پاک کلام سانوں حوصلہ دیندا اے کہ اَسی دُوجیاں نُوں کجھ دین لئی تیار رہیے تے ایہہ کم اَسی صاف نیت نال کریئے۔ پاک کلام چ ایہہ وی لکھیا اے کہ نہ صرف لین والے نُوں سگوں دین والے نُوں وی دلوں خوشی ہوندی اے۔ (‏امثال 11:‏25؛‏ لُوقا 6:‏38‏)‏ یسوع مسیح نے کہیا کہ لین نالوں دین چ بوہتی خوشی مِلدی اے۔—‏اعمال 20:‏35‏۔‏

•  دُوجیاں نُوں کجھ دینا کدوں صحی ہوندا اے؟‏

•  دُوجیاں نُوں کجھ دینا کدوں غلط ہوندا اے؟‏

•  دُوجیاں نُوں دین بارے پاک کلام توں کجھ ایتاں

 دُوجیاں نُوں کجھ دینا اوہدوں ای صحی ہوندا اے جدوں اَسی خوشی نال دینے آں تے ایہدے توں خدا وی خوش ہوندا اے۔ ایہدے بارے پاک کلام چ لکھیا اے ہر بندہ اُنج ای کرے جیویں اوہنے اپنے دل چ طے کیتا اے تے بے دلی یاں مجبوری نال نہ کرے کیونکہ خدا اوس بندے نُوں پسند کردا اے جیہڑا دل دی خوشی نال دیندا اے۔—‏2-‏کُرنتھیوں 9:‏7‏۔‏

 دُوجیاں نُوں خوشی نال کجھ دینا اوس عبادت دا حصہ اے جیہڑی خدا نُوں پسند اے۔ (‏یعقوب 1:‏27‏)‏ جیہڑا بندہ کھلے دل نال ضرورت‌مند لوکاں دی مدد کردا اے اوہ خدا نُوں خوش کردا اے۔ ایہہ اِنج ای اے جیویں اوہ بندہ خدا نُوں قرضہ دے رہیا اے۔ (‏امثال 19:‏17‏)‏ پاک کلام چ دَسیا گیا اے کہ خدا دُوجیاں دی مدد کرن والے بندے نُوں اجر دے گا۔—‏لُوقا 14:‏12-‏14

 جدوں اَسی دُوجیاں نُوں اپنے فائدے لئی کجھ دینے آں۔‏مثال لئی:‏

•   جدوں اَسی دکھاوے لئی دُوجیاں نُوں دینے آں۔—‏متی 6:‏2‏۔‏

•   بدلے چ کجھ مِلن دی نیت توں دینے آں۔—‏لُوقا 14:‏12-‏14‏۔‏

•   خدا توں برکتاں حاصل کرن دی نیت نال دینے آں۔—‏اعمال 8:‏20‏۔‏

 جدوں اَسی ایہو جہے کماں لئی کجھ دینے آں جیہڑے خدا نُوں پسند نئیں نیں۔‏ مثال لئی، کسے نُوں جُوا کھیڈن، نشے کرن یاں حد توں زیادہ شراب پین لئی پیسے دینا غلط اے۔ (‏1-‏کُرنتھیوں 6:‏9، 10؛‏ 2-‏کُرنتھیوں 7:‏1‏)‏ ایسے طرحاں کسے ایہو جہے بندے دی مدد کرنا وی غلط اے جیہڑا اپنے لئی آپ کما سکدا اے پر جان بوجھ کے نئیں کماندا۔—‏2-‏تھسلُنیکیوں 3:‏10‏۔‏

 جدوں دُوجیاں نُوں کجھ دینا خدا وَلّوں مِلن والیاں ذمے‌داریاں نُوں پورا کرن چ رکاوٹ بنے۔‏ پاک کلام چ کہیا گیا اے کہ گھر دے سربراہ دا فرض اے کہ اوہ اپنے گھرانے دِیاں ضرورتاں پوریاں کرے۔ (‏1-‏تیمُتھیُس 5:‏8‏)‏ اِک گھر دے سربراہ نُوں دُوجیاں دی اینی وی مدد نئیں کرنی چاہی دی کہ اوہدے اپنے گھر والیاں دِیاں ضرورتاں نہ پوریاں ہو سکن۔ ایسے طرحاں یسوع مسیح نے کہیا کہ ایہہ بوہت غلط گل اے کہ جے اِک بندہ ایہہ بہانہ لا کے اپنے وڈیرے ماں پیو دِیاں ضرورتاں نہ پوریاں کرے کہ میں اپنا سارا کجھ خدا لئی مخصوص کر دِتا اے۔—‏مرقس 7:‏9-‏13‏۔‏