جی ہاں۔ بھانویں کہ بائبل کوئی سائنسی کتاب نئیں پر ایہدے چ سائنس نال تعلق رکھن والیاں جیہڑیاں وی گلاں دَسیاں گئیاں نیں، اوہ بالکل صحی نیں۔ آؤ، ایہدیاں کجھ مثالاں تے غور کریئے جنہاں توں اَسی ویکھ سکاں گے کہ بائبل سائنس نال میل کھاندی اے۔ ایہدے چ جیہڑیاں سائنسی گلاں دَسیاں گئیاں نیں، اوہ اوہناں بوہت سارے لوکاں دے عقیدیاں نالوں فرق نیں جیہڑے اوس زمانے چ رہندے سن جدوں بائبل لکھی گئی سی۔‏

•   بائبل دے مطابق کائنات نُوں بنایا گیا سی۔ (‏پیدایش 1:‏1‏)‏ پر بوہت سارے پرانے قصے کہانیاں چ دَسیا گیا اے کہ کائنات نُوں بنایا نئیں گیا سی سگوں ایہہ پہلاں توں ای موجود سی، بس ایہدے چ موجود چیزاں نُوں منظم کیتا گیا اے۔ بابلی لوک ایہہ من دے سن کہ جنہاں دیوتاواں نے کائنات نُوں جنم دِتا، اوہ دو سمندراں وچوں آئے سن۔ کجھ ہور قصے کہانیاں چ ایہہ دَسیا گیا اے کہ کائنات اِک بوہت ای وڈے آنڈے وچوں نکلی اے۔‏

•   بائبل توں ظاہر ہوندا اے کہ کائنات قدرتی قانوناں دے مطابق چلدی اے نہ کہ دیوی دیوتاواں دے ایہنوں اچانک ہلان دی وجہ توں۔ (‏ایوب 38:‏33؛‏ یرمیاہ 33:‏25‏)‏ پوری دُنیا چ ایس نظریے دی تلیم دِتی جاندی اے کہ انسان اوس ویلے بڑے بے بس محسوس کردے نیں جدوں دیوی دیوتا کائنات چ اچانک یاں کدی کدار بوہت ای بے‌رحمی نال کجھ کر دیندے نیں۔‏

•   بائبل چ دَسیا گیا اے کہ زمین خلا چ لمکی ہوئی اے۔ (‏ایوب 26:‏7‏)‏ پرانے زمانے چ لوک ایہہ من دے سن کہ زمین چپٹی اے تے ایہہ کسے وڈی جہی شے یاں جانور جیویں کہ مَج یاں کچھوے تے ٹکی ہوئی اے۔‏

•   بائبل چ دَسیا گیا اے کہ جدوں سمندراں تے دُوجیاں تھانواں دا پانی بھاپ بن کے اُڈ جاندا اے تے ایہہ زمین تے مینہہ، برف یاں گڑے بن کے ڈِگدا اے جدے نال دریا تے چشمے بھردے نیں۔ (‏ایوب 36:‏27، 28؛‏ واعظ 1:‏7؛‏ یسعیاہ 55:‏10؛‏ عاموس 9:‏6‏)‏ پرانے زمانے دے یونانی لوک ایہہ من دے سن کہ دریاواں چ جیہڑا پانی ہوندا اے، اوہ سمندر دی تہہ چ موجود پانی وچوں آندا اے۔ لوک ایس گل نُوں 18ویں صدی تک من دے رہے۔‏

•   بائبل چ ایہہ دَسیا گیا اے کہ پہاڑ ودھدے تے ڈِگدے نیں تے اَج جیہڑے پہاڑ موجود نیں، اوہ کسے ویلے سمندر چ ہوندے سن۔ (‏زبور 104:‏6،‏ 8‏)‏ پر کئی قصے کہانیاں دے مطابق جیس شکل چ اَج پہاڑ موجود نیں، اوہناں نُوں دیوی دیوتاواں نے بنایا سی۔‏

•   بائبل دے مطابق صفائی ستھرائی دے اصولاں تے چلن نال صحت چنگی رہندی اے۔ بنی‌اِسرائیل نُوں جیہڑی شریعت دِتی گئی سی، اوہدے چ ایہہ حکم وی شامل سن کہ لاش نُوں چُھون توں بعد اِک بندہ ناہوے دھووے، چُھوت دی بیماری والے بندے نُوں دُوجیاں توں وکھرا رکھیا جائے تے انساناں دی ٹٹّی نُوں زمین چ دبا دِتا جائے۔ (‏احبار 11:‏28؛‏ 13:‏1-‏5؛‏ اِستثنا 23:‏13‏)‏ پر اوس زمانے چ مصری لوک جدوں کسے بندے دے زخم دا علاج کردے سن تے اوہ لیپ چ انساناں دی ٹٹّی وی شامل کردے سن۔‏

