اہم سوال
کِنہاں نُوں زمین تے زندہ کیتا جائے گا تے اوہناں نال کیہہ ہوئے گا؟
آؤ ویکھئے کہ بائبل چ ایہناں سوالاں دے کیہہ جواب دِتے گئے نیں۔
اعمال 24:15 چ لکھیا اے: خدا نیک تے بُرے دونویں طرحاں دے لوکاں نُوں زندہ کرے گا۔ نیک توں مُراد اوہ لوک نیں جیہڑے اپنی موت توں پہلاں یہوواہ دے حکماں تے چلدے سن۔ ایس لئی اوہناں دے ناں زندگی دی کتاب چ لکھے ہوئے نیں۔ (ملاکی 3:16) بُرے توں مُراد اوہ لوک نیں جیہڑے یہوواہ بارے سکھن توں پہلاں ای فوت ہو گئے۔ ایس لئی اوہناں دے ناں زندگی دی کتاب چ نئیں لکھے ہوئے۔
یوحنا 5:28، 29 (اُردو ریوائزڈ ورشن) چ وی اوہناں ای دو گروہواں بارے گل ہو رہی اے جنہاں دا ذکر اعمال 24:15 چ ہویا اے۔ غور کرو کہ ایہناں دونواں گروہواں بارے یسوع مسیح نے یوحنا 5:28، 29 چ کہیا: جیہڑے قبراں وچ نیں اوہدی آواز سن کے نِکلن گے۔ جنہاں نے نیکی کیتی اے زندگی دی قیامت دے واسطے تے جنہاں نے بدی کیتی اے سزا دی قیامت دے واسطے۔ نیک لوکاں دے ناں زندگی دی کتاب چ لکھے ہوئے نیں کیونکہ اوہناں نے اپنی موت توں پہلاں چنگے کم کیتے سن۔ ایس لئی اوہناں نُوں زندگی دی قیامت ملے گی۔ پر جنہاں نے اپنی موت توں پہلاں بدی کیتی سی اوہناں دے ناں زندگی دی کتاب چ نئیں لکھے ہوئے۔ اوہناں نُوں سزا دی قیامت ایس لحاظ نال ملے گی کہ نوِیں دُنیا چ اوہناں دی عدالت کیتی جائے گی یعنی اوس ویلے اوہناں دے کماں نُوں پرکھیا جائے گا۔ جے اوہ یہوواہ بارے سکھن توں بعد اوہدی مرضی تے چلن گے تے اوہناں دے ناں زندگی دی کتاب چ لکھے جان گے۔
مکاشفہ 20:12، 13 چ دَسیا گیا اے کہ زندہ ہو جان والے سارے لوکاں نُوں کتاباں چ لکھیاں ہوئیاں گلاں تے عمل کرنا ہوئے گا۔ ایہہ گلاں اوہ نویں قانون ہون گے جیہڑے خدا سانوں نوِیں دُنیا چ دَوے گا۔ جیہڑے لوک ایہناں قانوناں نُوں نئیں منن گے اوہناں نُوں ہمیشاں لئی ختم کر دِتا جائے گا۔—یسعیاہ 65:20۔
دانیایل 12:2 چ پیشینگوئی کیتی گئی سی کہ جیہڑے مٹی چ سو رہے نیں اوہناں وچوں کئی جاگ اُٹھن گے، کجھ ہمیشاں دی زندگی پان لئی تے کجھ بےعزتی تے ہمیشاں تک ذلیل ہون لئی۔ ایس ایت چ زندہ ہون والے لوکاں دی آخری عدالت بارے گل کیتی جا رہی اے۔ اوہناں نُوں یاں تے ہمیشاں دی زندگی ملے گی یاں فیر اوہ ہمیشاں تک ذلیل ہون گے۔ ایہدا مطلب اے کہ 1000 سال دے آخر تے کجھ لوکاں نُوں ہمیشاں دی زندگی ملے گی تے کجھ لوکاں نُوں ہمیشاں لئی ختم کر دِتا جائے گا۔—مکاشفہ 20:15؛ 21:3، 4۔
ایس بارے ذرا ایس مثال تے غور کرو۔ جنہاں نیک تے بُرے لوکاں نُوں زندہ کیتا جائے گا اوہناں دی حالت اوہناں لوکاں ورگی ہوئے گی جیہڑے کسے دُوجے ملک جا کے وَسنا چاہندے نیں۔ نیک لوک اوہناں لوکاں وانگوں نیں جنہاں نُوں اوس ملک چ کم کرن یاں رہن دا ویزہ مِل جاندا اے۔ ایس ویزے نال اوہناں نُوں کسے حد تک اوس ملک دے شہریاں ورگی آزادی تے کجھ حق مِل جاندے نیں۔ پر بُرے لوک اوہناں لوکاں وانگوں نیں جنہاں نُوں عارضی ویزہ مِلدا اے۔ اوہناں نُوں نویں ملک چ وَسن لئی اپنے کماں توں ثابت کرنا پیندا اے کہ اوہ اوتھے رہن دے لائق نیں۔ ایسے طرحاں بُرے لوکاں نُوں زندہ ہون توں بعد یہوواہ دے حکماں نُوں من کے ایہہ ثابت کرنا ہوئے گا کہ اوہ نوِیں دُنیا چ رہن دے لائق نیں۔ کسے ملک چ لوک بھانویں جیہڑے مرضی ویزے تے گئے ہون پر شاید اوہناں وچوں کجھ نُوں ای اوتھوں دا شہری بنن دا موقع ملے جد کہ دُوجیاں نُوں اوتھوں کڈھ دِتا جائے۔ ایہہ فیصلہ اوہناں دے رویے تے کماں دی بِنا تے کیتا جاندا اے۔ ایسے طرحاں جنہاں لوکاں نُوں مُردیاں چوں زندہ کیتا جائے گا اوہناں دی عدالت ایس بِنا تے کیتی جائے گی کہ اوہ نوِیں دُنیا چ یہوواہ دی مرضی تے چلن گے یاں نئیں۔
یہوواہ صرف محبت کرن والا خدا ای نئیں اے سگوں اوہ اِنصاف کرن والا خدا وی اے۔ (اِستثنا 32:4؛ زبور 33:5) محبت دی وجہ توں اوہ نیک لوکاں تے بُرے لوکاں دونواں نُوں زندہ کرے گا۔ پر ایہدے نال نال اوہ چاہندا اے کہ ایہہ لوک صحی تے غلط بارے اوہدے معیاراں تے چلن۔ جیہڑے لوک یہوواہ نُوں پیار کرن گے تے اوہدے معیاراں مطابق چلن گے صرف اوہناں نُوں ای نوِیں دُنیا چ ہمیشاں تک رہن دی اجازت ملے گی۔
