سچے خدا نے ساریاں چیزاں بنائیاں نیں۔‏ اوہ ہمیشاں توں اے تے ہمیشاں تک رہوے گا۔‏ (‏زبور 90:‏2‏)‏ پاک کلام وچ دِتی گئی خوشخبری اوہدے وَلوّں اے۔‏ (‏1-‏تیمُتھیُس 1:‏11‏)‏ خدا نے سانوں زندگی دِتی اے،‏ ایس لئی سانوں صرف اوہدی عبادت کرنی چاہیدی اے۔‏​—‏مکاشفہ 4:‏11 نوں پڑھو۔‏

کسے وی انسان نے خدا نوں کدی نئیں ویکھیا کیونکہ اوہ اِک رُوح اے۔‏ اوہ اسمان تے رہندا اے،‏ ایس لئی اوہدا بدن زمین تے رہن والے انساناں ورگا نئیں سگوں بوہت اُچا تے افضل اے۔‏ (‏یوحنا 1:‏18؛‏ 4:‏24‏)‏ پر فیر وی اَسی خدا دیاں بنائیاں ہوئیاں چیزاں راہیں اوہدیاں صفتاں دی جھلک ویکھ سکنے آں۔‏ مثال دے طور تے طرحاں طرحاں دے پَھلاں تے پُھلاں نوں ویکھ کے سانوں خدا دے پیار تے دَنائی دا ثبوت مِلدا اے۔‏ ساری کائنات اوہدی قدرت دے رنگ وکھاندی اے۔‏​—‏یرمیاہ 10:‏12 نوں پڑھو۔‏

پاک کلام پڑھ کے اَسی خدا دی ذات بارے ہور جان سکنے آں۔‏ خدا دا کلام دسدا اے کہ اوہنوں کیہہ پسند اے تے کیہہ نئیں،‏ اوہ انساناں نال کیویں پیش آؤندا اے تے جدوں لوک چنگے یاں بُرے کم کردے نیں تے اوہ کیہہ محسوس کردا اے۔‏​—‏زبور 103:‏7-‏10 نوں پڑھو۔‏

یسوع مسیح چاہندے سن کہ خدا دا ناں پاک منیا جائے۔‏ (‏متی 6:‏9‏)‏ خدا دے بوہت سارے لقب نیں پر اوہدا اِک ای ناں اے۔‏ پنجابی وچ خدا دا ناں ”‏یہوواہ“‏ اے۔‏​—‏زبور 83:‏18 نوں پڑھو۔‏

بائبل دے کئی ترجمیاں وچوں خدا دا ناں کڈھ کے ایہدی جگہ ”‏خدا“‏ یاں ”‏خداوند“‏ ورگے لقب لا دِتے گئے نیں۔‏ پر جدوں بائبل لکھی گئی سی تے ایہدے وچ خدا دا ناں تقریباً 000،‏7 واری لکھیا گیا سی۔‏ یسوع مسیح نے خدا دا پیغام دیندے ویلے لوکاں نوں خدا دے ناں توں واقف کرایا۔‏​—‏یوحنا 17:‏26 نوں پڑھو۔‏

ویڈیو ‏”‏خدا دا ناں کیہہ اے؟‏“‏ ویکھو۔‏

دُنیا وچ ہر پاسے دُکھ تکلیفاں نیں۔‏ کیہہ ایہدا مطلب ایہہ وے کہ یہوواہ خدا ساڈی فکر نئیں کردا؟‏ بوہت سارے لوک سوچدے نیں کہ اوہ سانوں آزماؤن لئی ساڈے تے مصیبتاں لیاؤندا اے،‏ پر ایہہ گل سراسر جھوٹ اے۔‏​—‏یعقوب 1:‏13 نوں پڑھو۔‏

خدا نے ہر انسان نوں اپنے فیصلے آپ کرن دی آزادی دے کے عزت بخشی اے۔‏ اَسی ایس گل لئی خدا دے کِنّے شکرگزار آں کہ ایہہ فیصلہ اوہنے ساڈے تے چھڈ دِتا اے کہ اَسی اوہدی خدمت کراں گے یاں نئیں۔‏ (‏یشوع 24:‏15‏)‏ پر کئی لوک ایس آزادی دا ناجائز فائدہ چُک کے دُوجیاں نوں تکلیف پہنچاندے نیں۔‏ ایس وجہ توں بوہت سارے انسان مصیبتاں دی چکی وچ پِس رہے نیں۔‏ ایہہ بے انصافی ویکھ کے یہوواہ بوہت دُکھی ہوندا اے۔‏​—‏پیدایش 6:‏5،‏ 6 نوں پڑھو۔‏

یہوواہ خدا ساڈی دِلوں فکر کردا اے تے چاہندا اے کہ ساڈی زندگی خوشحال ہووے۔‏ اوہ وقت دُور نئیں جدوں خدا دُکھ تکلیفاں تے بُرے لوکاں نوں ختم کر دوے گا۔‏ پر اوہنے حالے تک دُکھ تکلیفاں نوں ختم کیوں نئیں کیتا؟‏ اَسی اٹھویں سبق وچ ایہدی وجہ جاناں گے۔‏​—‏2-‏پطرس 2:‏9؛‏ 3:‏7،‏ 13 نوں پڑھو۔‏

یہوواہ خدا ہر اِک وچ دلچسپی لیندا اے،‏ ایس لئی اوہ سانوں دُعا دے ذریعے اپنے نیڑے آؤن لئی کہندا اے۔‏ (‏زبور 65:‏2؛‏ 145:‏18‏)‏ ساڈے ساریاں کولوں کدی نہ کدی خطا ہو جاندی اے۔‏ پر جدوں خدا ویکھدا اے کہ اَسی اوہنوں خوش کرن دی کوشش کرنے آں تے اوہ سانوں دِلوں معاف کردا اے۔‏ جی ہاں،‏ گنہگار ہون دے باوجود اَسی اوہدے نال اِک قریبی رشتہ جوڑ سکنے آں۔‏​—‏زبور 103:‏12-‏14؛‏ یعقوب 4:‏8 نوں پڑھو۔‏

یہوواہ نے سانوں زندگی دِتی اے،‏ ایس لئی اوہدے نال ساڈا پیار ہر رشتے توں ودھ کے ہونا چاہیدا اے۔‏ (‏مرقس 12:‏30‏)‏ اَسی خدا بارے ہور سکھ کے تے اوہدے حکم من کے اپنا پیار ظاہر کر سکنے آں۔‏ ایس طرحاں یہوواہ نال ساڈا رشتہ مضبوط ہوندا جاوے گا۔‏​—‏1-‏تیمُتھیُس 2:‏4؛‏ 1-‏یوحنا 5:‏3 نوں پڑھو۔‏