 بائبل تے تحقیق کرن نال پتہ چلیا اے کہ اِنج بالکل نئیں اے۔ آؤ غور کریئے کہ بائبل چ جیہڑیاں سائنسی گلاں لکھیاں نیں، اوہناں بارے کیہڑے غلط نظریے پائے جاندے نیں۔‏

 غلط نظریہ:‏ بائبل چ دَسیا گیا اے کہ پوری کائنات جیہڑے چھ دِناں چ بنی، اوہناں چوں ہر دن 24 گھنٹے دا سی۔‏

 سچائی:‏ بائبل چ ایہہ تے دَسیا گیا اے کہ خدا نے کائنات نُوں بنایا پر ایہدے چ اوہ تریخ نئیں دَسی گئی جدوں کائنات نُوں بنایا گیا سی۔ (‏پیدایش 1:‏1‏)‏ ایہدے علاوہ پیدایش دی کتاب دے پہلے باب چ جیہڑے چھ دِناں دا ذکر کیتا گیا اے اوہناں بارے ایہہ صاف صاف نئیں دَسیا گیا کہ ایہہ دن کِنّے لمے سن۔ اصل چ بائبل چ اوس سارے عرصے نُوں اِک دن کہیا گیا اے جدے چ اسمان تے زمین نُوں بنایا گیا سی۔—‏پیدایش 2:‏4‏۔‏

 غلط نظریہ:‏ بائبل چ دَسیا گیا اے کہ پہلے زمین ، پودے تے درخت بنائے گئے فیر سورج نُوں بنایا گیا تاکہ پودے اوہدی روشنی دی مدد نال اپنی خوراک تیار کر سکن۔—‏پیدایش 1:‏11،‏ 16‏۔‏

 سچائی:‏ بائبل توں پتہ چلدا اے کہ زمین ، پودے تے درخت بنان توں پہلاں سورج نُوں اسمان تے بنایا گیا۔ (‏پیدایش 1:‏1‏)‏ تخلیق دے پہلے دن سورج دی مٹھیَ مٹھیَ روشنی زمین تے پے رہی سی۔ پر تخلیق دے تیجے دن تک جدوں فضا ہور صاف ہو گئی تے سورج دی اینی روشنی زمین تے پین لگ پئی کہ ایہدے توں پودے اپنی خوراک تیار کر سکدے سن۔(‏پیدایش 1:‏3-‏5،‏ 12، 13‏)‏ پر بعد چ سورج زمین توں بالکل صاف نظر آن لگ پیا۔—‏پیدایش 1:‏16‏۔‏

 غلط نظریہ:‏ بائبل چ دَسیا گیا اے کہ سورج زمین دے آلے دوالے چکر لاندا اے۔‏

 سچائی:‏ پاک کلام چ دَسیا گیا اے کہ سورج نکل دا اے تے سورج ڈھلدا اے تے اپنی نِکلن والی جگہ وَل چھیتی چلا جاندا اے۔ (‏واعظ 1:‏5‏)‏ ایس ایت چ بس ایہہ دَسیا گیا اے کہ جدوں زمین توں سورج نُوں ویکھیا جاندا اے تے اوہ کیویں حرکت کردا اے۔ اَج وی اِک بندہ سورج بارے گل کردے ویلے اوہدے”‏ نکلن“‏ تے ”‏ڈھلن“‏ دا ذکر کردا اے بھانویں کہ اوہنوں ایہہ پتہ اے کہ اصل چ سورج نئیں سگوں زمین ایہدے آلے دوالے گھم دی اے۔‏

 غلط نظریہ:‏ بائبل چ دَسیا گیا اے کہ زمین چپٹی اے۔‏

 سچائی:‏ جدوں بائبل چ اِصطلا‌ح ”‏زمین دی اِنتہا تک“‏ استمال کیتی گئی تے ایہدا مطلب ایہہ نئیں سی کہ زمین چپٹی اے یاں ایہدا کوئی کنارااے۔ (‏اعمال 1:‏8‏)‏ ایسے طرحاں جدوں بائبل چ علامتی لحاظ نال ایہہ کہیا جاندا اے کہ ”‏زمین دے چارے پاسے“‏ تے ایہدا اشارہ پوری زمین وَل ہوندا اے۔ اَج وی جدوں اِک بندہ قطب‌نما (‏ایہہ اِک ایہو جیہا آلہ اے جدے نال مشرق، مغرب، شمال تے جنوب دا پتہ لایا جانا اے)‏ دے چار پاسیاں دا ذکر کردا اے تے شاید اوہدا مطلب زمین دے چارے کونے یعنی پوری زمین ہوندی اے۔—‏یسعیاہ 11:‏12؛‏ لُوقا 13:‏29‏۔‏