بائبل دے مطابق 1914 چ اسمان تے خدا دی بادشاہی قائم ہوئی سی۔ ایہہ گل دانی‌ایل دی کتاب دے چوتھے باب چ لکھی اِک پیشین‌گوئی توں پتہ چلدی اے۔‏

 ایہہ پیشین‌گوئی کیہہ سی؟‏

خدا نے بابل دے بادشاہ نبوکدنضر نُوں خواب چ اَک بوہت اُچا تے وڈا درخت وکھایا جنہوں وڈھ دِتا گیا۔ اوس درخت دے مڈھ نُوں بنھیا گیا تاکہ درخت ست دَور لنگھن تک ودھ نہ سکے۔ پر بعد چ اوس درخت نے فیر توں ودھنا سی۔—‏دانی‌ایل 4:‏1،‏ 10-‏16‏۔‏

 پیشین‌گوئی دی پہلی تکمیل۔‏ ایہہ درخت بادشاہ نبوکدنضر وَل اشارہ کردا اے۔ (‏دانی‌ایل 4:‏20-‏22‏)‏ بادشاہ نبوکدنضر نُوں اوس ویلے اِک لحاظ نال وڈھیا گیا جدوں ست سال لئی اوہدی ذہنی حالت خراب ہو گئی تے اوہ بادشاہ نئیں رہیا۔ (‏دانی‌ایل 4:‏25‏)‏ جدوں خدا نے نبوکدنضر دی ذہنی حالت ٹھیک کر دِتی تے اوہ فیر توں بادشاہ بن گیا تے ایہہ گل من گیا کہ خدا ای سب توں وڈا حکمران اے۔—‏دانی‌ایل 4:‏34-‏36‏۔‏

 پیشین‌گوئی دی وڈی تکمیل۔‏ ایس پیشین‌گوئی دا مقصد ایہہ سی کہ سارے لوک جان لین کہ حق‌تعالیٰ انسانی حکومتاں تے حکمرانی کردا اے۔ اوہ جنہوں چاہوے حکومت دیندا اے تے سب توں معمولی انسان نُوں تخت تے بٹھاندا اے۔ (‏دانی‌ایل 4:‏17‏)‏ کیہہ مغرور بادشاہ نبوکدنضر اوہ بندہ سی جنہوں خدا سارے انساناں تے حکومت کرن دا اِختیار دینا چاہندا سی؟ بالکل نئیں۔کجھ عرصہ پہلاں خدا نے نبوکدنضر نُوں اِک ہور خواب دے ذریعے دَسیا سی کہ نہ تے اوہنوں تے نہ ای کسے ہور انسانی حکمران نُوں ایہہ اِختیار دِتا جائے گا۔ ایہدی بجائے خدا نے آپ اِک ایہو جہی حکومت قائم کرنی سی جیہڑی کدی ختم نئیں ہوئے گی۔—‏دانی‌ایل 2:‏31-‏44‏۔‏

 خدا نے پہلاں اپنی اِک بادشاہی قائم کیتی سی جیہڑی زمین تے اوہدی حکمرانی دی نمائندگی کردی سی تے ایہہ بادشاہی پرانی اِسرائیلی قوم سی۔ خدا نے ایس بادشاہی بارے کہیا کہ ایہنوں اُلٹ دَوو کیونکہ ایہدے حکمران خدا دے وفادار نئیں رہے سن۔ پر اوہنے ایہہ پیشین‌گوئی کیتی کہ اوہ اوس بندے نُوں بادشاہ بنن دا اِختیار دَوے گا جدا حق اے۔ (‏حزقی‌ایل 21:‏25-‏27‏)‏ بائبل توں پتہ چل دا اے کہ یسوع مسیح کول خدا دی بادشاہی دا حکمران بنن دا حق اے جیہڑی کدی ختم نئیں ہوئے گی۔ (‏لُوقا 1:‏30-‏33‏)‏ مغرور بادشاہ نبوکدنضر توں اُلٹ یسوع مسیح دلوں خاکسار اے۔—‏متی 11:‏29‏۔‏

