پاک کلام چ دَسیا گیا اے کہ اَسی ایہدے چ لکھیاں گلاں نُوں سمجھن لئی کیہہ کر سکنے آں۔ بھانویں ساڈا تعلق کسے وی قوم، نسل یاں ملک نال ہووے ساڈے لئی بائبل چ لکھے خدا دے پیغام نُوں سمجھنا اوکھا نئیں تے نہ ای خدا ساڈے توں دُور اے۔—‏اِستثنا 30:‏11‏۔‏

پاک کلام نُوں سمجھن لئی مشورے

1.   صحی سوچ اپناؤ۔‏ ایس گل تے یقین رکھو کہ بائبل خدا دا کلام اے۔ خاکسار بنو کیونکہ خدا مغروراں دی مخالفت کردا اے۔ (‏1-‏تھسلُنیکیوں 2:‏13؛‏ یعقوب 4:‏6‏)‏ پر خدا ایہہ وی نئیں چاہندا کہ اَسی بائبل چ لکھیاں گلاں تے بس اَکھاں بند کر کے یقین کر لئیے سگوں اوہ چاہندا اے کہ اَسی اپنی سوچن سمجھن دی صلاحیت نُوں استمال کرئیے۔—‏رومیوں 12:‏1، 2‏۔‏

2.   دانش‌مندی حاصل کر ن لئی دُعا کرو۔‏ پاک کلام چ لکھیا اے:‏ اپنی عقل تے اعتبار نہ کر۔ (‏امثال 3:‏5‏)‏ ایس لئی وار وار خدا کولوں دانش‌مندی منگو تاکہ تُسی پاک کلام چ لکھیاں گلاں نُوں سمجھ سکو۔—‏یعقوب 1:‏5‏۔‏

3.   باقاعدگی نال مطالعیا کرو۔‏ جے تُسی صرف کدی کدار بائبل دا مطالعیا کرن دی بجائے باقاعدگی نال ایہدا مطالعیا کرو گے تے توانوں زیادہ فائدہ ہووے گا۔—‏یشوع 1:‏8‏۔‏

4.   کسے اِک موضوع بارے مطالعیا کرو۔‏ پاک کلام نُوں سمجھن دا اِک ودھیا طریقہ ایہہ وے کہ تُسی اِک موضوع چُنو تے ویکھو کہ بائبل دِیاں فرق فرق ایتاں چ ایس موضوع بارے کیہہ دَسیا گیا اے۔ شروع شروع چ تُسی بائبل دی بنیادی تلیم تے غور کر سکدے او تے فیر ”‏پختگیُ“‏ وَل ودھ سکدے او۔ پاک کلام چ جیس اِصطلا‌ح دا ترجمہ ”‏پختگیُ“‏ کیتا گیا اے، اوہدا مطلب گوڑھی تلیم اے۔ (‏عبرانیوں 6:‏1، 2‏، ‏”‏ترجمہ نوِیں دُنیا‏“‏‏)‏ جدوں تُسی اِک ایت دا موازنہ دُوجی ایت نال کرو گے تے تُسی ویکھو گے کہ بائبل دا اِک حصہ دُوجے حصے دی وضاحت کیویں کردا اے۔ اِنج تُسی ایہدے چ لکھیاں گلاں نُوں چنگی طرحاں سمجھ سکو گے، اوناں گلاں نُوں وی جنہاں نُوں سمجھنا اوکھا اے۔—‏2-‏پطرس 3:‏16‏۔‏

5.   دُوجیاں کولوں مدد حاصل کرو۔‏ پاک کلام چ ساڈی حوصلہ‌افزائی کیتی گئی اے کہ اَسی اوہناں لوکاں دی مدد قبول کرئیے جیہڑے پاک کلام نُوں سمجھدے نیں۔ (‏اعمال 8:‏30، 31‏)‏ یہوواہ دے گواہ لوکاں نُوں مُفت بائبل کورس کراندے نیں۔ یسوع مسیح دے شاگرداں وانگوں اَسی وی پاک کلام چوں حوالے دے کے دُوجیاں نُوں سمجھانے آں کہ اصل چ بائبل دی تلیم کیہہ اے۔—‏اعمال 17:‏2، 3‏۔‏

پاک کلام نُوں سمجھن لئی ایہناں چیزاں دی لوڑ نئیں:‏

1.   بوہت زیادہ ذہانت یاں اعلیٰ تلیم۔‏ بھانویں کہ یسوع مسیح دے رسولاں نُوں گھٹ پڑھیا لکھیا تے معمولی سمجھیا جاندا سی پر اوہ پاک صحیفیاں نُوں سمجھدے سن تے دُوجیاں نُوں وی ایہناں دی تلیم دیندے سن۔—‏اعمال 4:‏13‏۔‏

2.   پیسہ۔‏ توانوں پاک کلام چ لکھیاں گلاں نُوں سکھن تے سمجھن لئی پیسے خرچ کرن دی لوڑ نئیں اے۔ یسوع مسیح نے اپنے شاگرداں نُوں آکھیا سی کہ تُسی مُفت پایا اے ایس لئی مُفت دَوو۔—‏متی 10:‏8‏۔‏