Tiyesesa kutewedzera vomwe Baibolo ipfunzisa tikambachita mwambo wa maliro. Vinango mwa vinthu mwevi ni ivi:

•   Nkuphonyali kubva ntsisi munthu yemwe timukonda akamwalira. Opfunzira wa Yesu ambalira munthu yemwe ambamukonda akamwalira. (Yohani 11:33-35, 38; Machitidwe 8:2; 9:39) Ndipomwapa, pa maliro tionalini ninge nthawe yokondwa. (Mlaliki 3:1, 4; 7:1-4) M’malo mwavimwevi, tiona chochitika mwechi kuti ni nthawe yomwe tidekana kuwonesana chikondi na kulimbikisana.—Aroma 12:15.

•   Wakufa adziwalini chinthu. Ndipomwapa, viribe basa chikhalidwe panango komwe tikhala. Wa Mboni za Yahova tikhulupirira kuti wakufa adziwalini chirichose chomwe chinkuchitika. Tikhulupirira vimwevi ndawa yakuti ni vomwe Baibolo ipfunzisa. (Mlaliki 9:5, 6, 10) Tichitalini miyambo ninge kugona pa maliro, kuchita phwando, kukumbukira ntsiku yomwe munthu adamwalira, kuchita va mizimu, kuyesa kuyankhula na munthu yemwe adamwalira panango kukumbira thandizo kwa munthu yemwe adamwalira. Tichitalini vinthu vimwevi ndawa yobvera lamulo ya m’Baibolo yakuti: “Ndipomwapa chokani pagulu yawo, . . . ayi kugumirira chinthu chopsyipiziwa.”—2 Akorinto 6:17.

•   Wanthu womwe adamwalira adzakhale pomwe na moyo. Baibolo ipfunzisa kuti Mulungu adzamukise wanthu ndipo impfa idzamale. (Machitidwe 24:15; Chivumbuluso 21:4) Ninge momwe vidathandizira Akhrisitu wa kumbuyo, chidikhiro chimwechi chitithandiza kuti tileke kumbakhala na ntsisi mopitirira malire.—1 Atesalonika 4:13.

•   Baibolo inena kuti tidekanalini kumbachita vinthu mopitirira malire. (Miyambo 11:2) Isepano tionalini kuti pa maliro ni nthawe yomwe munthu ‘angambadzionese’ kuti ana kobiri zizinji. (1 Yohani 2:16) Pa maliro tidzongalini kobiri zizinji na cholinga chakuti wanthu atione, ndipo tigulalini bokosi yodula maninge panango kuyenda na vovala vodula maninge.

•   Tichichimizalini wanthu kuti ambatewedze vomwe tikhulupirira pa nkhani ya mwambo wa maliro. Tichita vimwevi ndawa yakuti titewedza mpfundo ya m’Baibolo yakuti: “Aliyese wa isepano adzadawire yekha kwa Mulungu.” (Aroma 14:12) Koma wanthu akatibvunza vomwe tikhulupirira, tiyesesa kuwafotokozera “modekha na mwaulemu maninge.”—1 Petulo 3:15.

Ko maliro ya Mboni za Yahova yachitika tani?

 Malo: Banja yomwe yaferewa ni yomwe isalula malo yomwe kuchitikira mwambo wa maliro. Anango angasalule ku Nyumba ya Ufumu, kumuyi kwawo panango kumanda.

 Momwe vichitikira: Pamwapa pakambiwa nkhani ya m’Baibolo yomwe ifotokoza vokhudza impfa na chidikhiro cha kumuka kwa akufa. (Yohani 11:25; Aroma 5:12; 2 Petulo 3:13) Wokamba nkhani mweyo angafotokoze va makhalidwe yabwino yomwe munthu moule wenze nayo na vomwe anango angapfunzire.—2 Samueli 1:17-27

 Nyimbo yochokera m’Baibolo ingaimbewe pa mwambo moyu. (Akolose 3:16) Pakumalizira pachitika pemphero yomwe ilimbikisa wanthu omwe ali pamwapo.—Afilipi 4:6, 7.

 Vopereka: Tiuzalini banja yomwe yaferewa kuti ipereke kobiri zolipira munthu yemwe wakamba nkhani. Ndipo ninge momwe vikhalira pa misonkhano yathu, tifambisalini puleti ya vopereka pa mwambo wa maliro.—Mateyu 10:8.

 Wanthu omwe angagumanike: Ninge momwe vikhalira pa misonkhano yathu, wanthu wose omwe ni Mbonilini angabwere pa mwambo wa maliro olo womwe unkuchitikira ku Nyumba ya Ufumu.

Ko wa Mboni za Yahova ayenda kumwambo wa maliro wa vipembedzo vinango?

 Pa nkhani mweyi aliyese asalula yekha vochita mobverana na vomwe adapfunzira m’Baibolo. (1 Timoteyo 1:19) Koma tichitalini nawo miyambo ya maliro yomwe yabveranalini na vomwe Baibolo ipfunzisa.—2 Akorinto 6:14-17.