مطالعے دا مضمون نمبر 45
اِک دُوجے نال اَٹل محبت کردے رہوو
ہر اِک اپنے بھرا تے کرم [اوہدے نال اَٹل محبت، ترجمہ نوِیں دُنیا] کرے۔—زکریاہ 7:9۔
گیت نمبر 107 (خوشی نال گاؤ): یہوواہ دے پیار دی مثال
مضمون تے اِک نظر *
1، 2. سانوں کیہڑیاں گلاں دی وجہ توں اِک دُوجے لئی اَٹل محبت ظاہر کرنی چاہی دی اے؟
اِک دُوجے لئی اَٹل محبت ظاہر کرن دی وجہ توں سانوں بوہت فائدہ ہوئے گا۔ ایہدے بارے جانن لئی امثال دی کتاب چوں کجھ ایتاں تے غور کرو: شفقت [یعنی اَٹل محبت] تے سچائی نُوں اپنے آپ توں دُور نہ ہون دے۔ فیر تُوں خدا تے انسان نُوں خوش کریں گا تے اوہناں دی نظر چ عقلمند بنیں گا۔ (امثال 3:3، 4) شفقت [یعنی اَٹل محبت ظاہر کرن والے] دا چنگا سلوک اوہدے لئی ای فائدےمند اے۔ (امثال 11:17) جیہڑا نیکی تے اَٹل محبت دی تلاش کردا اے اوہ زندگی پائے گا۔—امثال 21:21۔
2 ایہناں ایتاں چ تِن گلاں دَسیاں گئیاں نیں جنہاں دی وجہ توں سانوں اِک دُوجے لئی اَٹل محبت ظاہر کرنی چاہی دی اے۔ پہلی گل:اَٹل محبت ظاہر کرن دی وجہ توں اَسی یہوواہ دی نظر چ انمول بن جانے آں۔ دُوجی گل:اَٹل محبت ظاہر کر کے سانوں ای فائدہ ہوندا اے۔ مثال لئی، دُوجیاں نال ساڈی دوستی ہور مضبوط ہو جاندی اے۔ تیجی گل:اَٹل محبت ظاہر کرن دی وجہ توں سانوں مستقبل چ بوہت ساریاں برکتاں دے نال نال ہمیشاں دی زندگی وی ملے گی۔ واقعی سانوں یہوواہ دی ایس ہدیت تے عمل کر کے بوہت فائدے ہون گے کہ ہر اِک اپنے بھرا نال اَٹل محبت کرے۔—زکریاہ 7:9۔
3. ایس مضمون چ اَسی کیہڑے سوالاں تے غور کراں گے؟
3 ایس مضمون چ اَسی ایہناں چار سوالاں تے غور کراں گے:سانوں کِنہاں نال اَٹل محبت کرنی چاہی دی اے؟ اَسی اَٹل محبت ظاہر کرن بارے رُوت دی کتاب توں کیہہ سکھ سکنے آں؟ اَسی اَٹل محبت کیویں ظاہر کر سکنے آں؟ تے اَٹل محبت ظاہر کرن والیاں نُوں کیہڑے فائدے ہوندے نیں؟
سانوں کِنہاں نال اَٹل محبت کرنی چاہی دی اے؟
4. اَسی یہوواہ دی مثال تے عمل کر کے اَٹل محبت کیویں ظاہر کر سکنے آں؟ (مرقس 10:29، 30)
4 جیویں اَسی پچھلے مضمون چ ویکھیا سی یہوواہ صرف اوہناں لوکاں نال اَٹل محبت کردا اے جیہڑے اوہدے نال محبت کردے نیں تے اوہدی عبادت کردے نیں۔ (دانیایل 9:4) اَسی پیارے بچیاں وانگوں خدا دی مثال تے عمل کرنا چاہنے آں۔ (اِفسیوں 5:1) ایس لئی سانوں کلیسیا دے بھین بھراواں لئی اپنے دل چ اَٹل محبت پیدا کرنی چاہی دی اے—مرقس 10:29، 30 نُوں پڑھو۔
5، 6. سارے انساناں نال محبت کرن تے اَٹل محبت کرن چ کیہہ فرق اے؟