 جیس درخت دا ذکر دانی‌ایل 4 باب چ کیتا گیا اے، اوہ کدے وَل اشارہ کردا ا اے؟‏ بائبل چ درخت کدی کدار حکومتاں وَل اشارہ کردے نیں۔ (‏حزقی‌ایل 17:‏22-‏24؛‏ 31:‏2-‏5‏)‏ دانی‌ایل 4 باب چ لکھی پیشین‌گوئی دی وڈی تکمیل چ اُچا درخت خدا دی حکمرانی وَل اشارہ کردا اے۔‏

 درخت دا وڈھیا جانا کیہڑی گل وَل اشارہ کردا اے؟‏ ایہہ ایس گل وَل اشارہ کردا اے کہ نبوکدنضر دی حکمرانی کجھ عرصے لئی ختم ہو جانی سی۔ ایسے طرحاں زمین تے خدا دی حکمرانی کجھ عرصے لئی ختم ہو جانی سی۔ ایہہ اوس ویلے ہویا جدوں نبوکدنضر نے یروشلیم نُوں تباہ کر دِتا جِتھے اِسرائیل دے بادشاہ یہوواہ دے تخت تے اوہدے نمائندیاں دے طور تے بیٹھ دے سن۔—‏1-‏تواریخ 29:‏23‏۔‏

 ‏”‏ست دَور“‏ کدے وَل اشارہ کردے نیں؟‏ ایہہ اوس عرصے وَل اشارہ کردے نیں جدے چ خدا نے انساناں نُوں حکمرانی کرن دی اجازت دِتی سی تے جدوں زمین تے خدا دا کوئی نمائندہ حکمرانی نئیں کر رہیا سی۔ بائبل توں پتہ چلدا اے کہ ”‏ست دَور“‏ اکتوبر 607 قبل‌ازمسیح چ شروع ہوئے جدوں بابلی فوج نے یروشلیم نُوں تباہ کیتا۔—‏2-‏سلاطین 25:‏1،‏ 8-‏10‏۔‏

 ‏”‏ست دَور“‏ کِنّے لمے نیں؟‏ ایہہ سچ اے کہ نبوکدنضر نے ست سال لئی اپنی حکمرانی کھو دِتی سی پر ”‏ست دَور‎“ صرف ست سال لمے نئیں ہو سکدے۔ یسوع مسیح نے آکھیا:‏ یروشلیم [‏یعنی زمین تے خدا دی حکمرانی دے مرکز]‏ نُوں اوس ویلے تک قوماں دے پیراں تھلے مِدھیا جائے گا جدوں تک کہ قوماں دا وقت پورا نہ ہو جائے۔ (‏لُوقا 21:‏24‏)‏ ایس ایت دے مطابق یہوواہ نے قوماں لئی طے کیتے ہوئے وقت دے دوران قوماں نُوں اجازت دِتی کہ اوہ اوہدی حکمرانی نُوں پیراں تھلے مِدھن۔ ایس لئی قوماں لئی طے کیتا ہویا وقت اوہناں ست دَوراں وَل اشارہ کردا اے جنہاں دا ذکر دانی‌ایل 4 باب چ کیتا گیا اے۔ ایہدے توں ظاہر ہوندا اے کہ جدوں یسوع مسیح زمین تے سن تے ست دَوراں دا عرصہ حالے چل رہیا سی۔‏

 بائبل تے غور کرن نال اَسی ایہہ اندازہ لا سکنے آں کہ ”‏ست دَور “‏کِنّے لمے نیں۔ ایہدے چ دَسیا گیا کہ ساڈھے تِن ”‏دَور“‏ یاں ”‏وقت“‏ 1260 دِناں دے برابر نیں۔ ایس طرحاں ”‏ست دَور“‏ 2520 دِناں دے برابر نیں۔ (‏مکاشفہ 12:‏6،‏ 14‏)‏ بائبل چ پیشن‌گوئیاں نُوں سمجھن لئی اِک اصول دِتا گیا اے جدے مطابق اِک دن اِک سال دے برابر ہوندا اے۔ ایس لئی 2520 دن 2520 سال دے برابر نیں۔ تے جے اَسی 607 قبل‌ازمسیح توں 2520 سال اَگے جائیے تے ایہدا مطلب اے کہ ”‏ست دَور“‏ اکتوبر 1914چ ختم ہوئے۔—‏گنتی 14:‏34؛‏ حزقی‌ایل 4:‏6‏۔‏