Ashtaca gentecunaca Taita Diospa culpamandami llaquicunahuan causanchi ninmi. Chaimi paicunaca Taita Diosmandaca nimata na yachangapaj munan.

Ashtaca religionda ñaupaman pushajcunaca, Taita Diosmi llaquicunataca cachamun nishpami yachachishca. Chaimi huaquin gentecunaca cashna crin:

• Taita Dios castigaimandami terremotocuna, acapanacunapash tian nishpa.

• Taita Dios jahua cielopi ashtahuan angelcunata minishtimandami huahuagucunaca huañun nishpa.

• Taita Diosmi guerracunataca apoyajun nishpa.

Shinaca religiongunata ñaupaman pushajcunaca ¿Taita Diosmandaca cabaltachu yachachinajushca? Paicuna shina yachachishcamandaca ¿alicachishpachu Taita Diosca ricun?

Taita Diospa culpamandaca na llaquicunataca charinchichu

Taita Diosca llaquichij Diosca na canllu. Chaimi gentecuna llaquicunahuan sufrishpa causachunga na munan. Bibliapica Taita Diosmandaca cashnami nin:

‘Paica tucui imatapash aligutallami ruran. [...] Paica, aligutalla ruraj Diosmi’ can (DEUTERONOMIO 32:4).

“Nalita ruranaca, Tucui Ushaita Charij Diosmanda carupi cachun” (JOB 34:10).

“Tucui Ushaita Charij Diosca, japina cashcatallata cunataca, na shujman tigrachingachu” (JOB 34:12).

Taita Diosca, paimanda llullacunata yachachij religiongunataca nalicachishpami ricun

Por ejemplo, Taita Diospa culpamanda gentecuna llaquicunahuan sufrishpa causajta yachachij religiongunata, shinallata guerracunatapash, shuj shuj macanajuicunatapash apoyaj religiongunata nalicachishpami Taita Diosca ricun.

“Chai villajcunaca llullashpallami, [Diospa] shutipi villanajun. Paicunataca, imatallapash na nishpa cacharcanichu. Muscuipishnapash na ricushpatami, llullashpalla paicunapaj shungupi yanga yarishcatalla umachishpa villanajun” (JEREMÍAS 14:14).

Jesusca panda religiongunataca nalita rurajcunami can nirca

“Ñucataca: ‘Apunchi Jesús, Apunchi Jesús’ nishpami purinajun. Shina ninajushpapash, na tucuicuna jahua pachapi Dios mandajuj llactaman yaicui ushangachu. Ashtahuangarin jahua pachapi tiajuj ñuca Taita munashcata pactachijcunallami, yaicui ushanga. Chai punllapica, ashtacacunami cashna ninajuhuanga: ‘Apunchi Jesús, Apunchi Jesús, ¿nachu cambaj shutipi canmanda villanajurcanchi? ¿Nachu cambaj shutipi rimashpa, ayacunatapash llujchircanchi? ¿Nachu cambaj shutipi rimashpa, imagutapash rurashpa ricuchircanchi?’ ninajuhuangami. Shina ninajujpimi, cashna nisha: ‘Cangunataca, ima horapash na rijsishcanichu. Caimanda anchurichi, nalita rurajcuna’ nishami” (MATEO 7:21-23).