5 جے اَسی اَٹل محبت دے مطلب نُوں ہور چنگی طرحاں سمجھ جاواں گے تے فیر ساڈے لئی کلیسیا دے بھین بھراواں لئی ایہہ خوبی ظاہر کرنا ہور اسان ہو جائے گا۔ ایس لئی آؤ ویکھئے کہ سارے انساناں نال محبت کرن تے اَٹل محبت کرن چ کیہہ فرق اے۔ایہدے لئی اَسی اِک واقعے تے غور کراں گے جدے توں پتہ چلے گا کہ سارے انساناں نال محبت کرن دا کیہہ مطلب اے۔
6 ایہہ اوہ واقعہ اے جدوں پولُس رسول اِک بحری جہاز چ سفر کر رہیا سی تے جہاز تباہ ہو گیا سی۔ ایس جہاز دے مسافر تیر کے مالٹا ناں دے اِک جزیرے تے پونچے۔ ایس جزیرے دے لوک ایہناں مسافراں نُوں پہلاں کدی نئیں ملے سن۔ اوہناں دا اِک دُوجے نال کوئی رشتہ نئیں سی پر فیر وی اوہناں نے ایہناں اجنبیاں دی مہماننوازی کیتی تے اوہناں نال بڑی مہربانی نال پیش آئے۔ (اعمال 28:2، 7) ایہہ سچ اے کہ اوہناں نے ایہناں مسافراں لئی محبت وکھائی۔ پر ایہہ اَٹل محبت نئیں سی سگوں اِک ایہو جہی محبت سی جیہڑی سارے انساناں لئی ظاہر کیتی جا سکدی اے۔
7، 8. (الف) خدا دے بندے اِک دُوجے نال اَٹل محبت کیوں کردے نیں؟ (ب) اَسی رُوت دی کتاب تے کیوں غور کراں گے؟
7 سارے انساناں نال محبت اِک فرض سمجھ کے کیتی جا سکدی اے پر اَٹل محبت دلوں ظاہر کیتی جاندی اے۔ خدا دے بندیاں نے اِک دُوجے لئی اَٹل محبت کیوں ظاہر کیتی؟ اوہناں نے ایہہ اِک فرض سمجھ کے نئیں کیتا سگوں اوہناں چ اِنج کرن دی دلی خواہش سی۔ ذرا داؤد دی مثال تے غور کرو۔ داؤد نے دلوں اپنے دوست یونتن لئی اَٹل محبت ظاہر کیتی جد کہ یونتن دا پیو داؤد نُوں مارنا چاہندا سی۔ داؤد یونتن دی موت دے کئی سال بعد وی اوہدے لئی اَٹل محبت ظاہر کردا رہیا۔ اوہنے اِنج کیویں کیتا؟ اوہنے یونتن دے پُتر مفیبوست لئی اَٹل محبت ظاہر کیتی۔—1-سموئیل 20:9، 14، 15؛ 2-سموئیل 4:4؛ 8:15؛ 9:1، 6، 7۔
8 اَسی اَٹل محبت بارے رُوت دی کتاب توں بوہت کجھ سکھ سکنے آں۔آؤ ویکھئے کہ ایس کتاب چ جنہاں لوکاں دا ذکر کیتا گیا اے اوہناں توں اَسی اَٹل محبت بارے کیہہ سکھ سکنے آں۔ نالے اَسی اوہناں دی مثال تے عمل کر کے کلیسیا دے بھین بھراواں لئی اَٹل محبت کیویں ظاہر کر سکنے آں۔ *
اَسی اَٹل محبت ظاہر کرن بارے رُوت دی کتاب توں کیہہ سکھ سکنے آں؟
9. نعومی نُوں ایہہ کیوں لگیا کہ یہوواہ اوہدے خلاف ہو گیا اے؟
