1. ¿Imataj musyachicun imano runa cashganchita?

 CHAYLARAJ o unayna bautizacushga caycarpis lapanchimi munanchi imanopapis Jehovata cushichinapaj. Ichanga chayta logranapäga ima yarpashganchicunapitami cuidacunanchi. ¿Imanir? Imaman yarpashganchicuna musyachicun imano runa cashganchita. Shongunchi munashgalanta imaypis ruranapaj yarpararga, lutantami parlashun y mana alicunatapis rurashunmi (Efes. 4:17-19). Ichanga ali cajcunalaman yarparäcuptinchega rimashganchicuna y rurashganchega Taytalanchi Jehovata cushichengapaj (Gál. 5:16).

2. ¿Ima tapucuycunapitataj canan yachacushun?

² Guepa yachachicuycho yachacushcanchi öraga umanchiman mana ali yarpaycuna chayamunmanmi, ichanga quiquinchipitami canga yarpashganchita ruranapaj o manapis. Manaraj bautizacurmi Jehová chiquishgan ruraycunataga mayna jaguirishwan. Chayta ruraptinchirämi unay cawashganchita jitargärishun. Pero Jehovata lapan shongunchiwan cushichiyta munarga cay mandatutami cäsucunanchi: “Mushoj runanöna cay-llapa” nejta (Efe. 4:24). Cay yachachicuycho caycunata ricashun: ¿ima ninantaj “mushoj runanona” cawashun? y ¿imacunatataj rurashwan mushoj runano imaypis cawanapaj?

3. Gálatas 5:22, 23 nishganno, ¿ima ninantaj “mushoj runanöna” cawashun, y imanotaj chayta lograshwan?

³ Pipis “mushoj runanöna” cawaptenga Jehová munashganno yarpan y cawan. Y chayno cananpäga Jehovapa santo espiritunta mañacushwan yanapämänanchipaj yarpayninchicuna  y rurayninchicuna ali cananpaj (leiriy Gálatas 5:22, 23). Tantiarinapaj, mushoj runano cawajcunaga Jehovata y cristiano masincunatapis cuyanmi (Mat. 22:36-39). Mana alicunapa pasarpis cushishgala cawan (Sant. 1:2-4). Piwanpis jaucala cawapäcun (Mat. 5:9). Waquincunawan pacienciacunmi y cuyapäcojmi (Col. 3:12, 13). Ali cajcunata rurananpaj calpachacun (Luc. 6:35). Ruraynincunachomi ricacämun Taytan Jehovaman yäracushganta (Sant. 2:18). Y pipis achäquita ashipaptenga manami cutichinchu (Tito 3:2). Jina controlacunmi tentaciunman mana ishquinanpaj (1 Cor. 9:25, 27).

4. ¿Imanirtaj Gálatas 5:22, 23 textucunacho nishganta lapantaraj cäsucunanchi?

⁴ Mushoj runano cawanapäga Gálatas 5:22, 23 textucunalatachu cäsucushwan, sinoga waquin textucuna yachachicushgancunatapis cäsucunanchimi. * Chayga manami canmanchu ropata jucnin jucninta jaticushganchino, sinoga Biblia wilacushganno runa canapaj calpachacunanchi. Tantiarinapaj, pitapis rasunpa cuyaptinchega pacienciacoj y cuyapäcoj cananchi. Ali runa carga pipis ofendimaptinchega cutichishwanchu y mana alicunata mana ruranapaj controlacushwanmi.

5. ¿Ima ninantaj Jesús yarpashganno yarpänapaj, y imanirtaj Jesuspita yachacushwan? (1 Corintios 2:16).

⁵ (Leiriy 1 Corintios 2:16). Mushoj runano cawanapäga Jesucristo yarpashganno yarpänanchi, cayga ninanmi Jesús imano yarpashganta yachacunapaj, payno yarpänapaj. Jesús juchaynaj carmi Taytan munashganno imaypis cawargan. Jesusga espejo japuy ruraynincunawan musyachicorgan Jehová imano cashganta (Heb. 1:3). Chauraga Jesús yarpashganno noganchipis yarpaptinchega, rurayninchicunacho y cawayninchichomi ricacämunga Jehovata cushichiyta munashganchita (Filip. 2:5).

6. ¿Imatataj yarpashwan mushoj runano cawayta munarga?

⁶ Jesusno yarpayta munarga capazchari pipis cayno ninman: “Jesusga juchaynajmi cargan. ¡Quevä pay yarpashganno yarpäman!” nir. Chayno yarpaptiquega cayta  ama gongaychu: Jehovaga camamashcanchi payno y Jesusno canapaj. Chauraga juchasapa carpis paycunapitaga yachacuyta puedinchimi (Gén. 1:26). Jina Diospa santo espiritunpis caycanmi yanapämänanchipaj. Chaywanga mana yarpashganchi ruraycunata ruranapaj puedishunmi. Jehovaga manami shuyaranchu canan wichan juchaynaj runa canapaj. Shamoj tiempuchorämi 1.000 watacunacho juchaynaj runacunaman chayashun (Apoc. 20:1-3). Jehovapis chayta musyanmi. Chaymi Jehovaga canan wichan noganchipita shuyaran payman yäracunanchipaj y imaycanopapis calpachacunapaj pay munashganno cawanapaj.

