cajcunataca consolanmi carca. Tucui gentecunatami ali tratan carca (Marcos 10:13-15; Lucas 9:11).

 Cristianocunaca ¿imatata ruran? Cristianocunaca aligumanmi shujcunataca parlan. Na maltratanllu, ni groserotapash na parlanllu (Efesios 4:29, 31, 32). Shujcunamanda preocuparishpami, imagutapash rurashpa ayudangapaj esforzarin (Gálatas 6:10).

Cristianocunaca huarmita o cusataca na traicionanllu

 ¿Imatata Jesusca nirca? Jesusca Marcos 10:9​pica, ‘Taita Dios tandachishcataca nipipash na separanachu can’ nircami.

 ¿Imatata Jesusca rurarca? Jesusca aunque nunca na cazarashca cashpapash, huarmita o cusataca nunca na traicionanachu canguichi nishpami consejarca (Mateo 19:9). Imacunata rurashpa huainayana juchapi urmashpa matrimoniota huaglichinatapashmi advirtirca (Mateo 5:28).

 Cristianocunaca ¿imatata ruran? Cristianocunaca siempremi paipa huarmita o cusata respetashcataca ricuchin (Hebreos 13:4). Cusahuarmicunaca siempremi juyaihuan y respetohuan tratarin (Efesios 5:28, 33).