کیہڑے لوک اسمان تے جاندے نیں؟
پاک کلام دا جواب
خدا نے ایہو جہے مسیحیاں دی اِک مخصوص تعداد مقرر کیتی ہوئی اے جنہاں نُوں موت دے بعد اسمان تے زندگی دِتی جائے گی۔ (1-پطرس 1:3، 4) جدوں ایہناں مسیحیاں نُوں چُن لیا جاندا اے تے اوہناں نُوں اپنے ایمان تے قائم رہن تے اپنے چالچلن نُوں پاک رکھن دی پوری کوشش کرنی پیندی اے تاکہ اوہ اسمان تے مِلن والی وراثت نُوں حاصل کرن دے قابل ٹھہرن۔—اِفسیوں 5:5؛ فِلپّیوں 3:12-14۔
جیہڑے لوک اسمان تے جان گے اوہ اوتھے کیہہ کرن گے؟
اوہ لوک اسمان تے یسوع مسیح دے نال 1000 سال تک بادشاہواں تے کاہناں دے طور تے حکمرانی کرن گے۔ (مکاشفہ 5:9، 10؛ 20:6) اوہ نواں اسمان یعنی اسمانی حکومت بنان گے جیہڑی نوِیں زمین یعنی نویں انسانی معاشرے اُتے حکمرانی کرے گی۔ ایہہ حکمران انساناں دی مدد کرن گے تاکہ اوہ گُناہ توں پاک ہو سکن جیویں کہ خدا شروع توں ای انساناں لئی چاہندا سی۔— یسعیاہ 65:17؛ 2-پطرس 3:13۔
کِنّے لوکاں نُوں اسمان تے زندگی دِتی جائے گی؟
بائبل چ دَسیا گیا اے کہ جنہاں لوکاں نُوں اسمان تے زندگی دِتی جائے گی اوہناں دی کُل تعداد 1 لکھ 44 ہزار اے۔ (مکاشفہ 7:4) یوحنا رسول نے اِک رویا چ ویکھیا کہ میمنا صیون دے پہاڑ تے کھلوتا سی تے اوہدے نال 1 لکھ 44 ہزار لوک سن۔ (مکاشفہ 14:1-3) ایس رویا چ میمنا یسوع مسیح وَل اشارہ کردا اے جنہوں مُردیاں چوں زندہ کیتا گیا۔ (یوحنا 1:29؛ 1-پطرس 1:19) صیون دا پہاڑ یسوع مسیح تے اوہدے نال اسمان تے حکمرانی کرن والے 1 لکھ 44 ہزار لوکاں دے اُچے مرتبے وَل اشارہ کردا اے۔—زبور 2:6؛ عبرانیوں 12:22۔
جنہاں لوکاں نُوں یسوع دے نال بادشاہی کرن لئی چُنیا گیا اے اوہناں نُوں بائبل چ چھوٹا گلّہ کہیا گیا اے۔ (مکاشفہ 17:14؛ لُوقا 12:32) ایہدے توں پتہ چلدا اے کہ اسمان تے جان والے مسیحیاں دی تعداد یسوع دِیاں ہور وی بھیڈاں دے مقابلے چ بوہت گھٹ اے۔—یوحنا 10:16۔
اسمان تے جان بارے لوکاں دے غلط نظریے
غلط نظریہ: سارے نیک لوک اسمان تے جاندے نیں۔
سچائی: خدا دا وعدہ اے کہ زیادہتر نیک لوک زمین تے ہمیشاں دی زندگی حاصل کرن گے۔—زبور 37:29، 34۔
یسوع مسیح نے کہیا کہ کوئی وی اسمان تے نئیں گیا۔ (یوحنا 3:13) ایس طرحاں اوہنے ظاہر کیتا کہ اوہدے زمین تے آن توں پہلاں جیہڑے نیک لوک فوت ہوئے سن جیویں کہ ابراہام، موسیٰ، ایوب تے داؤد اوہ اسمان تے نئیں گئے۔ (اعمال 2:29، 34) ایہدی بجائے اوہ لوک ایہہ امید رکھدے سن کہ اوہناں نُوں زمین تے زندہ کیتا جائے گا۔ایہہ گل ایوب دے ایہناں لفظاں توں پتہ چلدی اے: جے انسان مر جائے تے کیہہ اوہ فیر زندہ ہوئے گا؟ تُوں مینوں آواز دَویں گا تے میں تینوں جواب دَواں گا۔—ایوب 14:14، 15۔
جنہاں لوکاں نُوں اسمان تے زندگی دین لئی زندہ کیتا جائے گا اوہناں بارے بائبل چ کہیا گیا اے کہ اوہ سب توں پہلے زندہ ہوندے نیں۔ (مکاشفہ 20:6) ایہدے توں پتہ چلدا اے کہ اوہناں توں بعد ہور وی لوکاں نُوں زندہ کیتا جائے گا تے اوہناں نُوں زمین تے زندگی دِتی جائے گی۔
بائبل چ دَسیا گیا اے کہ خدا دی بادشاہی وچ موت نئیں ہوئے گی۔ (مکاشفہ 21:3، 4) سو خدا دا ایہہ وعدہ زمین تے ای پورا ہو سکدا اے کیونکہ اسمان تے موت دا کوئی تصور ای نئیں۔
