گورننگ باڈی وَلّوں خط
پاک کلام چ کہیا گیا اے کہ توانوں اُستاد بن جانا چاہی دا اے۔ (عبرانیوں 5:12) ذرا سوچو کہ کائنات دا سب توں ماہر اُستاد یہوواہ خدا سانوں کہندا اے کہ اَسی دُوجیاں نُوں اوہدے بارے سکھائیے۔ اپنے خاندان، کلیسیا یاں منادی چ یہوواہ خدا بارے تلیم دینا بڑے مان دی گل اے تے نالے اِک وڈی ذمےداری وی اے۔ پر اَسی تلیم دین چ ماہر کیویں بن سکنے آں؟
ایس سوال دا جواب اوس گل توں مِلدا اے جیہڑی پولس رسول نے تیمُتھیُس نُوں کہی سی۔ اوہناں نے کہیا کہ نصیحت کرن، تلیم دین تے صحیفیاں نُوں پڑھن چ لگے رہوو۔ اِنج تُسی اپنے آپ نُوں تے اوہناں لوکاں نُوں بچا لوو گے جیہڑے تواڈی گل سُن دے نیں۔ (1-تیمُتھیُس 4:13، 16) تواڈے کول زندگی دین والا پیغام اے۔ ایس لئی ضروری اے کہ تُسی تلیم دین تے پڑھن دی صلاحیت نُوں ہور نکھارو۔ تے ایہہ کتاب ایس کم چ تواڈی مدد کرے گی۔ ایہدیاں کجھ خاص گلاں تے غور کرو۔
ہر صفحے تے اِک ایت دا حوالہ دِتا گیا اے جدے چ اوس نکتے بارے کوئی اصول دَسیا گیا اے یاں فیر کوئی مثال دِتی گئی اے جدے تے تُسی کم کر رہے او۔
یہوواہ خدا توں وڈا تے چنگا اُستاد ہور کوئی نئیں۔ (ایوب 36:22؛ یسعیاہ 30:20) ایہہ سچ اے کہ ایس کتاب دی مدد نال تُسی تلیم دین تے پڑھن چ ماہر بن سکدے او، پر یاد رکھو کہ ساڈا پیغام یہوواہ خدا وَلّوں اے تے اوہی لوکاں نُوں اپنے وَل کھچدا اے۔ (یوحنا 6:44) ایس لئی اوہدے کولوں پاک روح منگدے رہوو تے اوہدا کلام بوہتے توں بوہتا استمال کرو۔ لوکاں دا دھیان اپنے وَل نئیں سگوں یہوواہ خدا وَل کھچو۔ اوہناں دے دل چ اوہدے لئی پیار جگاؤن دی پوری کوشش کرو۔
توانوں دُوجیاں نُوں سب توں ضروری پیغام سناؤن دا مان بخشیا گیا اے۔ سانوں پورا یقین اے کہ تُسی یہوواہ خدا دی طاقت نال ایہہ پیغام سناؤن دی ذمےداری چنگی طرحاں نبھاؤ گے۔—1-پطرس 4:11۔
تواڈے بھرا،
یہوواہ دے گواہواں دی گورننگ باڈی