9 رُوت دی کتاب چ اَسی نعومی، اوہدی نونہہ رُوت تے بوعز بارے پڑھنے آں۔ بوعز نعومی دے شوہر دا رشتےدار سی تے یہوواہ نُوں بوہت پیار کردا سی۔ ملک اِسرائیل چ کال دی وجہ توں نعومی، اوہدا شوہر تے اوہناں دے دونویں پُتر ملک موآب چلے گئے۔اوتھے نعومی دا شوہر فوت ہو گیا۔ اوہدے دونویں پُتراں نے شادی کر لئی۔ پر افسوس دی گل اے کہ اوہ دونویں وی مر گئے۔ (رُوت 1:3-5؛ 2:1) ایہناں صدمیاں دی وجہ توں نعومی پوری طرحاں ٹُٹ گئی۔ اوہ اینی دُکھی سی کہ اوہنوں لگیا کہ یہوواہ اوہدے خلاف ہو گیا اے۔ غور کرو کہ اوہنے خدا بارے کہیا: یہوواہ دا ہتھ میرے خلاف اُٹھیا اے۔ قادرِمطلق نے میری زندگی مشکلاں نال بھر دِتی اے۔ اوہنے ایہہ وی کہیا: یہوواہ میرے خلاف ہو گیا اے تے قادرِمطلق نے مینوں دُکھ دِتا اے۔—رُوت 1:13، 20، 21۔
10. یہوواہ نُوں نعومی دِیاں کوڑیاں گلاں سُن کے کیہو جیہا لگیا تے اوہنے کیہہ کیتا؟
10 نعومی اینی دُکھی سی کہ اوہنے بڑیاں کوڑیاں گلاں کیتیاں پر فیر وی یہوواہ اپنی بندی تے غصہ نئیں ہویا۔ ایہدی بجائے اوہنے نعومی دے درد نُوں سمجھیا۔ یہوواہ نُوں پتہ اے کہ ظلم دی وجہ توں عقلمند بندہ وی پاگل ہو سکدا اے۔ (واعظ 7:7) نعومی ایہہ نئیں ویکھ پا رہی سی کہ یہوواہ اوہدے نال اے۔ ایس اوکھی گھڑی چ یہوواہ نے اوہدی مدد کیویں کیتی؟ (1-سموئیل 2:8) اوہنے رُوت دے دل چ ایہہ خواہش پائی کہ اوہ نعومی لئی اَٹل محبت ظاہر کرے۔ رُوت نے بڑے پیار نال نعومی دی مدد کیتی تاکہ اوہ غم دے ہنیریاں چوں نکل سکے تے ایہہ ویکھ سکے کہ یہوواہ ہُن وی اوہدے نال بوہت پیار کردا اے۔اَسی رُوت توں کیہہ سکھنے آں؟
11. بوہت سارے بھین بھرا دُکھی تے بےحوصلہ بھین بھراواں دی مدد کرن دی کوشش کیوں کردے نیں؟
11 اَٹل محبت دی وجہ توں اَسی دُکھی تے بےحوصلہ بھین بھراواں دی مدد کرن دی کوشش کرنے آں۔ جیس طرحاں رُوت نے نعومی دا ساتھ نئیں چھڈیا اوسے طرحاں اَج بوہت سارے بھین بھرا کلیسیا چ اپنے اوہناں بھین بھراواں دا ساتھ نئیں چھڈ دے جیہڑے دُکھی تے بےحوصلہ نیں۔ (امثال 12:25؛ 24:10) اوہ ایہناں بھین بھراواں نال بوہت پیار کردے نیں۔ اوہ اوہناں دی مدد کرن لئی جو کجھ کر سکدے نیں خوشی خوشی کردے نیں۔ اِنج اوہ پولُس دی ایس ہدیت تے عمل کر رہے ہوندے نیں: بےحوصلہ لوکاں نُوں تسلی دَوو، کمزوراں دی مدد کرو تے ساریاں نال صبر نال پیش آؤ۔—1-تھسلُنیکیوں 5:14۔
کسے بے حوصلہ بھین یاں بھرا دی گل سُن کے اَسی اوہدی بڑی مدد کر سکنے آں۔ (پیراگراف نمبر 12 نُوں ویکھو۔)
12. کسے بے حوصلہ بھین یاں بھرا دی مدد کرن دا سب توں ودھیا طریقہ کیہہ اے؟
12 کسے بے حوصلہ بھین یاں بھرا دی مدد کرن دا سب توں ودھیا طریقہ ایہہ وے کہ اَسی اوہدی گل دھیان نال سنیے تے اوہنوں ایس گل دا یقین دَوائیے کہ اَسی اوہنوں بوہت پیار کرنے آں۔ یہوواہ دی نظر چ اوہدا ہر بندہ انمول اے۔ ایس لئی جدوں تُسی کسے دُکھی بھین یاں بھرا نُوں توجہ دیندے او تے یہوواہ ایہدی بڑی قدر کردا اے۔ (زبور 41:1) امثال 19:17 چ لکھیا اے: جیہڑا بندہ غریباں تے رحم کردا اے اوہ یہوواہ نُوں اُدھار دیندا اے تے اوہ اپنی نیکی دا بدلہ پائے گا۔