غلط نظریہ: ایہہ فیصلہ انسان آپ کردا اے کہ اوہ اسمان تے زندگی پائے گا یاں زمین تے۔
سچائی: ایہہ فیصلہ خدا کردا اے کہ کیہڑے وفادار مسیحی انعام یعنی اسمان تے زندگی حاصل کرن گے۔ (فِلپّیوں 3:14) کسے وی بندے نُوں اوہدی خواہش یاں مرضی دی وجہ توں نئیں چُنیا جاندا۔متی 20:20-23۔
غلط نظریہ: زمین تے ہمیشاں دی زندگی دی امید اسمان تے زندگی دی امید جِنّی اہم نئیں تے ایہہ اوہناں لوکاں لئی اے جیہڑے اسمان تے جان دے لائق نئیں۔
سچائی: خدا نے اوہناں لوکاں نُوں جیہڑے زمین تے ہمیشاں دی زندگی پان گے، میرے بندے، میرے برگزیدے (یعنی چُنے ہوئے) تے یہوواہ دے مبارک لوک کہیا۔ (یسعیاہ 65:21-23) ایہناں لوکاں نُوں ایہہ شرف ملے گا کہ اوہ خدا دے مقصد دے مطابق گُناہ توں بالکل پاک ہو جان گے تے اِک نوِیں دُنیا چ ہمیشاں دی زندگی حاصل کرن گے جیہڑی خدا شروع توں ای انساناں نُوں دینا چاہندا سی۔—پیدایش 1:28؛ زبور 115:16؛ یسعیاہ 45:18۔
غلط نظریہ: مکاشفہ چ جیہڑے 1 لکھ 44 ہزار نمبر دا ذکر کیتا گیا اے اوہ اصلی نئیں سگوں فرضی اے۔
سچائی: ایہہ سچ اے کہ مکاشفہ دی کتاب چ کجھ نمبر فرضی نیں پر ایہدے چ کجھ نمبر اصلی وی نیں جیویں کہ ایہدے چ میمنے دے 12 رسولاں تے 12 نانواں دا ذکر کیتا گیا اے۔ (مکاشفہ 21:14) آؤ، ویکھئے کہ سانوں 1 لکھ 44 ہزار دے نمبر نُوں اصلی کیوں سمجھنا چاہی دا اے۔
مکاشفہ 7:4 چ لکھیا اے کہ فیر میں اوہناں دی تعداد سنی جنہاں تے مُہر لائی گئی سی [یاں جنہاں بارے تصدیق کیتی گئی سی کہ اوہناں نُوں اسمان تے زندگی ملے گی۔] اوہناں دی تعداد 1 لکھ 44 ہزار سی۔ ایس ایت دی اگلی پچھلی ایتاں چ اِک ہور گروہ دا ذکر کیتا گیا اے یعنی لوکاں دی اِک وڈی بِھیڑ دا جنہوں کوئی وی گن نئیں سکدا سی۔ جیہڑے لوک وڈی بِھیڑ چ شامل نیں اوہناں نُوں خدا نجات دَوائے گا۔ (مکاشفہ 7:9، 10) جے 1 لکھ 44 ہزار دا نمبر فرضی ہوندا یعنی جے ایہہ کسے ایہو جہے گروہ وَل اشارہ کردا جدی کوئی مخصوص تعداد ای نئیں تے فیر ایہناں دونواں گروہواں چ فرق کرنا مشکل ہوندا۔ a
ایہدے علاوہ 1 لکھ 44 ہزار بارے کہیا گیا اے کہ ایہناں نُوں انساناں وچوں خرید لیا گیا اے تاکہ اوہ پہلے پھل ہون۔ (مکاشفہ 14:4) اِصطلاح ”پہلے پھل“ کجھ پھلاں دی کُل تعداد وَل نئیں سگوں صرف کجھ پھلاں وَل اشارہ کردی اے۔ ایس لئی ایہہ اِصطلاح واقعی اوہناں لوکاں لئی اے جیہڑے یسوع نال اسمان توں زمین تے رہن والے بےشمار لوکاں تے حکمرانی کرن گے۔—مکاشفہ 5:10۔
a پروفیسر رابرٹ تھامس نے مکاشفہ 7:4 چ لکھے نمبر 1 لکھ 44 ہزار بارے لکھیا کہ ایہہ نمبر اِک مخصوص تعداد لئی استمال ہویا اے جد کہ مکاشفہ 7:9 چ مخصوص تعداد دا ذکر نئیں اے۔ جے ایس نمبر نُوں فرضی سمجھیا جائے تے فیر مکاشفہ دی کتاب چ لکھے کسے وی نمبر نُوں اصلی نئیں سمجھیا جا سکدا۔—ریولیشن 1-7: این ایگزجیٹیکل کومینڑی، صفحہ 474۔
ایہہ وی ویکھو
اہم تلیم
خدا دی بادشاہی کیہہ اے؟
جدوں یسوع مسیح زمین تے سن تے اوہ لوکاں نُوں سب توں زیادہ خدا دی بادشاہی دے بارے سکھاؤندے سن۔ کئی صدیاں توں لوک دعا کر رہے نیں کہ ایہہ بادشاہی آوے۔
بائبل دی تلیم
ایہہ کورس کر کے ویکھو۔
اِک ایہو جیہا دلچسپ بائبل کورس کرو جدے چ تُسی تے تواڈا اُستاد مِل کے گل بات کرو گے۔