قسم کھانا اِک بوہت ای سنجیدہ معاملہ اے۔ جیہڑا بندہ قسم کھاندا اے، اوہ اکثر خدا نُوں گواہ بنا کے کسے کم نُوں کر‌ن دا وعدہ کر‌دا اے۔ قسم یاں تے زبانی یاں فیر لکھ کے وی کھادی جا سکدی اے۔‏

شاید کجھ لوک سوچن کہ قسم کھانا غلط اے کیونکہ یسوع مسیح نے کہیا سی:‏ قسم بالکل نہ کھانا، تواڈی ہاں دا مطلب ہاں ہووے تے تواڈی نہ دا مطلب نہ ہووے کیونکہ جو کجھ ایہدے توں زیادہ اے، اوہ شیطان وَلّوں اے۔ (‏متی 5:‏33-‏37‏)‏ ایہدے چ کوئی شک نئیں کہ یسوع ایہہ جان دا سی کہ موسیٰ دی شریعت دے کجھ معاملیاں چ بنی‌اِسرائیل کولوں ایہہ توقع کیتی جاندی سی کہ اوہ قسم کھان۔ خدا دے ایہناں بندیاں نے اِنج کیتا وی۔ (‏پیدایش 14:‏22، 23؛‏ خروج 22:‏10، 11‏)‏ اوہ ایہہ وی جان دا سی کہ یہوواہ نے وی کجھ موقعیاں تے قسم کھادی۔ (‏عبرانیوں 6:‏13-‏17‏)‏ پر یسوع مسیح ایہہ نئیں کہہ رہیا سی کہ سانوں کدی وی قسم نئیں کھانی چاہی دی۔ ایہدی بجائے اوہ ایس گل توں منع کر رہیا سی کہ سانوں چھوٹیاں موٹیاں گلاں دی وجہ توں قسم نئیں کھانی چاہی دی۔ یہوواہ ساڈے کولوں وی ایہی چاہندا اے کہ اَسی ہمیشاں اپنے وعدیاں نُوں پورا کر‌ئیے۔‏

جے توانوں قسم کھان لئی کہیا جاندا اے تے تُسی کیہہ کر‌و گے؟ سب توں پہلاں تُسی ایہہ ویکھو کہ جیس کم لئی تُسی قسم کھان والے او، تُسی اوہ کم پورا وی کر سکدے او یاں نئیں۔ جے توانوں لگدا اے کہ تُسی اِنج نئیں کر سکدے تے چنگا ہوئے گا کہ تُسی قسم نہ کھاؤ۔ خدا دے کلام چ سانوں دَسیا گیا اے:‏ تیرا منت نہ مننا ایہدے توں چنگا اے کہ تُوں منت من کے ایہنوں پورا نہ کر‌یں۔ (‏واعظ 5:‏5‏)‏ ایہدے بعد بائبل دے کجھ ایہو جہے اصولاں تے غور کر‌و جیہڑے اوس قسم تے لاگو ہوندے نیں جیہڑی تُسی کھان والے او تے فیر اپنے ضمیر دے مطابق فیصلہ کر‌و۔ ایس بارے بائبل دے کجھ اصولاں تے غور کر‌و:‏

کجھ قسماں خدا دی مرضی دے خلاف نئیں ہوندیاں۔‏ مثال لئی، یہوواہ دے گواہواں چ جدوں اِک کُڑی تے منڈا شادی کر‌دے ویلے اِک دُوجے نال عہد کر‌دے نیں تے اصل چ اوہ اِک دُوجے نال قسم کھاندے نیں۔ دُلہا تے دُلہن خدا تے لوکاں دے سامنے اِک دُوجے نال وعدہ کر‌دے نیں کہ جدوں تک اوہ دونویں زندہ نیں، اوہ اِک دُوجے نال پیار نال پیش آن گے تے اِک دُوجے دی عزت کر‌ن گے۔ (‏دُوجے لوک شادی کر‌دے ویلے شاید ایہہ لفظ تے نہ کہن پر اوہ خدا دے سامنے وعدہ ضرور کر‌دے نیں۔)‏ ایہدے بعد دُلہا تے دُلہن، میاں بیوی بن جاندے نیں تے اوہناں دی شادی زندگی بھر دا بندھن بن جاندی اے۔ (‏پیدایش 2:‏24؛‏ 1-‏کُرنتھیوں 7:‏39‏)‏ شادی کر‌دے ویلے وعدے کر‌نا بالکل صحی اے تے ایہہ خدا دی مرضی دے مطابق اے۔‏

کجھ قسماں خدا دی مرضی دے خلاف ہوندیاں نیں۔‏ اِک سچا مسیحی ایہو جہی قسم نئیں کھائے گا جدے چ اوہ ایہہ وعدہ کر‌ے کہ اوہ اپنے ملک لئی لڑے گا یاں یہوواہ دی عبادت کر‌نا چھڈ دَوے گا۔ اِنج کر‌ن نال اوہ خدا دے حکماں نُوں توڑ رہیا ہوئے گا۔ سچے مسیحیاں نُوں دُنیا دا حصہ نئیں ہونا چاہی دا۔ ایس لئی اوہ جنگاں تے سیاسی معاملیاں چ حصہ نئیں لیندے۔—‏یوحنا 15:‏19؛‏ یسعیاہ 2:‏4؛‏ یعقوب 1:‏27‏۔‏