رُوت اپنی سس نعومی دے نال اے جد کے عرفہ ملک موآب واپس جا رہی اے۔ رُوت نعومی نُوں کہہ رہی اے: ”جِتھے تُوں جائیں گی میں جاواں گی۔“ (پیراگراف نمبر 13 نُوں ویکھو۔)
13. (الف) رُوت تے عرفہ دے فیصلے چ کیہہ فرق سی؟ (ب) رُوت دے فیصلے توں اَٹل محبت کیویں ظاہر ہوئی؟
13 جدوں اَسی ایس گل تے غور کرنے آں کہ نعومی دے شوہر تے اوہدے پُتراں دی موت توں بعد اوہدے نال کیہہ ہویا تے اَسی اَٹل محبت نُوں ہور چنگی طرحاں سمجھ پانے آں۔ جدوں نعومی نُوں پتہ چلیا کہ یہوواہ اپنی قوم تے رحم کر کے اوہناں نُوں فیر توں چنگیاں فصلاں دے رہیا اے تے اوہنے اپنے ملک واپس جان دا فیصلہ کیتا۔ (رُوت 1:6) رُوت تے عرفہ وی اوہدے نال ٹُر پئیاں۔ پر راہ چ نعومی نے تِن وار اوہناں نُوں موآب واپس جان لئی کہیا۔ فیر کیہہ ہویا؟ بائبل چ دَسیا گیا اے کہ عرفہ نے اپنی سس نُوں چُمیا تے چلی گئی پر رُوت نے اپنی سس دا ساتھ نئیں چھڈیا۔ (رُوت 1:7-14) عرفہ نے نعومی دی گل من لئی پر رُوت نے نعومی دی گل منن نالوں کجھ بہتر کیتا۔ جے رُوت چاہندی تے اوہ موآب واپس جا سکدی سی پر اَٹل محبت دی وجہ توں اوہنے اپنی سس دے نال رہن دا فیصلہ کیتا کیونکہ نعومی نُوں سہارے دی لوڑ سی۔ (رُوت 1:16، 17) رُوت نے فرض سمجھ کے نعومی دا ساتھ نئیں دِتا سگوں اوہ دلوں اِنج کرنا چاہندی سی۔ رُوت دا فیصلہ اَٹل محبت دا ثبوت سی۔ اوہنے جو کجھ کیتا اَسی اوہدے توں کیہہ سکھنے آں؟
14. (الف) اَج بوہت سارے بھین بھرا کیہہ کردے نیں؟ (ب) عبرانیوں 13:16 دے مطابق خدا کیہو جہیاں قربانیاں پسند کردا اے؟
14 اَٹل محبت دی وجہ توں اَسی اپنے بھین بھراواں دی امید توں وی ودھ کے اوہناں دی مدد کرنے آں۔ پرانے زمانے چ خدا دے بندیاں وانگوں اَج وی خدا دے بوہت سارے بندے اپنے ہمایماناں لئی اَٹل محبت ظاہر کردے نیں، اوہناں بھین بھراواں لئی وی جنہاں نُوں اوہ کدی نئیں ملے۔ مثال لئی، جدوں اوہناں نُوں پتہ لگدا اے کہ کسے علاقے چ کوئی قدرتی آفت آئی اے تے اوہ فوراً ایہہ جانن دی کوشش کردے نیں کہ اوہ اوتھے دے بھین بھراواں دی مدد کیویں کر سکدے نیں۔ جے کلیسیا چ کسے تے کوئی مشکل آندی اے تے اوہ اوہدی مدد کرن توں پچھے نئیں ہٹ دے۔ پہلی صدی عیسوی چ رہن والے مقدونیہ دے مسیحیاں وانگوں اوہ کلیسیا دے بھین بھراواں دی امید توں وی ودھ کے اوہناں دی مدد کرن دی کوشش کردے نیں۔ مقدونیہ دے مسیحیاں وانگوں اوہ اپنے ضرورتمند بھین بھراواں دی مدد کرن لئی جنہاں دے سکدے نیں، اوہدے توں وی زیادہ دین دی کوشش کردے نیں۔ (2-کُرنتھیوں 8:3) ذرا سوچو کہ اوہناں دی اَٹل محبت ویکھ کے یہوواہ نُوں کِنّی خوشی ہوندی اے۔—عبرانیوں 13:16 نُوں پڑھو۔