7. ¿Imatataj canan yachacushun?

⁷ ¿Imacunata rurartaj Jesusno cashwan? Canan ricaycushun imanotaj Jesús cuyacoj cargan, piwanpis jaucala cawargan, ali shongu y yanapacoj cargan. Y chayno cashganpita, ¿imatash yachacunchi? Jina tapucuycunapis caycangami yanapämänanchipaj mushoj runa cashganchita imalachopis aliyarcachinapaj.

8. ¿Imanirtaj ninchi Jesusga Papäninta y runacunatapis cuyashganta?

⁸ Jesús Taytanta alapa cuyashpan Payraycur y noganchiraycur imaycacunata rurargan (Juan 14:31; 15:13). Y cay Pachacho Jesús runacunata yanapashganchomi ricacämurgan paycunata cuyashganta. Piwanpis cuyacoj y cuyapäcojmi cargan, jina Diospa Gobiernunpita yachachergan (Luc. 4:43, 44). Y juchasapa runacunapa maquincho alapa nacashgancho y wanushganchopis claro ricanchi Jesusga Taytanta y runacunatapis alapa cuyashganta. Y pay rurashganga lapanchita yanapämanchi shamoj tiempucho imaycamapis cawanapaj.

9. Jesusno noganchipis runa masinchita cuyar, ¿imatataj rurashwan?

⁹ Jehovata cuyashpanchimi dedicacushcanchi y bautizacushcanchi. Chauraga Jesusno runacunatapis cuyashwanmi. Apóstol Juan cayno nergan: “Diosta mana ricaycarga ¿imanöparaj ‘Diostami cuyä’ ninman runa-masintapis mana cuyaycarga?” (1 Juan 4:20). Tapucushun: “¿Rasunpachu waquincunata shongupita cuyä? ¿Waquincuna mana ali tratamaptenga paycunawanpis cuyapäcojchu cä? ¿Tiempöta shumajchu camacächë waquincunata Diospita parlapänäpaj? ¿Runacuna mana chasquimaptinpis jinalachu calpachacö Diospita parlapänäpaj? ¿Imataraj ruräman Diospita más yachachicunäpaj?” (Efes. 5:15, 16).

10. ¿Imatataj Jesús rurargan runacuna jaucala cawananpaj?

¹⁰ Jesusga piwanpis jaucala cawargan. Waquincuna ashlipaptinpis, chaynola cuticherganchu. Y manami chaylachu, waquincunata yachachergan imano amistananpaj y ima problemalapis captenga alchananpämi. Payga nergan pipis runa masinwan jagayächinacushga carga puntataga amistananpaj, chaynoparaj Jehovapis aduraciunninta chasquingapaj (Mat. 5:9, 23, 24). Discipuluncunatapis cutin cutin nerganmi mana rimanacunanpaj pï más ali cashganpita (Luc. 9:46-48; 22:24-27).

11. ¿Imatataj rurashwan waquincunawan jaucala cawanapaj?

¹¹ Piwanpis mana rabiachinacuylapa cawacuptinchega, alimi caycan. Ichanga chaylachu canman, sinoga runa masinchiwan imalapis captenga calpachacushwanmi amistanapaj. Jina hermanunchicunatapis yanaparcushwanmi piwanpis jagayächinacushga carga alchananpaj (Filip. 4:2, 3;  Sant. 3:17, 18). Cayno tapucushun: “¿Imapis gustöpano mana captinpis calpachacöchu waquincunawan jaucala canapaj? ¿Pipis jagayächimaptenga chaynolachu cacö? ¿Piwanpis ofendinacushga carga payraj ashimänanta munä amistanäpaj? ¿O nogachu calpachacö paywan parlanäpaj? Ali captenga, ¿ofendinacushga caycajcunata parlapaycömanchuraj amistananpaj?”.

12. ¿Imanirtaj ninchi Jesusga ali shongu runa cashganta?

¹² Jesusga ali shongu runa cargan (Mat. 11:28-30). Mana alicunapa pasarpis waquincunawan cuyapäcojmi cargan, y quiquilanman manami yarpachacurganchu. Juc cuticho Fenicia marcapita juc warmi Jesusta ruwacurgan wamranta alchacächinanpaj, ichanga payga mañacushganta rurarganchu. Pero ali shongu runa cashpan, chay warmi yäracoj cashganta ricar wamranta alchacächergan (Mat. 15:22-28). Chayno captinpis Jesusga ali shongu runa carmi, öraga cuyashgancunata corrigirgan. Juc cuticho waquin discipuluncunapa naupancho Pedruta corrigirgan. ¿Imanir? Jehovapa voluntäninta rurananpaj michäcuycaptin (Mar. 8:32, 33). Jesusga Pedruta pengachiyta munarganchu, sinoga Taytanpa voluntäninta rurananpaj yanapänanpämi munargan. Pedruga pengacurganchi rurashganpita, pero bienninpämi cargan.

