Bibliapica caitami yachachin

 Taita Diospa Gobiernomi cai alpapi tiashca gobiernocunapa randica cai alpataca mandanga (Daniel 2:44; Apocalipsis 16:14). Taita Diospa Gobierno cai alpata mandajushpaca caicunatami ruranga:

•   Nali gentecunatami tucuchinga. “Diosta na manllajcunaca, llactamanda anchuchi tucungami” (Proverbios 2:22).

•   Guerracunapash na tiangachu. Taita Diosca “cai pacha tucui manñacunacaman jatun macanajuicuna tiajtapash” tucuchingami (Salmo 46:9).

•   Tranquilo ali causaigumi tianga. “Tucuicunami uvas yura ucupi, jigos yura ucupi tiarishpa samanajunga. Chaipica, pipash na manllachingachu” (Miqueas 4:4).

•   Cai alpaca shuj juyailla paraisomi tucunga. “Jichushca chulunlla sirij pambaca, cushillami tucunga. Chaquishca yuracunapash cushijushpami, juyailla rosas sisashna sisanga” (Isaías 35:1).

•   Tucuicunami trabajota charipashun. “Ñuca agllashcacunaca, paicunapaj maquihuan imatalla rurashcahuanmi cushijushpa causanajunga. Na yanga trabajanajungachu” (Isaías 65:21-23).

•   Unguicunapash na tiangachu. “Chaipi causajcunaca, pipash na: “Ñucaca huañujunimi” ninajungachu” (Isaías 33:24).

•   Na rucuyashunllu. ‘Paipaj cuerpoca, llullu huahuapaj aichashna tucushpami, chairalla viñai cashca punllacunaman tigranga’ (Job 33:25).

•   Huañushcacunapashmi causaringa. “Gulpi huañushcacunami Taita Diospa Churi cayajta uyashpa causaringa. Chai punllacunaca chayamungami” (Juan 5:28, 29).