اَسی اَٹل محبت کیویں ظاہر کر سکنے آں؟
15، 16. سانوں کیویں پتہ اے کہ رُوت نے نعومی دی مدد کرن چ ہمت نئیں ہاری؟
15 رُوت نے نعومی دی مدد کرن لئی جو کجھ وی کیتا اوہدے توں اَسی بوہت کجھ سکھ سکنے آں۔ آؤ ایہناں وچوں کجھ گلاں تے غور کرئیے۔
16 ہمت نہ ہارو۔ جدوں رُوت نے نعومی نُوں کہیا کہ اوہ اوہدے نال یہوداہ جائے گی تے شروع شروع چ نعومی نے اوہنوں اِنج کرن توں منع کر دِتا۔ پر رُوت نے ہمت نئیں ہاری۔ ایہدا کیہہ نتیجہ نکلیا؟ جدوں نعومی نے ویکھیا کہ رُوت نے اوہدے نال جان دی ٹھان لئی اے تے اوہنے اوہنوں ہور کجھ نئیں کہیا۔—رُوت 1:15-18۔
17. کیہڑی چیز ساڈی مدد کرے گی تاکہ اَسی چھیتی ہمت نہ ہارئیے؟
17 اَسی کیہہ سکھنے آں؟ کسے دُکھی بھین بھرا دی مدد کرن لئی صبر دی ضرورت ہوندی اے۔ ایس لئی سانوں ہمت ہارے بغیر اوہدی مدد کرنی چاہی دی اے۔ ہو سکدا اے کہ شروع شروع چ کوئی بھین ساڈی مدد قبول نہ کرے۔ * پر اَٹل محبت دی وجہ توں اَسی فیر وی اوس بھین دا ساتھ دین دی پوری کوشش کراں گے۔ (گلتیوں 6:2) اَسی ایہہ امید نئیں چھڈاں گے کہ اِک نہ اِک دن اوہ ساڈی مدد قبول کر لے گی۔
18. کیہڑی گل دی وجہ توں رُوت نُوں تکلیف پونچی ہوئے گی؟
18 بُرا نہ مناؤ۔ جدوں نعومی تے رُوت بیتالحم پونچیاں تے نعومی اپنے پرانے گوانڈھیاں نُوں مِلی۔ نعومی نے اوہناں نُوں کہیا: میں بھری پوری گئی ساں پر یہوواہ مینوں خالی ہتھ واپس لے کے آیا اے۔ (رُوت 1:21) ذرا سوچو کہ نعومی دی ایہہ گل سُن کے رُوت تے کیہہ بیتی ہوئے گی۔ اوہ نعومی دی مدد کرن لئی جو وی کر سکدی سی اوہنے کیتا۔ اوہ نعومی دے نال روئی، اوہنوں تسلی دِتی تے اوہدے نال کئی دِناں دا سفر طے کر کے بیتالحم آئی۔ ایس سب دے باوجود نعومی نے کہیا: ”یہوواہ مینوں خالی ہتھ واپس لے کے آیا اے۔“ بھانویں کہ رُوت نعومی دے نال سی پر نعومی دی گل توں اِنج لگ رہیا سی کہ اوہدی نظر چ رُوت دے ساتھ دی کوئی اہمیت نئیں سی۔ ایہدے توں رُوت نُوں کِنّی تکلیف پونچی ہوئے گی۔ پر فیر وی اوہنے نعومی دا ساتھ نئیں چھڈیا۔
19. کیہڑی چیز ساڈی مدد کرے گی تاکہ اَسی اپنے کسے بے حوصلہ بھین یاں بھرا دا ساتھ نہ چھڈئیے؟
19 اَسی کیہہ سکھنے آں؟ ہو سکدا اے کہ اَسی کسے بے حوصلہ بھین دی مدد کرن دی پوری کوشش کرئیے۔ پر شاید اوہ سانوں کوئی ایہو جہی گل کہہ دے جدے توں سانوں بوہت تکلیف پونچے۔ پر سانوں اوہدی گل دا بُرا نئیں منانا چاہی دا۔ سانوں اوہدا ساتھ دیندے رہنا چاہی دا اے تے دُعا چ یہوواہ کولوں مدد منگنی چاہی دی اے تاکہ اَسی اوس بھین نُوں حوصلہ تے تسلی دیندے رہیے۔—امثال 17:17۔