13. ¿Ali shongu cashpanchi öraga imatataj rurashwan?

¹³ Cuyashganchicunata corriginapaj captenga mana manchacuypaj corrigishwan. Chayta ruraptinchega Jesús rurashgannopis cuyapaylapa y Bibliapa tantiachicuynincunawanmi corrigiycushwan. Paycuna wiyamänanchipaj yarpashwan y seguro caycashwan Jehovata y noganchitapis cuyamashpanchi consejucunata chasquinanpaj. Tapucushun: “Juc amigö o castä mana alicunata ruraycaptenga, ¿valurcharcöchu paywan parlanäpaj? Paywan parlaptëga, ¿ali shimilapachu parlapä? Y ¿pay ali cananta munarchuraj consejaycö o piñashga captëchuraj chayta rurä?”.

14. ¿Imanirtaj ninchi Jesusga yanapacoj cashganta?

¹⁴ Jesusga manami musyarganlachu ima ali cashganta, sinoga rurarganpis. Payga Taytantami cuyan, chaymi imaypis ali shongulanwan ali cajcunalata ruran. Pipis yanapacoj captenga waquincunata imalachopis yanaparcunanpaj yarpachacun. Chauraga manami musyashwanlachu ima ali caycashganta, sinoga calpachacushwanmi ali shongulanchiwan ruranapaj. Capazchari pipis ninman: “¿Imaylapis ali cajcunataga ali tucurchuraj ruraycushwan?”. Aumi. Jesusmi juc cuticho nergan waquin runacunashi wacchacunata limosnata goycoj runacuna alabananpaj munarmi. Ichanga paycuna rurashganga Jehovapäga mana alichu caycargan (Mat. 6:1-4).

15. Ali runa carga, ¿imatataj rurashwan?

¹⁵ Quiquilanchiman yarpachacunapaj trucan, ali runa carga waquincunatami imalachopis yanaparcushun. Caycunatami tapucunanchi: “¿Ima ali caycashganta musyaycarga, rasunpachu calpachacö chayta ruranäpaj? ¿Imanirtaj alicunata rurayta munä?”.

16. ¿Imatataj waran waran rurashwan, y imanir?

¹⁶ Öraga pipis ninman ‘bautizacurga mayna unay cawashgäta jitarishcäna, cananga “mushoj runanöna” caycä’ nir. Ichanga  manami chaynochu. Imanomi ropanchita shumaj cuidanchi ali caycänanpaj, chaynolami mushoj runano imaypis cawanapäga calpachacunanchirämi guepaman mana cutinapaj. Chaymi waran waran calpachacushun Jehová munashganno cawacunapaj. ¿Imanir? Jehovaga ricaycanmi ima ruraycashganchita y espiritunga poderyojmi (Gén. 1:2). Jehovapa espiritunga yanapämanchi y calpatapis gomanchi alicunata ruranapaj. Santiagupis caypita parlarmi nergan: “Alikunata mana rurashqaqa Tayta Diosman yärakushqantsipis manakaqlapaq kaykan” (Sant. 2:26). Diospa santo espiritun yanapämashganchita cawayninchichomi ricacanman rurayninchicunacho y parlashganchichopis.

17. ¿Imatataj rurashwan öraga pitapis mana alipa trataycuptinchega?

¹⁷ Unayna Jehovata sirviycarpis waquincuna öraga pitapis mana cuyapaylapa trataycunmanmi. Chayno captenga, jinala calpachacunmanmi. Cayman yarparcushun: más alin caj ropanchi ichic rachicäcuptenga manami jucla jitarinchichu ¿au? Sinoga jiraycunchimi yapay jaticunapaj y chaypitaga imatapis cuidaduwanna ruranchi. Chauraga waquincunata imaylapis ali shimilapa mana parlapaptinchi o pacienciacoj mana captinchega, laquicurla guepaman ama cutishwanchu; sinoga shongupita disculpacushwanmi chaynopa runa masinchiwan ali caycänapaj. Y yapaychoga más alina trataycunapaj calpachacushun.

18. ¿Imatataj ama gongashwanchu?

¹⁸ Jesús imano cashganpita yachacuptinchega, ¡alapami yanapämanchi! Pay yarpashganno noganchipis yarpaptinchega ali cajcunalatami rurashun y mushoj runano cawacushun. Cay yachachicuychoga yachacushcanchi imano cuyacoj canapaj, piwanpis jaucala cawanapaj, ali shongu y yanapacoj canapaj. Pero alichi canman Bibliacho maslata yachacunapaj imano Dios munashganno cawanapaj, imalachopis mejoranapaj caycanchi. Chaypäga Guía de estudio para los testigos de Jehová nishganta ashiy, y “El vivir cristiano” nishganman yaycuriy, nircur “Fruto del espíritu” cajpita yachacuy. Cayta ama gongashunchu: Taytalanchi Jehovaga yanapämäshunmi waran waran calpachacuptinchi mushoj runano imaypis cawanapaj.