 کجھ قسماں دے معاملے چ اِک مسیحی اپنے ضمیر مطابق ایہہ فیصلہ کر سکدا اے کہ اوہ ایہہ قسماں کھائے گا یاں نئیں۔‏ کدی کدار جدوں اَسی کوئی قسم کھان بارے سوچنے آں تے سانوں یسوع مسیح دی ایس گل تے چنگی طرحاں سوچ‌وچار کر‌نا چاہی دا اے:‏ جیہڑیاں چیزاں قیصر دِیاں نیں اوہ قیصر نُوں دَوو، تے جیہڑیاں چیزاں خدا دِیاں نیں خدا نُوں دَوو۔—‏لُوقا 20:‏25‏۔‏

فرض کر‌و کہ اِک مسیحی کسے ملک دی شہریت یاں پاسپورٹ حاصل کر‌نا چاہندا اے تے اوہنوں پتہ چلدا اے کہ ایہدے لئی اوہنوں قسم کھانی پووے گی۔ جے اوس ملک چ قسم کھان دا مطلب ایہہ وے کہ اوہ ایہو جہے کم کر‌ن دا وعدہ کر‌ے جیہڑے خدا دے حکماں دے مطابق نئیں تے اوہ کیہہ کر‌ے گا؟ اوہ مسیحی اپنے ضمیر دی وجہ توں ایہہ قسم نئیں کھائے گا کیونکہ اوہنے بائبل چوں سکھیا اے کہ ایہہ خدا دی مرضی دے خلاف اے۔ پر ہو سکدا اے کہ اوس ملک دی حکومت اوس مسیحی نُوں ایہہ اجازت دے دَوے کہ اوہ قسم کھاندے ویلے اپنے ضمیر دے مطابق لفظاں نُوں بدل سکدا اے۔‏

ایس طرحاں اوہ مسیحی رومیوں 13:‏1 چ لکھے اصول تے عمل کر رہیا ہوئے گا جتھے لکھیا اے:‏ ہر شخص حاکماں دا تابع‌دار ہووے۔ اِک مسیحی ایہہ فیصلہ کر سکدا اے کہ ایہو جہے کم کر‌ن دی قسم کھان چ کوئی حرج نئیں جنہاں دی توقع خدا پہلاں توں ای مسیحیاں کولوں کر‌دا اے۔‏

اِک مسیحی نُوں اوس ویلے وی اپنے ضمیر دے مطابق فیصلہ کر‌نا چاہی دا اے جدوں قسم کھان لئی اوہدے سامنے کوئی چیز رکھی جاندی اے یاں فیر اوہنوں کوئی خاص اشارہ کر‌ن لئی کہیا جاندا اے۔ پرانے زمانے چ رومی تے سکوتی کسے بندے بارے گواہی دیندے ویلے اپنی تلوار دی قسم کھاندے سن جیہڑی جنگ دے دیوتا دی نشانی سی۔ یونانی قسم کھاندے ویلے اپنے ہتھ اسمان وَل چُک دے سن۔ اِنج اوہ ایہہ ظاہر کر‌دے سن کہ اِک ایہو جہی ہستی ہے وے جیہڑی ایہہ ویکھ رہی اے کہ اوہ کیہہ کہہ رہے نیں تے کیہہ کر رہے نیں تے اوہناں نُوں ایہدے لئی اوہدے سامنے جواب دینا پووے گا۔‏

ایہدے چ کوئی شک نئیں کہ خدا دا کوئی وی بندہ ملک دے قومی نشاناں دی قسم نئیں کھائے گا کیونکہ اوہناں دا تعلق جھوٹھے مذہب نال اے۔ پر جدوں توانوں عدالت چ کہیا جاندا اے کہ تُسی بائبل تے ہتھ رکھ کے قسم کھاؤ کہ تُسی جو وی کہوو گے سچ کہوو گے تے تُسی کیہہ کر‌و گے؟ ایہو جہی صورتحال چ تُسی اِنج کر‌ن دا فیصلہ کر سکدے او کیونکہ پاک کلام چ خدا دے کجھ بندیاں بارے دَسیا گیا اے جنہاں نے کوئی خاص اشارہ کر‌کے قسم کھادی سی۔ (‏پیدایش 24:‏2، 3،‏ 9؛‏ 47:‏29-‏31‏)‏ پر ایہہ گل یاد رکھنا بوہت ضروری اے کہ جدوں تُسی ایس طرحاں قسم کھاندے او تے اصل چ تُسی خدا دے سامنے قسم کھا رہے ہوندے او کہ تُسی سچ بولو گے۔ توانوں اوہناں سوالاں دے صحی صحی جواب دین لئی پہلاں توں ای چنگی تیاری کر‌نی چاہی دی اے جیہڑے تواڈے کولوں پچھے جان گے۔‏

اَسی یہوواہ نال اپنی دوستی دی دلوں قدر کر‌نے آں۔ ایس لئی قسم کھاندے ویلے سانوں پہلاں دُعا کر‌نی چاہی دی اے تے چنگی طرحاں سوچ‌وچار کر‌نا چاہی دا اے تاکہ اَسی ایس گل دی تسلی کر لئیے کہ اَسی بائبل دا کوئی حکم تے نئیں توڑ رہے۔ جے تُسی کوئی قسم کھان دا فیصلہ کر‌دے او تے اوہنوں ضرور پورا کر‌و۔—‏1-‏پطرس 2:‏12‏۔‏