کلیسیا دے بزرگ بوعز دی مثال تے کیویں عمل کر سکدے نیں؟ (پیراگراف نمبر 20-21 نُوں ویکھو۔)
20. کیہڑی گل توں رُوت نُوں حوصلہ ملیا تاکہ اوہ نعومی دی مدد کردی رہوے؟
20 اوس وقت دُوجیاں دا حوصلہ ودھاؤ جدوں اوہناں نُوں ایہدی ضرورت اے۔ رُوت نے نعومی لئی اَٹل محبت ظاہر کیتی سی۔ پر ہن رُوت نُوں آپ حوصلے دی ضرورت سی۔ ایس لئی یہوواہ نے بوعز دے ذریعے رُوت دا حوصلہ ودھایا۔ بوعز نے رُوت نُوں کہیا: یہوواہ تینوں تیرے کماں دا اجر دَوے تے اِسرائیل دے خدا یہوواہ وَلّوں تینوں برکتاں مِلن جدے پَراں تھلے تُوں پناہ لین آئی ایں۔ ایس گل توں رُوت نُوں بڑا حوصلہ ملیا تے اوہنے بوعز نُوں کہیا: تُوں اپنیاں گلاں نال مینوں تسلی دِتی اے تے تُوں اپنی نوکرانی لئی مہربانی وکھائی اے۔ (رُوت 2:12، 13) بوعز نے اوہدوں رُوت دا حوصلہ ودھایا جدوں اوہنوں ایہدی بڑی لوڑ سی۔ ایہدے توں رُوت نُوں ہمت مِلی کہ اوہ نعومی دی مدد کردی رہوے۔
21. یسعیاہ 32:1، 2 دے مطابق بزرگ کیہہ کردے نیں؟
21 اَسی کیہہ سکھنے آں؟ جیہڑے لوک دُوجیاں لئی اَٹل محبت ظاہر کردے نیں کدی کدی اوہناں نُوں وی حوصلے دی ضرورت ہوندی اے۔ جدوں بوعز نے ویکھیا کہ رُوت نے نعومی دی کِنّی مدد کیتی اے تے اوہنے رُوت دی تعریف کیتی۔ جدوں کلیسیا دے بزرگ اوہناں بھین بھراواں نُوں ویکھدے نیں جیہڑے دُوجیاں دی مدد کردے نیں تے اوہ وی اوہناں دی تعریف کردے نیں۔ اِنج ایہناں بھین بھراواں دا حوصلہ ودھدا اے کہ اوہ دُوجیاں دے مدد کردے رہن۔—یسعیاہ 32:1، 2 نُوں پڑھو۔
اَٹل محبت ظاہر کرن والیاں نُوں کیہڑے فائدے ہوندے نیں؟
22، 23. نعومی دی سوچ کیویں بدلی تے کیوں؟ (زبور 136:23، 26)
22 تھوڑے عرصے بعد بوعز نے رُوت تے نعومی نُوں بوہت سارا اناج دِتا۔ (رُوت 2:14-18) بوعز دی دریا دلی ویکھ کے نعومی نے کیہہ کیتا؟ اوہنے کہیا: زندہ تے مرے ہوئیاں لئی اَٹل محبت وکھان والا خدا یہوواہ، اوہنوں برکت دَوے۔ (رُوت 2:20) نعومی دی سوچ کِنّی بدل گئی سی۔ پہلاں دُکھی ہون دی وجہ توں اوہنے کہیا سی: ”یہوواہ دا ہتھ میرے خلاف اُٹھیا اے۔“ پر ہُن اوہ اینی خوش سی کہ اوہنے کہیا: ”یہوواہ اَٹل محبت وکھان والا خدا اے۔“ پر نعومی دی سوچ کیہڑی وجہ توں بدلی؟
23 ہُن نعومی سمجھ گئی کہ یہوواہ نے اوہنوں کدی کلّا نئیں چھڈیا سی۔ نعومی نُوں احساس ہویا کہ یہوواہ نے رُوت دے ذریعے اوس ویلے اوہدا ساتھ دِتا جدوں اوہ یہوداہ واپس آ رہی سی۔ (رُوت 1:16) نعومی نے اوہدوں وی یہوواہ دا ساتھ محسوس کیتا جدوں یہوواہ نے بوعز دے ذریعے اوہدی تے رُوت دی مدد کیتی جیہڑا اوہدے نزدیک دے قرابتیاں وچوں اِک سی۔ * (رُوت 2:19، 20) نعومی نے ضرور ایہہ سوچیا ہوئے گا: ”ہُن مینوں یقین ہو گیا اے کہ یہوواہ نے مصیبتاں چ مینوں کدی وی کلّا نئیں چھڈیا سی۔“ (زبور 136:23، 26 نُوں پڑھو۔) نعومی ایس گل لئی کِنّی شکرگزار ہوئی ہوئے گی کہ رُوت تے بوعز نے اوہدی مدد کرن چ ہمت نہ ہاری۔اوہ تنوں ایس گل توں بڑے خوش ہوئے ہون گے کہ نعومی دی خوشی واپس آ گئی اے تے اوہ فیر توں یہوواہ دی خدمت جوش نال کرن لگ پئی اے۔
24. سانوں اپنے ہم ایماناں لئی اَٹل محبت کیوں ظاہر کردے رہنا چاہی دا اے؟
24 اَسی رُوت دی کتاب توں اَٹل محبت بارے کیہہ سکھیا اے؟ اَٹل محبت دی وجہ توں اَسی اپنے بےحوصلہ بھین بھراواں دی مدد کرن چ چھیتی ہمت نئیں ہاراں گے تے اوہناں دی امید توں وی ودھ کے اوہناں دی مدد کراں گے۔ بزرگاں نُوں اوہناں بھین بھراواں دا حوصلہ ودھانا چاہی دا اے جیہڑے دُوجیاں لئی اَٹل محبت وکھا رہے نیں کیونکہ کدی کدی ایہناں بھین بھراواں نُوں وی حوصلے دے ضرورت ہوندی اے۔ جدوں ساڈے بےحوصلہ بھین بھراواں دی خوشی واپس آ جاندی اے تے اوہ فیر توں جوش نال یہوواہ دی عبادت کرن لگ پیندے نیں تے سانوں بڑی خوشی ہوندی اے۔ (اعمال 20:35) پر اَٹل محبت ظاہر کرن دی سب توں اہم وجہ ایہہ وے کہ اَسی یہوواہ نُوں خوش کرنا چاہنے آں تے اوہدی مثال تے عمل کرنا چاہنے آں جیہڑا شفقت چ غنی اے یعنی اوہدی اَٹل محبت دی کوئی حد نئیں۔—خروج 34:6؛ زبور 33:22۔
گیت نمبر 130 (خوشی نال گاؤ): دلوں معاف کرو
^ پیراگراف 5 یہوواہ چاہندا اے کہ اَسی کلیسیا چ بھین بھراواں لئی اَٹل محبت ظاہر کرئیے۔ ایس خوبی نُوں ہور چنگی طرحاں سمجھن لئی اَسی خدا دے کجھ ایہو جہے بندیاں دی مثال تے غور کراں گے جنہاں نے ایہہ خوبی ظاہر کیتی۔ اَسی رُوت، نعومی تے بوعز دی مثال تے غور کراں گے تے ویکھاں گے کہ اَسی ایہناں توں کیہہ سکھ سکنے آں۔
^ پیراگراف 8 ایس مضمون توں پورا فائدہ حاصل کرن لئی رُوت دی کتاب دے پہلے تے دُوجے باب نُوں پڑھو۔
^ پیراگراف 17 اَسی نعومی دی مثال تے غور کر رہے آں ایس لئی ایس پیراگراف چ اَسی بھیناں دا ذکر کیتا اے پر ایہہ ساریاں گلاں بھراواں تے وی لاگو ہوندیاں نیں۔
^ پیراگراف 23 جدوں اِک بندہ بےاولاد مر جاندا سی تے شریعت دے مطابق اوہدا بھرا یاں اوہدا کوئی قریبی رشتےدار اوہدی بیوی نال ویاہ کر کے اولاد پیدا کر سکدا سی تاکہ اوہ بچہ مرن والے دی نسل نُوں اَگے ودھائے تے اوہدی جائیداد دا وارث بنے۔
